Read MMA SHIYYA Barua ya Varome 16 Bible Online

Barua ya Varome 16 - MMA SHIYYA bible

Barua ya Varome 16

¹Nkee imurambikia Foibe akee mfwamae weru akee iṛundia siṛi ya Kenkirea.

²Wwarień mukee va Nndumi sheeli kisumani na vasongori. Lingi mwelekień findoń foose filya auṛi kwanu, amu ave mwelekia veengi kasheelikia nań.

³Shiisanień Pirisika na Akwila vakee vaṛundi andu emwi nań vakusandie na Kristo Yesu.

⁴Vakuniingia wo veeretaa sungo tawo kiimba kya muu wakwa. Ana nta nniń shi muni nkee ivaana ndi, na akwaa nsiṛi ta masanga toose. Shiisanień na siṛi yo ya numba yawo.

⁵Shiisanień na nkunde wakwa Epaineto akee yye andebooka yaṛukia Kristo ifo Asia.

⁶Shiisanień Maria andetikwareesia nnu kiimba kyanu.

⁷Shiisanień Andironiko na Yunia vafwari vakwa vandefingwa andu emwi nań, vakee vandu va nrwe kari ka varumi. Nawo wwo vabooka iva va Kristo kita niń.

⁸Shiisanień Ampiliato nkunde wakwa kari ka Nndumi.

⁹Shiisanień Urubano ndundi wa mashoṛa andu emwi nań kari ka Kristo na Sitakisi nkunde wakwa.

¹⁰Shiisanień na Apele akee nndu nkristo nsaari. Shiisanień valya va kyeń kwa Aristobulo.

¹¹Shiisanień Erodion mfwari wakwa. Shiisanień vandu va numba ya Narikiso vakee va Nndumi.

¹²Shiisanień Tirifaina na Tirifosa vakee vakwataria Nndumi. Shiisanień Perisi nkunde andekwareesia Nndumi.

¹³Shiisanień Rufo akee nsauye Ndumi na akwaa yyeyo wamwi akee na yeyo wakwa.

¹⁴Shiisanień Asinikirito na Filegon na Erime na Patiroba na Erima na vanavamae vakee andu emwi nawo.

¹⁵Shiisanień Filologo na Yulia na Nereu na mfwamae na Olimpa na vasongori woose vakee andu emwi nawo.

¹⁶Kwisaniń ini mu veni na mu veni mwikwongaa miimo isongori. Na siṛi toose ta Kristo tamwisana.

¹⁷Muṛe vanavama, namwikimba mulle valya vawore myaandu na findo fa iteveta fa ifuluta miloshie ilya mwankulosha. Iwukaniń nawo!

¹⁸Amu iwo vakee kuro vaṛundiaa Nndumi weru Kristo ndi, kake vaṛundiaa ndewu tawo wo veni vakalemba ngoo ta vandu vasaari kyumu na firero fooṛoṛo na fa ikushiisa.

¹⁹Amu iirikia lyanu lyamfikia vandu woose. Nkyo nkee isenywa kiimba kyanu, kake mfurie muve vaṛango kya filya fikee fisha na iva vatondo kya filya fikee fikasha.

²⁰Nae Iṛuva muni unambwe avariavariaa Satana kwa si ya marende anu ree. Uwoo lwa Nndumi weru Yesu Kristo lukaa neeni! Amen.

²¹Timoteo ndundi wa mashoṛa andu emwi nań amwisana, mfo kuro na Lukio na Yason na Sosipatiro vakee va ufwari lwakwa.

²²Nniń Teritio natisiṛa barua ii namwisana kari ka Nndumi.

²³Gayo ulya akee itiwaria na siṛi yoose sha veeni vamwi amwisana. Erasto akee mulla wa muṛi vamwisana na Kwarito mwanamae weru.

²⁴Uwoo lwa Nndumi weru Yesu Kristo lukaa neeni mu woose! Amen.

²⁵Iṛuva yye awore finya ya imukaarisa ikusureń lyanu ili lisumani na nrumi ya ifura ya ikwanisa Yesu Kristo, sheeli niń nkee iikwanisa, likasumana na irambulwa lya kiṛisi kilya kiikee kifise kuuka kala.

²⁶Kake kyeeri kya alli ikarambulwa kikamanyiswa kwa vandu va ngyuruka toose na mitisiṛie ya vaauya, sheeli Iṛuva wa miṛeṛe andevavasa, amu vakooye inkusura na imwirikia.

²⁷Iṛuva uu akee ndango kyaanya kyamwi unini luwie kari ka Yesu Kristo kyeeri kilungani! Amen.