Read MMA SHIYYA Barua ya Varome 14 Bible Online

Barua ya Varome 14 - MMA SHIYYA bible

Barua ya Varome 14

¹Ulya akee wa ikusura yaangu wwarień, manya mutaumisie makusaṛo amwi.

²Ulya umwi akusurie sheeli foose filiwaa, na ungi akee ntanyari akuliyaa nyań da.

³Ulya akee ilya foose manya atabiṛe ulya atakee ilya foose ndi. Na ulya atakee ilya foose manya ataumisie ulya akee ilya foose ndi. Amu Iṛuva ammuwaria nae.

⁴Eewe ni iwe i kuumisiaa iketi lya ungi? Kwakooya aselele ana awa, foose akee iṛundia nndumi wamwi da. Kake aseṛeeswaa, amu nndumi amakii imwimboo.

⁵Nndu umwi akee isaua mikonu kiindi kari ka mikonu kaiindia, ungi akee iindia mikonu yoose. Kilya nndu allolia ifo nrimiń wamwi atanie utomari ikilatia.

⁶Ulya akee iindia mikonu aindia Nndumi nayo. Ulya akee ilya foose afiliya Nndumi, amu akee yaana Iṛuva. Na ulya atakee ilya foose atania Nndumi, nae akee yaana Iṛuva.

⁷Amu eefo nndu kari keru akuwaria muu wamwi ye muni ndi ana eefo akufiya kwa miimu yamwi ndi.

⁸Kyeeri tikee na muu ni Nndumi tikee indundia nato. Kyeeri tikee ifwa ni Nndumi tikee imfiya. Kyasia tikakaa na muu ana tikafwa ise tikee va Nndumi.

⁹Amu kwa ikyo nkyo Kristo afiya na iva lingi na muu, amu ashilie vafu na veefo na muu.

¹⁰Kake iwe naare? Nkiki ili kukee yumisia mwanamae wafo? Ana iwe naare? Nkiki ili kwilie mwanamae wafo? Amu ise ti woose tisalalaa mbele ya kifumbi kya uumisio kya Iṛuva.

¹¹Amu nkitisiṛe: ”Nndumi arera: Niń nkee na muu, nri toose tikufwiṛiaa mbele yakwa na ngyulumi toose tirambuaa Iṛuva”.

¹²Kyasia nkuro, nndu woose weru asalaliaa kyamwi ye muni kisanguń kya Iṛuva.

¹³Kyasia manya titaengeṛie yumisiana, kake nkisha nndu akwime eetanaa kindo kya iteveta mwanamae ana kya intuula.

¹⁴Niishi, lingi nammanyiswa ni Nndumi Yesu sheeli kiifo kindo kiwore teve kwa kimia kyayo ndi. Kake ito ye alolie sheeli kindo nkikasha, kwamwi ye kindo kyo nkikasha.

¹⁵Na mwanamae wafo kankooya unari kiimba kya shoonga yafo, kwallakana na ikunda. Kiimba kya shoonga yafo manya kutakasheese nndu ulya ye Kristo andemfiya.

¹⁶Kyasia usha lo lwanu lwa kwa Iṛuva manya lutarumwa vvandu.

¹⁷Amu umangi lwa Iṛuva mmiliye ana minuiye ndi, kake ni usumani na unambwe na ifura fikee iniingwa mMumuyo Nsongori.

¹⁸Amu ulya akee iṛundia Kristo na findo fo akee isenya Iṛuva, lingi airikio̱o̱ vvandu.

¹⁹Kyasia kwakooya nkuro tilatie findo finnde unambwe na findo feelekiaa ilungana ti veni na ti veni.

²⁰Kiimba kya shoonga manya ikasheesa mashoṛa a Iṛuva! Dede foose mfisha, kake kwa nndu ulya alyaa kindo kinniingaa inunua kwamwi ye nkikasha.

²¹Nkisha ilea ilya nyama ana inwa wari ana itana kindo kyoose kilya kitevetaa mwanamae wafo.

²²Ikusura lyo kukee nalyo va nalyo imanyeń lyafo mbele ya Iṛuva! Wwa ngoma nndu ulya atakuumisiaa ye muni imanyeń lyamwi kya kindo kilya eenkiirikiaa.

²³Kake ulya alyaa akee na inunua amuumisio̱ sheeli awore ilomi, fulya alya liteefo ikusura. Na uṛundi loose lutawore ikusura ni ireko.