Read MMA SHIYYA Barua ya Varome 15 Bible Online

Barua ya Varome 15 - MMA SHIYYA bible

Barua ya Varome 15

¹Kyasia ise tiwore finya kyatiwara tikurike utanyari lwa iwo vatawore finya, ana kisenye tikushiise ti veni ndi.

²Nndu woose kari keru kyawara asenye nkyungu wamwi na kilya kikee kisha asongovike.

³Amu na Kristo akushiisa ye muni ndi, kake nsheeli kyatisiṛwa: ”Irera lyawo vandekurera iwe nniń lindeshishea“.

⁴Amu foose fatisiṛwa mbele fatisiṛwa, amu fitiloshe ise, amu timakii ikuwara na iverea lyeru na isisiria tiiwiiṛio̱o̱ muu mmitisiṛie ilya.

⁵Na Iṛuva muniinga vandu isisiria na muwolisa mirima ya vandu amuniinge mikae imwi nsi ya ikusaṛa mikae imwi mu veni na mu veni, sheeli kyawara valya vakee va Kristo Yesu,

⁶amu mwitikise Iṛuva Nde wa Nndumi weru Yesu Kristo kwa nrima umwi na kana kemwi.

⁷Kwa ikyo mukuwarie sheeli na Kristo andetiwaria ise, amu Iṛuva eetikiswa!

⁸Amu nanumbua: Kristo andeva muṛundia valya vakee varini, amu amanyise sheeli Iṛuva wwa udede na firekio filya finderekio̱ vaande yeru afikaarise.

⁹Lingi nkee inumbua: Vayavaṛumu vaitikise Iṛuva kiimba kya ililia lyamwi lya ivalilia, sheeli kyatisiṛwa: ”Kwa ikyo nkuṅinsisaa ifo kwa vayavaṛumu, na irina lyafo lliimbiaa“.

¹⁰Na lingi kikee kitisiṛe: ”Kyeseń ini vayavaṛumu andu emwi na vandu vamwi“.

¹¹”Niniseń Nndumi ini vayavaṛumu mu woose na ngyufwari toose ta vandu timwitikise“!

¹²Lingi Yesaya anumbua: ”Ufwariń lwa Isai aukaa-fo ulya ashiliaa vayavaṛumu, ito yye vayavaṛumu vawereaa“.

¹³Nae Iṛuva uu muweree amwishuṛie ifura ini mu woose na unambwe fuukie ikusureń, na iverea lyanu lyengeṛio̱ finya mMumuyo Nsongori.

¹⁴Vanavamae vakwa, nkusurie deń sheeli ini neeni mwamiishuṛwa usha mukaishuṛwa uṛango loose, lingi mumakii ikwikimba mu veni.

¹⁵Kake namutisiṛia niireraa na baa, amu mmukumburuse sheeli Iṛuva andeshiavia ililia lyamwi,

¹⁶amu vve ndundi wa Kristo Yesu kwa vandu va masanga. Nkyo kyashiwara neende ikwanisia nrumi ya ifura ya Iṛuva, amu vayavaṛumu vave nsimbika wa kirasio usenyie Iṛuva ukee mwilise mMumuyo Nsongori.

¹⁷Nkyo kiteveto nakuṅinisa kiimba kya mashoṛa iva akwa a iṛundia Iṛuva niikuvavaa na Kristo Yesu.

¹⁸Amu nta nkaṛiaa irera kindo kitaare nkilya Kristo andekitana eeshirwaa mashoṛeń wo neeleke vayavaṛumu kwa irera na kwa itana vakooye windi lwa iindia Iṛuva.

¹⁹Nakyo kikava na finya ya myorusie na maṛiikiso nndeiavio̱ mMumuyo Nsongori. Kwa shia ii nammaa ikwanisa nrumi shisha ya Iṛuva niibookaa Yerusalemu na miyanuń yayo nafika kumande Iliriko,

²⁰niikaarisaa ikwanisa nrumi ii nta io kwikee wwo irina lya Kristo lyeemmaa isendwa, ntashe iṛundia kundo ungi akee iṛundia ana ntave sha nndu atania numba kwa ule ya mfulo wa nndu ungi.

²¹Kake nnde-soṛa kirero kilya kya mitisiṛie: ”Valya kitaare vankwanisio̱ mboni tamwi valloliaa, na valya vatandeita kyamwi vammanyaa“.

²²Nkyo kiimba naimwa keengi niifikaa kwanu.

²³Kake alli nkiwore mwaanya ngyurukeń tilya lingi ndi, kake kuuka myaka miingi noore ilanga isha kwanu.

²⁴Ili niimboo kyaaṛo kyakwa kya yenda urukeń lua lwa Hisipania, noore ba kundo nkwiriaa kwanu nkwanie neeni. Nammaa ifurana neeni, nkooye vandu vanu vashiimiaa, ili llungaa kyaaṛo na kulya.

²⁵Kake alli nkee yenda Yerusalemu ndundie-fo Vakristo valya.

²⁶Amu kyasenya vandu va Makedonia na Akaya isaṅiṛia masaa a yeleka vakiva valya kari ka vasongori va ifo Yerusalemu.

²⁷Ee kyawasenya, lingi vawa vasile vawo. Amu kwakooya vayavaṛumu vawwaria masaa awo aukie kwa Mumuyo, kyavawara ivaṛundia na akwaa mfindo fawo fa vvili.

²⁸Kyasia nammaa imarisia ishoṛa lyo niivaniingiaa masaa iwo na yamanya, niiraa kwanu neende Hisipania.

²⁹Nań niishi sheeli nansha kwanu nshaa nrie fisha foose Kristo atiniingie.

³⁰Vanavamae vakwa, namutereva na Nndumi weru Yesu Kristo na ikunda lya Mumuyo, kutomariseń andu emwi nań ifo fiterewoń fanu kwa kiimba kyakwa mbele ya Iṛuva,

³¹amu nkiṛwa kwa iwo vatakusurie vakee ifo Yudaya. Na lingi uṛundi lwakwa nkee nalo ifo Yerusalemu lwirikio̱ wasongori valya,

³²amu mmakii ifika kwanu na ifura kwakooya Iṛuva akundie, nkooye iwiiṛio̱ muu andu emwi neeni.

³³Iṛuva muni unambwe ave andu emwi neeni mu woose. Amen.