Read MMA SHIYYA Barua ya Varome 6 Bible Online

Barua ya Varome 6 - MMA SHIYYA bible

Barua ya Varome 6

¹Kyasia alli tikarerań are? Tikakaań marekoń, amu ililia five iingi mmwasi?

²Wode! Ise tamfiya mareko tikuwaraań are fingi na mareko?

³Mwishi se sheeli ise tabatisio̱ Kristo Yesu tikee vabatisie ufu lwamwi?

⁴Kyasia taṛikwa andu emwi nae ufuń lwamwi kwa shia ya ubatiso, amu sheeli Kristo anderetwa kwa vafu kwa shia ya unini lwa Ndee, mfo kuro neese tiṛue tirie muu mwiya.

⁵Amu sheeli tindelungio̱ ufu lua lwamwi, mfo kuro na ireka lyamwi tililimgio̱o̱

⁶tiimanyaa sheeli unndu lweru lwa mbele lwakabio̱ nsalabeń andu emwi nae, amu vvili uwore mareko ukasheeswa utakiṛundie fingi mareko.

⁷Amu ito andefwa ammaa yutwa marekoń atakinshilie.

⁸Kake kwakooya tafwe andu emwi na Kristo, tikusurie deń sheeli tivaa na muu andu emwi nae.

⁹Tikamanya sheeli Kristo ammaa iṛuka kwa vafu akifwaa lingi ndi, ana ufu lukinshiliaa lingi ndi.

¹⁰Amu ufu lua andefwa andefiya ireko limwi nsi, kake muu wamwi nto muu wa iṛundia Iṛuva.

¹¹Mfo kuro ini neeni kutaalień sheeli mukee vandu vawia mareko vafu, na muu wanu muwore ṛundień nato Iṛuva mwikuvavaa na Kristo Yesu Nndumi weru.

¹²Kyasia manya ireko litakishilie kari ka mivili yanu ivee na ufu mwiirikiaa ilanga lyayo.

¹³Ana manya mutaengeṛie iniingia meeṛo anu ave fiya fa iṛundia mareko. Kake kuniingień mu veni Iṛuva sha vandu vautwa ufuń vakaniingwa muu, na meeṛo anu avie Iṛuva fiya fa usumani.

¹⁴Llyo mareko akimwitoṛoo ndi, amu mukee kwa si ya mavavaso ndi, kake nkwa si ya ililia.

¹⁵Kyasia alli naare? Tikatana mareko, fulya titakee kwa si ya mavavaso tikakaa kwa si ya ililia? Wode!

¹⁶Mwishi se kasa kikai? Kwakooya mwakuaṛua maketi a iirikia nndu, mwawa maketi a ulya mumwirikiaa kive kya uketi lwa mareko lunndee ufu, kive kya uketi lwa windi lunndee usumani.

¹⁷Kake Iṛuva aanwa, ili mwikee mbele maketi a mareko da, kake alli mukee iindia na ngoo tanu mifundie ilya mwamfundwa ikee iyo munderawa kwa si yayo ni Iṛuva.

¹⁸Neeli mundemaa itaulwa uketiń lwa mareko mukava maketi a iṛundia usumani.

¹⁹Narera kwa mikae ya kivandu kiimba kya utanyari lwa mivili yanu. Amu sheeli mwaniingia meeṛo anu akava masinga a itana fa kiṛinda na fa ureti, mfo kuroń na alli niingień meeṛo anu ave masinga a usumani mukooye iiliswa!

²⁰Amu lia mukee masinga a mareko, llyo mwikee vandu vakufile wo veni, vakufukiye na usumani.

²¹Kyasiań kyeeri kyo wwavi ki mwakooya? Alli fimwendie usutu, amu findo fo mbusha yayo ni ufu.

²²Kake alli mwantaulwa ifo usingeń lwa mareko mukava masinga a Iṛuva na mbusha yanu muwore ni iiliswa na numa muu wa miṛeṛe.

²³Amu maṛe a mareko ni ufu, kake wavi lwa Iṛuva mmuu wa miṛeṛe wanndwa ni Yesu Kristo Nndumi weru.