Read MMA SHIYYA Barua ya Varome 13 Bible Online

Barua ya Varome 13 - MMA SHIYYA bible

Barua ya Varome 13

¹Nndu woose aindie ushili, amu lwifo ushili lutaukie kwa Iṛuva ndi, na ilo lwifo lwanrawa-fo ni Iṛuva.

²Kwa ikyo ulya akee ilea ito awore ushili akee ivingana na ivavaso lya Iṛuva. Na iwo vakee ivingana vakukuriaa mwaandu wo veni.

³Amu valya veetoṛio vanaiye vandu kiimba kya itana finuru ndi, kake nkiimba kya mitanie mikasha. Kyasia kufurie ilea ulya awore ushili? Tana fisha, nawe kukooyaa tikisi kwamwi.

⁴Fulya ye ni ndundi wa Iṛuva wa ikuṛundia iwe kiimba kya finuru. Kake kwantana fikasha eṛea, amu awore shombo kya ruu ndi. Amu ni ndundi wa Iṛuva ataa kwa uvaave ulya akee itana fikasha.

⁵Kwa ikyo kyakuwara imwindia nta nkiimba kya uvaave da ndi, kake nkiimba kya nrima wiliswa.

⁶Kiimba kya ikyo mukee iniingia kyaalo, amu wo vvaṛundi va Iṛuva vakee iṛunda mashoṛa wo meni da.

⁷Niingeń woose kilya kisumani nawo, wa kyaalo nniingeń kyaalo kyamwi, ulya kyawara aeṛewa mweṛeeń, ulya asumani na tikisi mwitikiseń!

⁸Manya mutave vasile va vandu na kava i. Sile mukaa nayo ni ikundana mu veni na mu veni, amu ulya akundie uroe wamwi amaawutia mavavaso.

⁹Amu mavavaso iva: Kutaaike, kutawaa, kutaive, kutafingie, kutalange na kwakooya liifo ivavaso lingi lyoose ansandio̱ na kirero ki sheeli: Kunda nkyungu wafo sheeli kukukundie ku muni.

¹⁰Ikunda litaniaa nkyungu kikasha ndi. Amu ikunda llyo likee yawutia mavavaso.

¹¹Mavavaso va woose irikień, fulya mwishi kyeeri kya alli: Kyeeri kyantishea kya yokia ruoń, amu ikiṛwa lyeru likee kufui kita lia tibooka ikusura Iṛuva.

¹²Kio kikee isia, nkufui kukye. Kyasia tiiwukane na mitanie ya llema na iwara fiya fa ivinga llema.

¹³Tikaa na useli sha vandu vakee yenda nsanyiń. Nta luteefo ulafu ana inangwa, nta luteefo waaisi ana uravi, nta iteefo myaandu ana ureeree!

¹⁴Kake mukulunganise kutu na Nndumi Yesu Kristo, nta mutaishivise mivili yanu milangie mikasha!