Read MMA SHIYYA Barua ya Vakorinto ya kavili 6 Bible Online

Barua ya Vakorinto ya kavili 6 - MMA SHIYYA bible

Barua ya Vakorinto ya kavili 6

¹Kake ili ise tikee uṛundiń ilu lwa iṛundia Iṛuva, tikee imufunda: Manya mutawarie ililia lya Iṛuva kya ruu.

²Fulya Iṛuva arera: ”Kyeeri kya isenya nankwaranya, nkonu wa ikiṛwa nankweleka“. Lleń alli kiifo kyeeri kya isenya, alli wifo nkonu wa ikiṛwa.

³Kiimba kya iki tikee na useli, amu mashoṛa eru atabiṛwa.

⁴Kake findoń foose tikee ikworusa sheeli tikee maketi a Iṛuva. Nafo mfa utele wiingi na fa ngyukiva na fa ngatara.

⁵Na fa kitani na fa ikabwa na ifingwa na fa myaandu na fa mashoṛa na fa ilala rembo na ikwima shoonga.

⁶Na fa unuru na fa imanya na isisiria na fa uwoo na fa Mumuyo Nsongori na fa ikundana litawore ukavili.

⁷Na fa firero fa dede na fa finya ya Iṛuva andu emwi na fiya fa usumani fa ikabana na ikuringa uko usha na uko umuso.

⁸Tikee ikworusa sheeli tikee maketi a Iṛuva, na tikaṅiniswa na tikabiṛwa na tikarerwa kikasha na tikarerwa kinuru. Tikee ivaangwa valembi, kake tikee va dede.

⁹Tikee vandu vatamanyikie, kake timanyikaa. Tikee sha vakee ifwa, a te tikee na muu. Tikee sha vakee ituṛulwa, kake tawalwa ndi.

¹⁰Tikee sha vanarise, kake nkonu woose toore ifura. Tikee sha vakiva vatawore kindo, kake toore foose.

¹¹Kana keru nkarue kwanu, ini Vakorinto, lingi mirima yeru mmirue kwanu kutu.

¹²Ifo kari keru kwanu nkunnya ndi, kake kari ka mirima yanu nkunnya.

¹³Kyasia amu mutaa kiṛengo kilya mwanniingwa — nkee irera neeni sha vana vakwa —, neeni mfo kuro murulwa mirima mutiniinge mwaanya nnini mirimiń yanu.

¹⁴Manya mutafingwa nkindo andu emwi na valya vatakusurie Iṛuva. Lwifo wavi ki lwa usumani na lwa urekwa lumakii ikayana andu emwi? Ana wifo nsando ki wa langa na llema?

¹⁵Lingi liifo ivakana ki kya Kristo na waaisi? Ana ulya akusurie awore kyeenga ki andu emwi na ulya atakusurie Iṛuva?

¹⁶Lingi lwifo witanu ki kari ka numba ya Iṛuva na ya firasio? Amu ise tikee numba ya Iṛuva akee na muu, sheeli Iṛuva anderera: ”Nkaa kari kawo, lingi nruaruaa kari kawo, nań vvaa Iṛuva wawo, nawo vavaa vandu vakwa“.

¹⁷Kwa ikyo Nndumi anumbua: ”Somukeń kari kawo, mulakaniswa nawo“. Na lingi: ”Manya mutabaani kindo kiravi, nań mmuwariaa“.

¹⁸Na lingi anumbua: ”Vvaa Nde yanu, neeni muvaa vana vakwa va kiwomi na va kika“. Mfo kuro Nndumi muni finya arera.