Read MMA SHIYYA Barua ya Vakorinto ya mbele 16 Bible Online

Barua ya Vakorinto ya mbele 16 - MMA SHIYYA bible

Barua ya Vakorinto ya mbele 16

¹Kiimba kya mboni ya miniingie ilya ya iniinga vasongori valya neeni taniń kuro sha lia nndevavasa siṛi ta Galatia.

²Nkonu woose wa mbele wa kyuma nndu woose wa kwanu afise kyeenga kyamwi kyeń kwamwi kwa kiṛengo kya mikooiye yamwi, amu iitiṛimu li litave-fo ili nammaa isha.

³Nań ili mmufikiaa nndevaruma na barua valya mwawasaua varwaa miniingie yanu kulya Yerusalemu.

⁴Na kwakooya kivaa nań neende, vafingaa kyaaṛo andu emwi nań.

⁵Kake mfikaa kwanu ili mmaa iira Makedonia, amu Makedonia niiraa da.

⁶Eeba nkaa kwanu nkusurie kyeeri kyo kyoose kya mbioo, amu mushiṛaṛate numa kundo koose neendaa.

⁷Amu alli nta mfurie ikwania neeni niiraa da ndi, fulya mfurie ikaa kwanu mikonu milive Nndumi kansheelekia.

⁸Kake kunu Efeso nkaa-fo kumande kisuku kya Pentekoste.

⁹Amu nanruywa mwaango nnini wa iṛundia mashoṛa meengi, lla kasa veefo veengi vakee misa.

¹⁰Kake ili Timoteo afikaa, mulleń akaa kwanu luteefo weṛei. Amu ni ndundi wa mashoṛa a Nndumi shań shi muni.

¹¹Kyasia manya nta nndu umwi amwilaa, kake ndaṛateń na kibua ashe lingi na kwakwa, amu neese tiwerie andu emwi na vanavamae.

¹²Kake kya Apolo uu mwanamae weru nndentereva nnu ashe kwanu andu emwi na vanavamae wo vengi, nae nta ikunda yenda alli. Kake ashaa ili akooya mwaanya.

¹³Kaańń kya umbuura, kuumiseń muware ikusura, veń vandu vawore finya!

¹⁴Findo fanu foose fitaniń na ikunda!

¹⁵Lingi namutereva vanavama: Mwishi valya va numba ya Stefana wwo vandebooka yaṛukia Nndumi ifo Akaya nawo vakakuniingia mashoreń a iṛundia vasongori.

¹⁶Kyasia indień vandu sha iwo na akwaa vvalya vakee iṛunda mashoṛa andu emwi nawo na ikwatara.

¹⁷Nań noore ifura kiimba kya Stefana na Fortunato na Akaiko vakee nań. Amu wwo vandeshitania filya ini mutandemakii ishitania.

¹⁸Amu wo vandeshiimurusa nrima wakwa na mirima yanu neeni. Kyasia vandu sha iwo vamanyiń ninnsha.

¹⁹Siṛi toose ta Asia tamwisana. Akwila na Pirisika vamwisana nnu kari ka Nndumi andu emwi na siṛi ikee numba kwawo.

²⁰Na vanavamae woose vamwisana. Kwisaniń mwikwongaa miimo sheeli vasongori veeshivie.

²¹A li iisana lyakwa niń Paulo nndetisiṛa na uko lwakwa shi muni.

²²Nndu na kava i atakundie Nndumi ave ndenge! Nndumi akee isha (Maranata)!

²³Uwoo lwa Nndumi Yesu lukaa neeni! Ikunda lyakwa likee neeni mu woose mukee va Kristo Yesu.