Read MMA SHIYYA Barua ya Vakorinto ya mbele 6 Bible Online

Barua ya Vakorinto ya mbele 6 - MMA SHIYYA bible

Barua ya Vakorinto ya mbele 6

¹A le nndu wa kwanu kwakooya awore kirero na uroe wamwi akee ikaṛia indiinga kwa valya vakee vayavaṛumu, nta yenda kwa valya vakee vasongori?

²Ana mwishi se sheeli valya vakee vasongori vaumisiaa isanga li? Na kwakooya isanga lyumisio̱o̱ń ni ini, a le mumakii ifukya se fikwena fikee finnya?

³Mwishi se sheeli tuumisiaa na vamalaika, kyasia ni mmwasi kita se mboni ta muuń uu?

⁴Kyasia kwakooya mwawa na andu akee ifukiywa mboni ta muuń uu, mwawarwaa vave vafukya iwo vatawore nsendo ifo siṛiń.

⁵Ifi nafirera mmuute sonu. A le nkuro sheeli kunu kwanu eefo nndu umwi awore uṛango amakii ifukya firero fa mwanamae wamwi ndi?

⁶Kake mukee ikuṛiinga nndu na mwanamae kwa iwo vatakusurie Iṛuva.

⁷Kyasia lyawa yaanguywa kwanu deń, fulya mukee iṛiingiana ini mu veni na mu veni. Amu ṅṅwana ituṛa se? Amu ṅṅwana isokwa masaa anu se?

⁸Kake andu a ifo ini mu veni mukee iraya uraa lwa vandu na ivasoka masaa awo, ee na akwaa ni a vanavamae vanu.

⁹Ana mwishi se sheeli varekwa sha iva vatakooyaa diṅu ya umangi lwa Iṛuva? Manya mutalembike: Vaaisi nta vakooyaa diṅu ya umangi lwa Iṛuva ndi ana varasia firasio ndi ana vaaika ndi ana valya vakee isuta uka ana uumi ndi ana varoko ndi

¹⁰ana manini ndi ani valanga ndi ana vanangwa ndi ana varuma ndi ana vasoka ndi.

¹¹Na kinga kyanu mwikee vandu va mikae ii. Kake mwansangywa, lingi mwamiiliswa mukataalio̱ usumani kwa irina lya Nndumi Yesu Kristo na kwa Mumuyo wa Iṛuva weru.

¹²Mwanumbua: ”Findo foose kwakwa mfisha“. Ee, kake mfoose feelekiaa ndi. Mwanumbua: ”Findo foose kwakwa mfisha“. Ee, kake kilya kitashiviaa nkitinywa ndi na kikava ki.

¹³Mwanumbua: ”Shoonga yya ndewu na ndewu yya shoonga“. Ee, kake Iṛuva aretaa foose fili fivili ndewu na shoonga. Kake vvili wa nndu wwa waaisi ndi, kake wwa Nndumi, nae Nndumi mmuni vvili uu.

¹⁴Nae Iṛuva andeṛuta Nndumi atiṛutaa neese kwa finya yamwi.

¹⁵A le mwishi se sheeli mivili yanu mmeeṛo a Kristo? Naniingiań meeṛo va akee a Kristo na yaaṛua ave meeṛo a nka wa shia? Wode!

¹⁶Ana mwishi se sheeli ulya allungana na nka wa shia avva vvili umwi nae? Amu nkitisiṛe: ”Iwo vali vavili vavaa vvili umwi“.

¹⁷Kake ulya allungwa na Nndumi avva mumuyo umwi nae.

¹⁸Risheń waaisi! Ireko lyoose litanwaa ni nndu likee wooṛo ya vvili wamwi. Kake ulya akee mwaaisi akee yaṛua vvili wamwi ye muni uve wa mareko.

¹⁹Ana mwishi se sheeli mivili yanu yawa numba ya Mumuyo Nsongori akee kari kanu uu mwanniingio̱ ni Iṛuva? Ana nta ini mukee masaa anu mu veni ndi.

²⁰Amu mwauṛwa na uuru uumu. Kyasia alli itikiseń Iṛuva ifo miviliń yanu, amu yya Iṛuva.