Read MMA SHIYYA Barua ya Varome 5 Bible Online

Barua ya Varome 5 - MMA SHIYYA bible

Barua ya Varome 5

¹Kyasia ili tansumaniswa kiimba kya ikusura Iṛuva, toore witanu na Iṛuva. Na ulya atiitanisa na Iṛuva ni Nndumi weru Yesu Kristo.

²Na kiimba kya inkusura ye tanruywa shia ya ikooya wavi lu tikiwore. Na alli tikee ikuṅinisa kiimba kya iverea unini lu Iṛuva atiniingaa.

³Kake ni iki da ndi, na akwaa ni ngyukiveń teru tikee ikuṅinisa da, fulya tiishi sheeli ngatara nto timanyisaa isisira lya nndu.

⁴Na isisira fikannde warutu ngooń, na warutu lukannde iverea isha.

⁵Na iverea fi litilembaa ndi, fulya ikunda lya Iṛuva linderawa ngooń teru mMumuyo Nsongori uu tindenniingwa.

⁶Amu lia ise tikee vatanyari va mirima Ilyo Yesu ashe kashetifiya ise vandu tibiṛie Iṛuva.

⁷Vanduń eefo nndu amakii ifiya ungi na kasumanika are ndi. Kya nndu akee nsha eeba nndu akanaa inkumbia muu.

⁸Kake ikunda lya Iṛuva sheeli fikai lya itikunda ise lyalolika na baa lia Kristo atifiya ise tiikee varekwa.

⁹Alli naareń? Kwakooya usao lwamwi lwantiniinga usumani, tikiṛwaań yye se uumisio lutatikooye?

¹⁰Amu lia tikee kwaasha na Iṛuva llyo Mwana wamwi ashetiitanisa na Iṛuva na ufu lwamwi. Alliń tintaulwa tikiṛwaań se kyeeri kyoose mfinya ii ya muu wamwi?

¹¹Kake nta nkyo kyeni kitiniingie ifura da ndi, tiwore ifura lya iitikisa Iṛuva tikuvavie na Nndumui weru Yesu Kristo, fulya yye antiniinga witanu alli.

¹²Amu nkuri: Mareko andenndwa isangeń ni nndu umwi, na ufu lukanndwa mmareko, na ufu lukashea vandu woose, amu vanderekio̱ woose.

¹³Amu kitaare liifo ivavaso, ireko liifo isangeń. Kake ireko litaalikie alya ivavaso liteefo ndi.

¹⁴Kake ufu lundeitoṛo kuuka Adamu kumande Mose, nalo lundeitoṛo na akwaa ni iwo kitaare veentanaa ireko livakani na lya Adamu. Nae avakani na ito akaa ashe.

¹⁵Kake wavi lua lundeva sha ireko lia ndi. Amu kwankooya nkiimba kya ulya umwi veengi vandefwa, ni mmwasi nnu ililia lya Iṛuva na wavi lwa ililia lindenndwa ni ulya umwi Yesu Kristo lindekiṛa valya veengi.

¹⁶Ana kiṛengo kya nndu ulya umwi andetana ireko nta sha kiṛengo kya miniingie ilya ndi. Amu uumisio lwashe kwa shia ya nndu ulya umwi lukannde kivawwo, kake miniingie ya ililia yashe kiimba kya mareko ikannde itaalio̱ usumani.

¹⁷Amu kwakooya kwa irekio̱ lya nndu ulya umwi ufu lundeitoṛo kiimba kya ulya umwi, ni mmwasi iwo vakee iwaria wiingi lwa ililia na miniingie ilya ya usumani veetoṛoo ifo muuń utakisiaa vakuwore na ulya umwi yye Yesu Kristo.

¹⁸Kyasia lingi: Sheeli ireko limwi lindeendee vandu woose uumisio lwa kivawwo, mfo kuro uṛundi lumwi lwa usumani lundevia vandu woose usumani luwore muu.

¹⁹Amu sheeli ubeeṛe lwa nndu ulya umwi lundeaṛua valya veengi vaya mareko, mfo kuro windi lwa ulya umwi luaṛuaa valya veengi vaya usumani.

²⁰Kake ivavaso lindeaka, amu ireko lia live inini nnu. Kake alya ireko lindeṅina wwo ililia likava iingi kya mmwasi.

²¹Amu sheeli ireko lindeitoṛo fikannde ufu, mfo kuro kwa shia ya usumani ililia liitoṛo kumande muuń wa miṛeṛe lindenndwa ni Yesu Kristo Nndumi weru.