Read MMA SHIYYA Barua ya Vakorinto ya kavili 10 Bible Online

Barua ya Vakorinto ya kavili 10 - MMA SHIYYA bible

Barua ya Vakorinto ya kavili 10

¹Kyasia niń Paulo ili nkee irerwa vvandu kiindi sheeli nkee nkunyiisi niivaa neeni, kake kwakooya ntaiyo noore ukaṛuo kwanu,

²nkee imutereva na uwoo na walio lwa Kristo: Sheelekień amu ntave na ukaṛuo ili niyo. Amu nkaṛiaa ivingana na valya vakee itirera sheeli ise tikee ikuwara na weendo lukee lwa mikae ya kinndu.

³Na kwakooya tikee yenda kwa kivvili, nta tikee ikabana fira kwa kivvili ndi.

⁴Amu fiya feru tirie fa ikabana mfa kivandu ndi, kake foore finya yukie kwa Iṛuva ya ifukyafukya singiri shuumu na mitambwe.

⁵Tikee ifukyafukya na kilya kyoose kikee ikwimboyo uṛango lwa Iṛuva tiireyaa makusaṛo woose a vandu, amu vairikie Kristo.

⁶Lingi tikee kya umbuura yumisia ilea lyoose kumande mumaa yawutia windi lwanu.

⁷Lleń filya fikee mbele ya miso anu! Nndu kankumanya ye muni sheeli wwa Kristo akusaṛe lingi nrimiń wamwi: sheeli ye akee nndu wa Kristo, mfo kuro da neese tikee vandu va Kristo.

⁸Amu kwakooya nalungana na ikushombia imakii lyeru Nndumi andetiniinga live lya imulunga, litave lya imuburua ndi, nsukaa vve wa wongo ndi.

⁹Ana nta wakani na nndu akee imutisiṛia barua ta imukyangisa.

¹⁰Amu veefo vashireraa veenumbuaa: Barua tamwi nshuumu toore finya. Kake ili aiyo ye muni kwa kivvili ni ntanyari na mboni tamwi tirie ngo ndi.

¹¹Nndu sha ito akusaṛe kuri: Kasa tikai kwa firero fa barueń ili titaiyo, mfo kuro tikai na mitanie ili tiiyo.

¹²Amu nta timakii ikaṛia ikutaala andu emwi na kinga kya iwo vakee ikwitikisa wo veni ndi ana nta ikuvakanisa nawo ndi. Kake wo veni vakee ikwelelia imanyeń lyawo kwa imanya lyawo na ikuvakanisa imanya lyawo kwa imanya lyawo, nta vawore uṛango ndi.

¹³Kake ise nta tikwitikisaa kya mmwasi kwa kiṛengo kyeru ndi, kake nkwa kiṛengo kya kyelelio kilya tameelelio̱ ni Iṛuva, nakyo nkiṛengo kya itifita kumande kwanu.

¹⁴Amu nta ise tikutaṛambuaa imanya lyeru liilanyi kiṛengo kyeru sheeli titamufikiaa ndi, amu tabooka ifika kumande kwanu tirie nrumi shisha ya Kristo.

¹⁵Ana nta tikee ikwitikisa kya mmwasi wa kiṛengo kyeru andu a ngatara ta vandu vengi ndi. Kake tikee iva na ikusura sheeli: Ikusura lyanu likaṅina tiṅiniswaa kwanu kwa kiṛengo kya kyelelio kyeru na ikooya kilanya,

¹⁶amu timakii ikwanisa nrumi shisha kwa valya vakee kwaasha kilanya ya ini, nta niikai tikee iṛuya ikushomba tikamaaka urukefi lweemmaa ikwanisio̱ nrumi shisha wengi ndi.

¹⁷Kake ulya akee ikushomba akushombe, fulya akee wa Nndumi.

¹⁸Amu ulya akee ikushomba ye muni wwa udede ndi kita ulya akee iitikiswa ni Nndumi.