Read MMA SHIYYA Barua ya Varome 10 Bible Online

Barua ya Varome 10 - MMA SHIYYA bible

Barua ya Varome 10

¹Vanavama, nrima wakwa kilya ulangie nnu ni ivaterevia kwa Iṛuva vakiṛwa.

²Amu weeshi sheeli vakee ikwatara kiimba kya Iṛuva, kake vatuṛa uṛango.

³Amu usumani lwa kwa Iṛuva valwishi ndi vakafura ikuniinga usumani lwawo veni. Kwa ikyo vandeiriwa usumani lua Iṛuva alufurie ndi.

⁴Amu myawutie ya mavavaso nKristo, amu ulya woose ankusuraa akooye usumani.

⁵Amu Mose atisiṛa: ”Ulya woose antana fa usumani sheeli mavavaso arerie avaa na muu kiimba kyayo“.

⁶Kake usumani lukee yuka ikusureń lukee irera kuri: ”Manya kutarere ngooń yafo kwinumbuaa: ”Uu arwaa iṛuvewu ni i?“ Kuro llyo yolota Kristo na si.

⁷”Ana manya kutanumbue: Ulya aolokaa kumande vafuń ni i?“ Kuro llyo irosa Kristo autwa vafuń.

⁸Kake lwarera are? Lunumbuye kuri: ”Kirero kyo kikee kufui nawe, kikee ifo kaniń kafo na ifo nrimiń wafo“. Nkyo kirero tikee ikwanisa kya ikusura.

⁹Kiimba kya iki kwanrambua Yesu Kristo na kana kafo sheeli yye Nndumi na ikusura na nrima sheeli Iṛuva andenduta kwa vafu, kukiaa.

¹⁰Amu kwammukusura na nrima kuniingwaa usumani, kwammurambua na kana kukiaa.

¹¹Amu mitisiṛie irerie: ”Ulya woose ankusurie airaa sonu ndi“.

¹²Amu wifo mwavanu wa yavanisa Vayuda na Vagiriki ndi. Amu ulya akee Nndumi wa woose ni uu muni da, mmuni wa wavi lufile valya woose vakee intereva.

¹³Amu ulya woose aindiaa irina lya Nndumi akiaa.

¹⁴Kyasia vamakii ivvaanga are ito vatankusurie? Lingi vankusuraa are ito kitaare vamfikio̱ mmboni tamwi? Lingi vamwaranyaa are kitaare veefo vakwanisa?

¹⁵Lingi vakwanisaa are kitaare varumwa? Sheeli kyatisiṛwa: ”Lleń te marende a iwo vakee ikwanisa nrumi shisha sheeli asenye!“

¹⁶Kake wwoose vandeiriwa nrumi yo ya ifura ndi. Amu Yesaya anumbua: ”Nndumi, ni i andekusura mboni teru?“

¹⁷Kyasia ikusura likee yantwa nnrumi, kake nrumi ikee ikwaniswa ikuwarie na kirero kya Kristo.

¹⁸Kake nanumbua: A le wo vandeita nrumi se? Ee tu vamiita. Amu kitisiṛie: ”Ununga lwawo lwankwana isangeń koose, na firero fawo fankwana kumande mbaai ya isanga“.

¹⁹Kake nanumbua: A le Isiraeli indemanya se? Ee tu. Amu mMose anumbua: ”Mmukangiaa iriso kwa vandu vatawore uṛiti, kwa uṛiti lutawore imanya mmukuriaa ituṛuka“.

²⁰Na Yesaya kakukaarisa karera: ”Nankooywa vvalya kitaare vanshiṛuya. Nallolikia valya kitaare vanshuuṛia.“

²¹Kake kya Isiraeli anumbua: ”Nkonu woose niikee isaaṛia vandu maako akwa vatashiirikie vakava veemeri“.