Read MMA SHIYYA Barua ya Vakorinto ya mbele 8 Bible Online

Barua ya Vakorinto ya mbele 8 - MMA SHIYYA bible

Barua ya Vakorinto ya mbele 8

¹Kya nyama tilya ta irasia maṛuva a wongo mundeshitisiṛia sheeli: ”Tiishi sheeli tikee veni imanya ti woose“. Manyiń imanya lyo yeni linnde ukushombi, kake ikunda lirusaa.

²Nndu kakusaṛa sheeli awore imanya, nta kindo kimwi akiishi sheeli kyawara amanye.

³Kake nndu kankunda Iṛuva ito ammanyikwa yye.

⁴Mukashitisiṛia: ”Kyasia kya miliye ya findo fikee iniingio̱ fa firasio fa maṛuva a wongo tiishi sheeli maṛuva a wongo ateefo kunu isangeń na sheeli kitaare eefo Iṛuva kita ni uu umwi tubu.

⁵Kwakooya vandu vengi vanumbua: Eefo maṛuva kive ifo iṛuvewu ana isangeń, nawo vakusurie maṛuva awo akee meengi na mawomi awo akee meengi,

⁶kake kweru ise Iṛuva ni umwi tubu akee Nde yeru. Yye findo foose fuukie kwamwi neese tiuyaa kwamwi. Eefo na Nndumi umwi ni Yesu Kristo. Yye findo foose findeva kwa finya yamwi neese tikee kari kamwi“.

⁷Ee, kake imanya li likee na vandu woose ndi. Kwa ikyo veefo kari kanu vakee ilya nyama tilya sheeli tikee ta firasio dede, fulya veeishiviee irasia vaṛumu mbele, na mirima yawo fulya ikee mitanyari ikaṛindiswa.

⁸Lingi mundeshitisiṛia: ”Kake shoonga nta imakii itirwaa kwa Iṛuva ndi. Kwakooya titalya, nta kindo kyakwengeṛia. Ana tikalya, nta kindo teengeṛio̱o̱“.

⁹Ee, kake lleń imakii ili lyanu kaaṛa litakasheese valya vakee vatanyari.

¹⁰Amu nndu kakulolia iwe kuwore imanya kukee rembo shoongeń ya firasio fa vaṛumu, nrima wa nndu to akee ntanyari ateeshi misendie kisha naare? Eetikwaa se nrimiń ale nyama tilya ta firasio nae?

¹¹Na ulya akee ntanyari aretwaa kiimba kya imanya lyafo, nae mmwanamae wafo Kristo andemfiya.

¹²Kwakooya mwakasheesa vanavamae vanu kuro na ikaba faasha mirima ikee mitanyari, kyasia mukee irekio̱ Kristo muni.

¹³Kwa ikyo shoonga yakwa ikanteveta mwanamae wakwa, nta llyaa nyama tilya miṛeṛe ndi, amu ntatevete mwanamae wakwa.