Read MMA SHIYYA Barua ya Vakorinto ya mbele 10 Bible Online

Barua ya Vakorinto ya mbele 10 - MMA SHIYYA bible

Barua ya Vakorinto ya mbele 10

¹Vanavama, mfurie manya mutarekio̱ ndi sheeli vaande yeru veekee kwa si ya iṛumbe lia woose vakaira nruveń woose.

²Woose vakabatisio̱ Mose ifo iṛumbeń na ifo nruveń.

³Woose vakalya shoonga imwi iikee ya Mumuyo.

⁴Woose vakanwa minuiye imwi iikee ya Mumuyo, amu vandenuiya veeutaa mbambeń wa Mumuyo uriani nawo. Na mbamba ulya wikee Kristo.

⁵Kake veengi kari kawo Iṛuva andesenywa wwo ndi, amu vandemamisio̱ ṅṅaloń.

⁶Kyasia mboni to tave wikimbi kweru, amu ise titave vandu va ilanga fikasha sheeli valya nawo vandeva na milangie.

⁷Ana manya mutave varasia maṛuva a wongo sheeli vengi va iwo veekee. Amu kyatisiṛwa: ”Vandu vakaa rembo veelyaa na inwa, numa vakakwimboo vatavani“.

⁸Ana manya titave vaaisi sheeli valya vawo vandetana vakawalwa nkonu umwi vandu fiku makumi avili na firaru.

⁹Ana manya titeelelie Nndumi sheeli vengi vawo vandemwelelia vakaretwa nshoka.

¹⁰Ana manya mutaṅuṅure sheeli vengi vawo vandeṅuṅura vakaretwa nNreta.

¹¹Kyasia ifi foose findevavia kwa myorusie fikatisiṛwa, amu fitiikimbe ise teemfikio̱o̱ ni mmando wa feeri.

¹²Kwa ikyo ulya akusaṛie aselele akulle atawe.

¹³Nta mwankooya kyelelio kikilie finya tanu ndi kita kilya kikee kya mwina wa kinndu. Kake Iṛuva wwa usuro amutiaa mukooye kyelelio kikilie finya tanu ndi. Kake andu emwi na kyelelio kilya mwelelio̱o̱ aorusaa na mwaango wa isomuka, amu mumakii isisiria.

¹⁴Kiimba kya ikyo, vakunde vakwa, risheń windi lwa iindia maṛuva a wongo.

¹⁵Narera neeni fulya mukee vandu muwore uṛango. Kusaṛień kilya nkee irera.

¹⁶Umbata lua lwa mboṛa tiluniingaa mboṛa ni itaṅaṛia se usao lwa Kristo? Nkate ulya tikee yufukyafukya ni itaṅaṛia se vvili wa Kristo?

¹⁷Fulya nkate ukee umwi, neese tikee veengi tikee vvili umwi, amu ise ti woose tikee yavio̱ nkate ulya umwi.

¹⁸Lleń Vaisiraeli wo kasa vakai. Valya vakee ilya nyama tilya ta kirasio vawore se ilungana na kiraa kya kirasio?

¹⁹A narerań are? Narera sheeli kiraso kya irasia maṛuva a wongo nkindo? Ana narera sheeli Iṛuva lya wongo nkindo?

²⁰Nkuro ndi. Kake filya vayavaṛumu vakee irasa vakee ifirasia masatana, nta Iṛuva ndi. Kake niń mfurie mukulunganise na masatana ndi.

²¹Nta mumakii inuiyana umbata lwa Nndumi na lwa masatana ndi. Nta mumakii ilyana kiraań kya Nndumi na kya masatana ndi.

²²Ana mufurie ikangia Nndumi atuṛuke? A ise toore finya kita ye?

²³Mwanumbua: ”Findo foose fikee fisha toore muumu wa ikuṛu-ndia nafo“. Ee, kake mfindo foose feelekaa ndi. Mwanumbua: ”Findo foose fikee fisha toore muumu wa ikuṛundia nafo“. Ee, kake mfoose fisongosiaa ndi.

²⁴Manya nndu atakuṛuiye mbusha yamwi muni, kyawara aṛuye filya fikee yeleka uroe wamwi.

²⁵Findo foose fikee ikumbwa singiṛeń fikee fa nyama kuliyeń kitaare mwauṛa kulya fuukie, amu mirima yanu italemwa.

²⁶Amu: ”Isanga li llya Nndumi na foose fiifo“.

²⁷Nndu ulya atakusurie Iṛuva kamuvaanga kwamwi neeni mukankunda yenda, kuliyeń kindo kyoose vamurwaya liteefo yuṛa nkwi fuukie, amu mirima yanu italemwa.

²⁸Kake nndu kamuia: ”Ii nnyama ya kirasio“, manya mutale kiimba kya ito amumanyisa na kiimba kya mirima.

²⁹Nrima nkee yusenda wwafo iwe ndi, kake wwa ulya ungi. Nkiimba ki iboṛomulwa lyakwa lyumisio̱ ni nrima wa nndu ungi?

³⁰Kwakooya niń nkee ilya filya namaavio̱, nkee iteendwań are kiimba kya filya nawaria niaanaa Iṛuva?

³¹Kyasia ili mwilyaa ana mwinwaa ana mwitanaa kindo kyoose, taniń foose five fa iṅinisa Iṛuva.

³²Kulleń amu mutatevete Vayuda ana Vagiriki ana va siṛi ya Iṛuva,

³³mfo kuro sheeli niń nkee isenya vandu woose findoń foose, nta ikunda mbusha yakwa shi muni, kake mbusha ya iwo vakee veengi vakooye ikiṛwa.