Read MMA SHIYYA Barua ya Varome 11 Bible Online

Barua ya Varome 11 - MMA SHIYYA bible

Barua ya Varome 11

¹Kyasia nkee yuṛa: A le Iṛuva amuumbutia vandu vamwi kwaasha? Wode! Amu niń nań nkee Mwisiraeli umwi wa kishuku kya Abraamu, mmilie ufwariń lwa kwa Benyamin.

²Iniva amuumbutia vandu vamwi kwaasha iwo andevasaua kuuka mbele ndi. Ana nta mwishi filya farerwa mmitisiṛie fa Elia se, ili andeṛiinga Isiraeli mbele ya Iṛuva eenumbuaa:

³”Nndumi, vawwaa vaauya vafo vakaburua firaa fa kirasio kyafo, nań nniń shi muni da niifo, nawo vakee iṛuya muu wakwa“.

⁴Kake yaṛua lya Iṛuva likee imwia are?: ”Nantia-fo vaseṛo fiku mfungare vataare vandetereva Baali“.

⁵Kyasia na alli nkuri kyeeri ki kya alli: Veefo vasaiye vandesaulwa kwa shia ya uwoo lwa Iṛuva.

⁶Kake kwakooya nshia ya uwoo, ikivaa shia ya mitanie ya nndu lingi ndi. Kwakooya kitaare nkuro, uwoo lukivaa uwoo ndi.

⁷Kyasia kyavaań are? Kilya Isiraeli iikee ikiṛuya nta ikikooya. Kake valya vandesaulwa vandekikooya. Na valya vengi vakaumiswa ngoo tawo.

⁸Sheeli kikee kitisiṛe: ”Iṛuva avaniinga nrima wa ruo sheemeri na miso awo nta atalolie na marwi nta ataite kumande nkonu uu wa nnu“.

⁹Na Davidi anumbua: ”Firembo fawo fivavie mfwaanri na nreyo na kindo kya ivabaaya na mitaiye kwawo.

¹⁰Miso awo araywa ni llema, amu atalolie. Kuvalemi mingo yawo mikonu yoose“.

¹¹Kyasia nanumbua: A le vandekaba kumande vawa kutu? Wode! Kake kiimba kya irekio̱ lyawo ikia lyanshea vayavaṛumu, nawo veni vavairie iriso vakooye isalala.

¹²Kyasia kwakooya irekio̱ lyawo lyammaa iva usimba lwa isanga na yanguywa lyawo lyawa mboṛa ya vayavaṛumu, a le nkya mmwasi se isongova lyawo?

¹³Kake narera neeni muukie kwa vayavaṛumu. Kyasia kwa kiṛengo nkee nakyo nrumi wa vandu va vayavaṛumu naitikisa uṛundi lukee lwakwa

¹⁴niikutomarisaa wakangie vaire iriso iwo vakee va uṛiti lumwi nań na ikiṛa kiindi kyawo.

¹⁵Amu kwakooya ileeka lyawo lyeendee isanga witanu, a le iwario̱ lyawo livaa kiki kwakooya kitaare mmuu uṛukie vafuń?

¹⁶Kwakooya nkate ni nsongori, mfo kuro na uru. Na nrarii kwakooya ni nsongori, mfo kuro na maṛamba da.

¹⁷Kake kwakooya eefo maṛamba kiindi andefukywa na yutwa nawe kukee iṛamba lya nsenifu wa nsitoń kwaroongio̱ kiriń kilya, kwava iṛamba lya nri wa nsenifu wa nndeń na ikakama lyayo.

¹⁸Kyasia manya kutakuṅinise kiimba kya maṛamba wo. Ana kwakooya kukuṅinisaa, nta ni iwe kurie nri ndi, kake ni nri nto ukurie iwe.

¹⁹Eeba kunumbuaa: Maṛamba andeminywa, amu niń nroongio̱-wo.

²⁰Nkisha, wo andeminywa kiimba kya ilea ikusura lyawo, nawe kuselele-wo kwa finya ya ikusura lyafo. Manya kutakwishike, kake kulle ku muni!

²¹Amu kwakooya Iṛuva ataare anrea-fo maṛamba wo a mbooko, nawe nta akureaa-fo ndi.

²²Alli manya sheeli lwifo uwoo lwa Iṛuva na uvaave lwamwi! Kwa valya vandewa luvaa uvaave, kake kwafo luvaa uwoo kwakooya kukuwaraa na uwoo ilo. Kwakooya kitaare nkuro, iwe nawe kuminywaa.

²³Nawo kwakooya kitaare vakaa veekanaa ikusura, vawiiṛwaa na iroongio̱-fo, amu Iṛuva amakii ivaroongia-fo lingi.

²⁴Amu kwakooya iwe kwaminywa kwautwa ifo nriń wa nsenifu ukee wa nsitoń kuuka mbooko yayo kwanderoongio̱ kyaanya kya mbooko ifo nriń wa nsenifu ulya nsha, ni mmwasi se valya vakee veni mbooko varoongio̱o̱ lingi nriń wawo wa nsenifu wo veni?

²⁵Amu, vanavama, mfurie mutuṛe imanya lya kiṛisi iki ndi, amu mutakulolie sheeli muwore uṛango mu veni, fulya Vaisiraeli kyeenga vakee vaumu nrima kumande vayavaṛumu woose vamaa yatwa siṛiń ya Iṛuva.

²⁶Llyo na Vaisiraeli woose vakiṛwaa sheeli kyatisiṛwa: ”Nkiṛa ashaa auka Sion. Alakanisaa Yakobo na makasha amwi.

²⁷Na ii yyo mma yakwa nawo, ili nndevatiaa mareko awo“.

²⁸Kyasia kisumani na mboni ya nrumi shisha vawa fituva fa Iṛuva kiimba kyanu, kake kisumani na isaulwa lia vakee vakunde kiimba kya vaande yawo.

²⁹Amu wavi lwa Iṛuva loore numa ndi ana ivaanga lyamwi ndi.

³⁰Amu sheeli ini mwalea Iṛuva ilyo mbele, kake alli mwankooya ililio̱ kiimba kya ilea lyawo,

³¹mfo kuro na iwo valleye alli vakooye ililio̱ nawo, fulya ini mundekooya ililio̱.

³²Amu Iṛuva avafingia woose andu emwi kiimba kya illea, amu alilie woose.

³³A baa wiingi lwa usimba lwa Iṛuva na lwa uṛango lwamwi na lwa imanya lyamwi! Yumisia lyamwi likee iva imanya ndi na shia tamwi tivaa iṛuya ndi.

³⁴Fulya ni i ammanya makusaṛo a Nndumi ana ni i eekee wa kyama kyamwi?

³⁵Ana ni i ammuniinga kindo mbele, nae awiiṛio̱?

³⁶Fulya findo foose fuukie kwamwi fikakaariswa yye fikauya kwamwi. Aṅiniswa miṛeṛe na miṛeṛe! Amen.