Read MMA SHIYYA Barua ya Vakorinto ya kavili 1 Bible Online

Barua ya Vakorinto ya kavili 1 - MMA SHIYYA bible

Barua ya Vakorinto ya kavili 1

¹Niń Paulo nkee nrumi wa Kristo Yesu kwa mifurie ya Iṛuva. Ise na Timoteo mwanamae weru teesana siṛi ii ya Iṛuva ikee kulya Korinto andu emwi na vasongori woose vakee urukeń loose lwa Akaya.

²Uwoo lukaa neeni na unambwe fuukie kwa Iṛuva Vaava weru na kwa Nndumi Yesu Kristo.

³Iṛuva eetikiswa akee Nde wa Nndumi weru Yesu Kristo. Yye Nde muni ililia na Iṛuva muwiiṛia muu.

⁴Atiwiiṛia muu ngatareń teru toose, kaaṛa neese timakii iwiiṛia muu valya woose vakee valise ngyukiva tawo, ni iwiiṛia muu li tikee iliniingwa ni Iṛuva.

⁵Amu sheeli matuṛulo a Kristo akee ikwengeṛia kweru, mfo kuro da na iwiiṛio̱ muu lyeru fikee ikwengeṛia lyuka kwa Kristo.

⁶Kake ifi ise tikee ngatareń nkiimba kya iwiiṛio̱ muu lyanu na ikiṛwa lyanu. Neeli ise tikee iwiiṛio̱ muu nkiimba kya iwiiṛio̱ muu lyanu filolikie na finya ya isisiria matuṛulo alya tikee ituṛulwa neese.

⁷Na iverea lyeru fiwore finya kiimba kyanu tiimanyaa sheeli neeni mwawa vataṅaṛia mavaviso alya, mfo kuro da mwawa vataṅaṛia iwiiṛio̱ muu lia.

⁸Amu vanavama, nta tifurie mulemwa imanya mboni ta ngyukiva tilya tindetikooya kulya Asia ndi, sheeli tindetiṅinia nnu tikailanya finya teru, kumande tikauta ba ya ikia.

⁹Neese ti veni tikanumbua: Tikikiaa ifwa fingi ndi. Nakyo kikava kuri, amu titakukusure ise ti veni, kake tikusurane na Iṛuva ye muni uu aṛuta vafu.

¹⁰Yye andetiiṛua fitani ifi finini fa ufu na itikiṛa eengeṛiaa itikiṛa kuro da.

¹¹Ifo neeni mwelekyanaa neese mwitereviaa, amu ililia lia lya Iṛuva tindelikooya kwa fiterewo fa vandu veengi livatomarise yaana Iṛuva kiimba kyeru.

¹²Amu tikisi yeru ikee irambulwa mmirima yeru yyo ii sheeli: Tindekuwara na weendo kunu isangeń lukee lwa usongovisi na warutu luukie kwa Iṛuva, nta llwa uṛango lwa kivandu ndi, kake wweendo lukee ikuwara na ililia lya Iṛuva lukamanyika kwanu ini kya mmwasi.

¹³Amu timutisiṛiaa kirero ndi kita filya mukee ifisoma na ifimanya. Nań noore ba kundo mufimanyaa kumande kirero kya ifurumia,

¹⁴sheeli mwantimanya kwa kyeenga sheeli ise tammuvia ini tikisi, neeni nkuro mutiviaa ise tikisi nkonu ulya Nndumi weru Yesu ashaa nato.

¹⁵Nań ifi niiworee ikusura lyo niikundiee ilava isha na kwanu, amu mukooye ukyesi lwa kavili.

¹⁶Niire kwanu neende kumande Makedonia. Lingi kuuka Makedonia nuuye kwanu na iṛaṛatwa ni ini neende Yudaya.

¹⁷Kyasia ili nndekusaṛa kuri, naare? Nndekukundia kya beṛebeṛe da? Ana ifo nndekusaṛa, nndekusaṛa kinndu five fa wongo niinumbuaa ee nayo nkimwi na wode?

¹⁸Kake Iṛuva akee nrambua wakwa, sheeli kirero kyeru tindemwendee kiwore ee nkimwi na wode ndi.

¹⁹Amu Kristo Yesu Mwana wa Iṛuva andekwaniswa kwanu ni ise — nniń na Silwano na Timoteo — ye andeva ee na wode andu emwi ndi. Kwamwi ye awore ee tubu.

²⁰Amu firekio foose fa Iṛuva fammaa yawukia kari kamwi. Lingi kari kamwi ni Amen ilya, naamu Iṛuva aṅiniswa ni ise.

²¹Kyasia ulya atiniinga finya andu emwi neeni tilungani na Kristo na itiilisa yye Iṛuva.

²²Nae yye andetiniinga kiringiso, lia atiavia nrendekye wa Mumuyo ngooń teru.

²³Kake niń nkee ivaangia nrima wakwa Iṛuva ave nrambua, sheeli kiteveto ntaare namfika lingi Korinto, naamu mmulilie.

²⁴Nta ni iitoṛo ikusura lyanu ndi, kake tikee veelekia va ifura lyanu, fulya mukuwore na ikusura lyanu tabu.