Read MMA SHIYYA Barua ya Vakorinto ya mbele 15 Bible Online

Barua ya Vakorinto ya mbele 15 - MMA SHIYYA bible

Barua ya Vakorinto ya mbele 15

¹Kyasia vanavama, namukumburusa mboni ya ifura ya Iṛuva nndemukwanisia, nayo yyo mundeiwaria na ikuvava nayo.

²Na ikiṛwa mukiṛwaa yyo, kwakooya mukuwore deń na mboni tilya nndemukwanisia. Ili kiikooyaa kitaare mundekusura kya ruu.

³Amu niń mbooko nndemumanyisa filya nndewaria nań, sheeli Kristo afwe kiimba kya mareko eru sheeli mitisiṛie ikee irera.

⁴Na sheeli andeṛikwa na nkonu wa kararu kaṛuka, sheeli kikee kitisiṛe.

⁵Na sheeli andekworusa Kefa na numa valya ikumi na vavili.

⁶Numa andekworusa vanavamae kilanya ya mayana araanu andu emwi. Na kari kawo veengi veefo na muu kumande alli kita kiindi kari kawo vamiimuruswa.

⁷Numa andekworusa Yakobo kakworusa na varumi woose.

⁸Na ifurumia lya vandu woose kashikworusa nań nkee sha nndu andeiriwa kwa kyeeri kitakee kyamwi.

⁹Amu niń nkee munnya wa varumi ntasumani ivaangwa nrumi, fulya niń natuṛua siṛi ya Iṛuva.

¹⁰Kake kwa ililia lya Iṛuva nava sheeli nkai, na ililia lyamwi likee kwakwa lindeva lya ruu ndi. Kake nndeengeṛia nnu iṛunda mashoṛa kilanya ya woose, ana nta niń ndi, kake ni ililia lya Iṛuva likee nań.

¹¹Kyasia kwakooya nniń ana kwakooya vvalya mfo tikwanisaa, na mfo kuro mundekusura.

¹²Kyasia ise talosha sheeli Kristo anduka kwa vafu. Nki ili kiindi kyanu kikee inumbua liteefo iṛuka lya vafu?

¹³Kwakooya liteefo iṛuka lya vafu, na Kristo aṛuka ndi.

¹⁴Kwakooya atanika, mboni teru teelekaa ndi na ikusura lyanu nkindo ndi.

¹⁵Neese tilolioo sheeli tikee varambua va Iṛuva va wongo, fulya tarambua sheeli Iṛuva anduta Kristo kitaare ammuṛuta, kwakooya vafu kitaare vaṛukaa.

¹⁶Amu kwakooya vafu vataṛukaa, na Kristo nae aṛuka ndi.

¹⁷Kwakooya Kristo ataṛuka, ikusura lyanu liwore misendie ndi, neeni mukikee uretiń lwa mareko anu.

¹⁸Na valya vandefwa veekusuraa Kristo varekaa.

¹⁹Kwakooya tikusuraa Kristo muuń uu tiurie alli tubu, tikee vakiva kita vandu woose.

²⁰Kake alli Kristo ammaa iṛuka kwa vafu kava wa mbele wa vafu anduka.

²¹Amu ili ufu lundenndwa ni nndu umwi, mfo na iṛuka lya vafu lindenndwa ni nndu umwi.

²²Amu sheeli woose vakee ifwa, fulya vakee vana va Adamu ulya, mfo kuro da woose vavaa lingi na muu, fulya vawa va Kristo.

²³Kake nndu woose na ikamba lyamwi, wa mbele nKristo, numa walya vakee va Kristo ili ashaa.

²⁴Numa livaa ifurumia lya foose, ifi arambikiaa Iṛuva Nde umangi kammaa ireta ngyunini toose na finya toose na imakii lyoose.

²⁵Amu ye kyawara akaa na witoṛo, ”kumande arwaa fituva famwi foose kwa si ya marende amwi“.

²⁶Kituva kya ifurumia kiretwaa ni ufu.

²⁷Amu ”arwaa findo foose kwa si ya marende amwi“. Kake ifi anumbuaa: Sheeli foose fikee kwa si yamwi, kisumani ito andefirwaa kwa si yamwi atasaandi-wo.

²⁸Ifi kivaa findo foose fammaa irawa marendeń amwi, llyo na Mwana nae akurwaa kwa si ya marende a ulya andenrwaya findo foose kwa si ya marende amwi, amu Iṛuva ave muni foose kundo koose.

²⁹Kwakooya kitaare nkuro, valya vakee ikubatisio̱ vafu vakuutiaa-wo ki? Kwakooya vafu vataṛutwaa kutu, nkiki vakubatisio̱o̱ń?

³⁰A ise nki ifi tikee kitaniń kya muu weru kyeeri kyoose?

³¹Ee vanavama mukee nduma wakwa nkee nato kiimba kyanu kari ka Kristo Yesu Nndumi weru, nkee ifwa nkonu tiṛi.

