Read MMA SHIYYA Barua ya Vakorinto ya mbele 12 Bible Online

Barua ya Vakorinto ya mbele 12 - MMA SHIYYA bible

Barua ya Vakorinto ya mbele 12

¹Kyasia vanavama, kiimba kya ngyuavi ta Mumuyo mfurie mulemwa imanya ndi.

²Mwishi sheeli mwikee vandu va vayavaṛumu na ilatia firasio fa findo fiteeshi irera.

³Kiimba kya ikyo namumanyisa sheeli eefo nta nndu areraa awarwa mMumuyo wa Iṛuva ndi anumbue: Yesu eerarwa. Ana nta eefo nndu amakii inumbua: Yesu ni Nndumi kitaare awarwa mMumuyo Nsongori ndi.

⁴Kiifo kiilasha kya ngyuavi ta Mumuyo, kake Mumuyo ni ulya muni da.

⁵Lingi kiifo kiilasha kya uṛundi, kake Nndumi ni umwi tubu.

⁶Kiifo kiilasha kya vaṛundi, kake Iṛuva ni ulya muni da aṛundaa mashoṛa kari ka woose.

⁷Kake nndu woose aavio̱ wavi lwamwi mMumuyo, amu aelekie vengi.

⁸Fulya nndu umwi akee iniingwa kirero kya uṛango mMumuyo, na ungi kirero kya waṛia, kake Mumuyo ni ulya muni da.

⁹Na ungi awore ikusura ifo Mumuyoń ulya muni da, na ungi mmwavie wavi lwa ikiṛa ifo Mumuyoń ulya muni da.

¹⁰Na ungi ni nniinge iṛunda fa maṛiikiso na ungi mmwauya na ungi mmwavanisa fa nrima na ungi ni nrera mirerie miini na ungi mmutambashua mirerie ilya.

¹¹Kake ifi foose fikee iṛundwa mMumuyo ulya muni da eeaviaa nndu woose sheeli akundie ye muni.

¹²Amu sheeli vvili wa nndu ukee umwi, nato uwore meeṛo mengi na meeṛo woose a vvili to nawo mmeengi, kake vvili ni umwi, mfo kuro na Kristo akai.

¹³Amu ise ti woose tindebatisio̱ vvili umwi mMumuyo umwi, kwakooya tikee Vayuda ana kwakooya tikee Vagiriki ana kwakooya tikee masinga ana tikee vabo-ṛomue. Neese toose tindeavio̱ Mumyo uu umwi.

¹⁴Amu na vvili wa nndu yyeeṛo Umwi ndi, kake mmeengi.

¹⁵Kifo urende lwinumbuaa: fulya niń ntakee uko, niń nkee wa vvili ndi. Naare? Llwa vvili se kiimba kya ikyo?

¹⁶Na kuri kifo kwinumbuaa: Fulya niń ntakee iriso, nkee wa vvili ndi. Naare? Nkwa vvili se kiimba kya ikyo?

¹⁷Kifo vvili woose wivaa iriso, a iita lyukaa kwi? Kifo vvili woose wivaa kuri, a inuta lyukaa kwi?

¹⁸Kake Iṛuva anrwaa meeṛo woose limwi limwi ifovviliń sheeli andekunda.

¹⁹Kake kifo foose fiivaa yeeṛo limwi, a vvili ukaań kwi?

²⁰Kake alli meeṛo mmeengi, kake vvili ni umwi.

²¹Nta iriso limakii iia uko ntawore kiteveto nawe ndi. Ana nrwe umakii iia marende ntawore kiteveto neeni ndi.

²²Kake kya mmwasi meeṛo a vvili alya akee ikusaṛio̱ sheeli mmatanyari atinye mmwasi.

²³Na meeṛo a vvili alya akee ikusaṛio̱ sheeli atawore tikisi meeṛo va tikee yaniinga tikisi kilanya.

²⁴Amu meeṛo eru alya awore unuru awore mashoṛa ndi. Kake Iṛuva alunganisa vvili na iniinga kyeenga kilya kyaanguywa tikisi ikilie,

²⁵amu utakaafo mwavanu kari ka vvili, kake meeṛo eelekani yeeṛo lyoose na lingi.

²⁶Na yeeṛo limwi likavavio̱ meeṛo woose avavio̱ andu emwi nalyo. Na yeeṛo limwi likaṅiniswa meeṛo woose afura andu emwi nalyo.

²⁷Kyasia ini mukee vvili wa Kristo na nndu woose wanu kava yeeṛo lya vvili uu lisumani na mashoṛa ayo.

²⁸Veefo Iṛuva avarwaa ifo siṛiń: Va mbele warumi, va kavili waauya, va kararu vvalosha, lingi watana fa maṛiikiso, lingi waavie finya ta ikiṛa valole, lingi weeleki, lingi wairia mbele, lingi mmakanika a mirerie.

²⁹A le woose warumi? Woose waauya? Woose vvalosha? Woose watana fa maṛiikiso?

³⁰Woose vawore finya ta ikiṛa valole? Woose vareraa kwa mirerie? Woose waaṛua?

³¹Kyasia langeń kya mmwasi myavie ya miniingie ikilie iyo. Nań mmworusaa shia ingi shisha kita toose.