Read MMA SHIYYA Barua ya Varome 12 Bible Online

Barua ya Varome 12 - MMA SHIYYA bible

Barua ya Varome 12

¹Muṛe vanavama, ini mukee vandu vallilio̱ ni Iṛuva. Nkyo kiimba namwikimba: Muniingie mivili yanu ive nsimbika nsongovisi uwore muu wa isenya Iṛuva, kuro llyo iṛundia Iṛuva na imwindia na uṛango usha.

²Manya mutakuvakanise na mikae ya isanga li, kake mwilashike muniingwa ngoo shiiya, amu mumanye kilya kikundio̱ ni Iṛuva, nkilya kikee kinuru na kilya kisenyaa na ikyo kisongori.

³Kiimba kya wavi lwakwa nndeniingwa nkee yongoya nndu woose wanu, kaaṛa atakusaṛe kinini kikilie ikyo kyawara ikusaṛa, aware kyamwi kiiṅaṅani nae, na nndu woose nsheeli Iṛuva amwavie kya mwina wamwi wa ikusura Iṛuva.

⁴Amu mfo kuro da: sheeli toore meeṛo meengi kari ka vvili umwi, kake meeṛo woose awore mashoṛa emwi ndi,

⁵mfo kuro neese tikee veengi, kake tikee vvili umwi, fulya tikee va Kristo. Neese ti woose tikee meeṛo emwi oo nndu na ungi.

⁶Lingi tanniingwa wavi wiingi, nndu woose awore lwamwi sheeli amaavio̱. Ulya akee mwauya aauye kisumani na ikusura lyamwi lya ikusura Iṛuva.

⁷Ulya akee iṛundia vengi kyawara aṛunde dede. Ulya akee llosha aware ulosha lwamwi.

⁸Na ulya akee iikimba akaa wikimbiń lwamwi. Ulya akee yavia kyawara ateleke. Ulya akee mushilia kyawara aawutie. Ulya akee yelekia vengi kyawara atane kuri na ifura.

⁹Manya ikunda litave lya wongo! Sueń filya fikee fikasha mukakuwara na filya fikee finuru!

¹⁰Mukundani na ngoo sha vana va nka, lingi mwelekiani na ikwiria sonu ini mu veni na mu veni!

¹¹Mutauye na numa alya kyawara veni finya! Ngoo tanu taake ili mwiṛundiaa Nndumi!

¹²Fureń nnu, fulya mwishi kilya muveree! Sisirień ngatareń! Engeṛień itereva Iṛuva!

¹³Kutomariseń isaṅiṛia nsimbika wa yeleka vasongori! Warień veeni liteefo iṅuṅura!

¹⁴Niingeń valya vakee imuumbuta mboṛa! Kya dede vaniingeń mboṛa manya mutavairare!

¹⁵Fureń andu emwi na valya vawore ifura! Iyeń andu emwi na valya vakee iiya!

¹⁶Ngoo tanu toose kyawara tive kimwi! Manya mutakwareesie filya fikee firoo, kake kuwaraniń na valya vannya! Manya mutakumanyi mu veni sheeli mukee vaṛango!

¹⁷Manya mutataa nndu kikasha na kikasha! Oruseń useli lwanu mbele ya miso a vandu woose!

¹⁸Veń na unambwe na vandu woose, kwakooya mumakii!

¹⁹Manya mutauṛe vengi kimini, muṛe vakunde vakwa, kake otoṛień Iṛuva mwaanya aumisie ye muni, fulya kikee kitisiṛe: ”Nndumi anumbua: Yuṛa kimini mmashoṛa akwa, nniń ntaa sile“.

²⁰Kake kituva kyafo kikawarwa nsoto kukiwuuruse, kikawarwa nnyura kukiniinge kya inwa. Kwakooya kwatana kuri, kwaitiṛimu makaa a muro nrweń wamwi.

²¹Manya kutavingwa mfikasha, kake kuvinge fikasha na finuru!