³²Kwakooya navingana na mafisi mavaave kinndu kulya Efeso, fisheelekiaań ki? Kwakooya vafu vataṛutwaa, kyasia ”tilye na inwa, amu ndesi tifwaa“.

³³Manya mutalembike! Mirerie mikasha ikasheesaa windi unuru.

³⁴Rundeń na uṛango sheeli kyawara ana manya mutatane fikasha. Fulya veefo kari kanu vateeshi Iṛuva. Nkee irera ifo mmumanyise sonu.

³⁵Kake eeba eefo nndu ashiuṛaa: Vafu vaṛutwaa are naań? A wo vashaa varie mivili ingai?

³⁶Iwe nriṅani! Kilya kuveekiaa kimiaa kitaare kyafwa mbele ndi.

³⁷Na kilya kukee iveekia kukee iveekia yumba lia fivaa ndi, kake kukee iveekia mbeu da, kwakooya yya ngano ana mbeu tingi.

³⁸Kake Iṛuva akee iiniinga yumba sheeli akundie kaniinga mbeu yoose yumba lyayo yeni.

³⁹Nyama toose nnyama timwi ndi, kake tingi n ta vandu na tingi n ta numbe na tingi n ta ndee na tingi n ta makunga.

⁴⁰Lingi iifo mivili ya kiiṛuvewu na mivili ya kiisangeń. Kake yumba lia lya kiiṛuvewu nkyaanya na yumba lia lya isangeń nkyaanya.

⁴¹Iifo langa imwi ya saa na langa ingi ya mwiri na ingi ya nyinyiri, amu kiifo kiilasha kya langa kari ka nyinyiri na nyinyiri.

⁴²Mfo kuro kikai na iṛuka lya vafu. Kikee iveekio̱ kilya kibwaa na iṛutwa kiṛutwaa kilya kitabwaa.

⁴³Kikee iveekio̱ kya usutu na iṛutwa kiṛutwaa kiwore tikisi. Kikee iveekio̱ na utanyari na iṛutwa kiṛutwaa kiwore finya.

⁴⁴Ukee iveekio̱ vvili wa kivandu na iṛutwa uṛutwaa vvili wa kimumuyo. Kwakooya iifo mivili ya kivandu, na ya kimumuyo iifo.

⁴⁵Amu nkuro kyatisiṛwa: ”Adamu nndu ulya wa mbele akooya nrima uwore muu“. Na Adamu ulya wa ifurumia kava wa mumuyo annde muu.

⁴⁶Kake vvili wa kimumuyo to wwa mbele ndi, kake ulya wa kinndu nto wabooka. Numa ukasha ulya wa kimumuyo.

⁴⁷Nndu wa mbele auka uteriń, nae ni uteri. Nndu ulya wa kavili aukie iṛuvewu.

⁴⁸Sheeli ito wa uteri akai, mfo kuro na iwo va uteri vakai. Na sheeli ito wa iṛuvewu akai, mfo kuro na va iṛuvewu vakai.

⁴⁹Na sheeli tankurika fwana ya ulya wa uteri, mfo kuro tikurikaa na fwana ya ito wa iṛuvewu.

⁵⁰Vanavama, kilya nkee irera ni iki: sheeli kilya kikee na nyama na usao kimakii iwara diṅu ya umangi lwa Iṛuva ndi. Ana kilya kibwaa kimakii irwaa diṅu ya kilya kitabwaa ndi.

⁵¹Lleń te namuia ini kiṛisi: Tifwaa ti woose ndi, kake tiilashikaa ti woose

⁵²kwa tiń sha isindiṛa da na ilolia kyeeri kya wembe lwa ifurumia. Amu wembe lwivilio̱o̱ na vafu vaṛutwaa vatakibwaa, neese tiilashikaa.

⁵³Amu mivili ii yoore uboru yaṛukaa ilya itakibwaa, na uu wa ifwa waṛukaa ulya utakifwaa.

⁵⁴Kake ili mivili ii iwore uboru yaṛukaa ii itabwaa na ii yoore ufu yaṛuke ii itakifwaa, Ilyo kirero kilya kitisiṛe kifikaa: ”Ufu lwammiṛwa lwawingwa.

⁵⁵Iwe ufu, uvingi lwafo lukee kwi? Iwe kimiṛa, ukiva lwafo lukee kwi“.

⁵⁶Fulya ukiva lwa ufu llo mareko, kake finya ya mareko mmavavaso.

⁵⁷Kake Iṛuva aanwa, fulya antiniinga ivinga kwa finya ya Nndumi weru Yesu Kristo.

⁵⁸Kiimba kya ikyo vanavama vakunde, mukuumise koṛoń, manya mutasingesinge! Tanień utomari iṛunda mashoṛa a Nndumi kundo koose, fulya mwammanya yatarika lyanu mukee yatarika kiimba kya Nndumi llya ruu ndi.