Read MMA SHIYYA Barua ya Vakorinto ya kavili 2 Bible Online

Barua ya Vakorinto ya kavili 2 - MMA SHIYYA bible

Barua ya Vakorinto ya kavili 2

¹Kake ifo ngooń yakwa niirekiee kuri, manya ntashe kwanu lingi niimunarisaa.

²Amu kwakooya namunarisa ini, ni i ashisetaa kitaare ni ulya anariswa nniń?

³Kiimba kya iki nndemutisiṛia kirero kyo kyeni, amu ili nshaa kwanu ntakooye inariswa vvalya kyeewwaraa nkooye ifura kwawo, niimukusuraa ini mu woose sheeli ifura lyakwa ni ifura lyanu ini mu woose.

⁴Amu nndemutisiṛia na ivaviswa iingi na ngatara ta ngooń niidonisaa masoru meengi, nta naamu munarie ndi, kake naamu mumanye ikunda lyakwa nkee nalyo kwanu kasa likee inini.

⁵Kake kwakooya nndu annarisa kwanu, nta ashinarisa niń ndi, kake nkyeenga kwa kyeenga da — amu ntashe imwemia nnu — amunarisa ini mu woose.

⁶Ulya akee kuro kimfile kwakooya eekimbwa vvaaroe vakee veengi.

⁷Kyasia kyamuwara ini illatia na uwoo na illembalemba ngoo yamwi, amu atamiṛwa ni unario lukilie mmwasi.

⁸Kwa ikyo namutereva ini mumworuse ikunda lyanu.

⁹Amu nkiimba kya ikyo namutisiṛia, amu nkooye irambua kari kanu, sheeli mwirikie findo foose.

¹⁰Kake kwakooya ini mwatia nndu kindo, na akwaa nniń nammutia, fulya nań kilya nantia, kwakooya kiifo kindo kiifuriee itio̱ nniń, nankitia kiimba kyanu kisanguń kya Kristo.

¹¹Kive kuro, amu titalembwa nSatana, amu tiishi kisha mitambwe yamwi.

¹²Kyasia ili nndefika Tiroa ikwanisa nrumi ya Kristo, naruywa mwaango mfinya ya Nndumi.

¹³Kake nta ilolia ifura ngooń yakwa, fulya kitaare nndelolia-fo mwanamae wakwa Tito, kake nndeiakana nawo nakwimboo neende Makedonia.

¹⁴Kake Iṛuva aanwa uu atiniingaa uvingo mikonu yoose kari ka Kristo na yawutia kyuuna kya immanya ye kundo koose mashoṛeń eru.

¹⁵Amu ise tavia Iṛuva kisaamu kya Kristo kwa valya vakee ikiṛwa na kwa valya vakee ireka.

¹⁶Kwa iwo va kavili nkyuuna kya ufu kinnde ufu, kwa iwo va mbele nkyuuna kya muu kinnde muu. A ye ni i amakii iṛunda findo ifo?

¹⁷Amu ise tikee sha iwo veengi vakee ikaba mbusha na kirero kya Iṛuva ndi. Kake tikee irera na weelwa lwa nrima luukie kwa Iṛuva tikee va Kristo kisanguń kya Iṛuva.