Read MMA SHIYYA Barua ya Vakorinto ya mbele 13 Bible Online

Barua ya Vakorinto ya mbele 13 - MMA SHIYYA bible

Barua ya Vakorinto ya mbele 13

¹Kwakooya narera na ngyulumi ta vandu ana ta vamalaika ntaare ikunda, nkee sha minya ikee yoona ana sha nkongo ukee irera.

²Na kwakooya niishi iringisia filya fivaa numa ana noore mboni ta fiṛisi foose ana noore iirikia lyoose lya kwa Iṛuva nserise nalyo ngyuro, ntawore ikunda nkee kindo ndi.

³Na kwakooya naaviaa vandu vakiva masaa akwa woose ana nniingiaa vvili wakwa ukoṛwa muro, ntawore ikunda kisheelekaa kindo ndi.

⁴Ikunda liwore usuro na uwoo. Ikunda liwore iiria iriso ndi. Liwore ikudedeṛa ana ukwishiki ndi.

⁵Lituṛaa sonu ndi. Liṛuyaa mbusha yayo ndi, lituṛukiaa ndi, litaalaa fikasha ndi,

⁶Likyesiaa waaisi ndi, likyesiaa filya fikee fa dede.

⁷Lisikiaa foose, livereaa na ikusura foose, lisisiriaa foose.

⁸Ikunda liiraa mmando nta kyeeri kimwi ndi. Yauya fisuku lisiaa na mirerie imandaa na imanya fiilashikaa.

⁹Amu filya tiishi mfa kyeenga da na yauya fisuku lyeru llya kyeenga da.

¹⁰Kake ifi kyansha kilya kiishule, kilya kikee kya kyeenga kimandaa.

¹¹Ili niikee mwana munnya, nnderera sha mwana na iṛanguaṛangua sha mwana na ikusaṛa sha mwana. Kake kuuka nndeva nndu nnini, nnderea-wo mboni ta kiwani.

¹²Amu kyeeri kya alli tifilolie sha fwana ya kiloleń titamakii ifimanya kisha. Kake numa tifiloliaa kisangu kwa kisangu. Kyeeri ki kya alli imanya lyakwa llya kyeenga, kake numa mmanyaa foose sheeli nań nammanywa deń.

¹³Kyasia alli kilya kikaa ni ikusura na ba na ikunda, ifi fili firaru. Kake kari ka ifo kilya kikee kiroo ni ikunda.