Read MMA SHIYYA Barua ya Vagalatia 3 Bible Online

Barua ya Vagalatia 3 - MMA SHIYYA bible

Barua ya Vagalatia 3

¹Ini Vagalatia mukee vatondo! Wwaanga lungalu lundemuvinga mukalemwa ikusura kilya kikee kya dede? Mwamooruswa Yesu Kristo kumande allolikia misoń anu sheeli akabio̱ nsalabeń.

²Kirero kimwi da mfurie imuuṛa ini: Mwawwaria Mumuyo Nsongori kwa mitanie ya mavavaso da ana ni ikusura filya mwafiita?

³Utondo ilu mundeluuta na kwi? Kilya kyambooka na Mumuyo naare mufurie ikimarisia alli na vviliń?

⁴Findo ifi foose fa maṛiikiso mwamooruswa mwafiwaria kya ruu dede? Kwakooya nkuro nkya ruu.

⁵Kyasia ulya amuniinga Mumuyo na imuavia finya innde muu mirimiń yanu a le akee itana kuro kiimba kya mitanie ya mavavaso mwamaatarika nayo, ana ni ikusura kilya mwamoongoywa?

⁶Kikai sheeli kiikee kwa Abraamu: Andekusura Iṛuva kataalio̱ usumani.

⁷Kyasia manyiń sheeli valya vakee va ikusura iwo wwo vana va Abraamu.

⁸Nayo mitisiṛie yarera ilyo mbele, sheeli Iṛuva ataaliaa vayavaṛumu usumani kwa inkusura. Nkyo akwanisia Abraamu ilyo mbooko nrumi shisha ya ikia eemwiaa: ”Vayavaṛumu woose vanangwaa mboṛa yukie kwafo iwe“.

⁹Kyasia iwo vakee va ikusura vaniingwaa mboṛa andu emwi na Abraamu eekee wa ikusura.

¹⁰Kake valya woose vakee ikwatarikia na mitanie ya mavavaso wo vakaa kwa si ya kidengo. Amu nkitisiṛe: ”Ulya woose atakaa na filya foose fikee fitisiṛe kitabuń kya mavavaso na ifiirikia, adengwa“.

¹¹Kimanyikie baa sheeli nta nndu ataalio̱o̱ usumani ni Iṛuva kiimba kya uvavaso, amu ”ulya akee nsumani avaa na muu kiimba kya ikusura Iṛuva“.

¹²Kake mavavaso eeshi ikusura li ndi. Kya mavavaso mitisiṛie inumbuye kuri: ”Ulya ammaa yawutia mavavaso woose deń, avaa na muu kiimba kyayo”.

¹³Kristo andetitaua kidengoń kya mavavaso eekurwaa kwa si ya kidengo kyo kiimba kyeru. Amu nkitisiṛe: ”Nndu ulya woose avanikwaa kiriń akee ndenge“.

¹⁴Kikava kuro, amu mboṛa ya Abraamu ifikie vayavaṛumu kiimba kya Yesu Kristo, amu tiwarie kirekio kya Mumuyo kwa shia ya ikusura.

¹⁵Vanavama, nkee irera kwa mikae ya kinndu. Lla kasa ikee fwaa ya nndu akwaa nkuro ikammaa iva, eefo nndu eelashaa ana yengeṛia kirero ndi.

¹⁶Kyasia firekio fo farerwa kya Abraamu na uṛiti lwamwi. Arera ”na ngyuṛiti“ sheeli nshiingi ndi, kake arera kya umwi: ”na uṛiti lwafo“, yye Kristo.

¹⁷Kilya nkee irera nkyo iki: Kirekio ki Iṛuva eenkirwaa-fo mbele nta kimakii iilashwa ana iimwa mmavavaso ndi. Amu mavavaso andesha numa imiira myaka mayana aani na makumi araru.

¹⁸Amu diṅu ilya kikooye iikooywaa kwa shia ya mavavaso, iikikooywaa lingi kwa shia ya kirekio ndi. Kake Iṛuva andeiavia Abraamu kwa shia ya kirekio.

¹⁹Kyasia mavavaso wwo ki? Andeengeṛio̱ kiimba kya mareko, kumande ashaa ulya eendongwaa ifo kirekioń kilya, akavavaswa kwa uṛundi lwa vamalaika na irambikio̱ ukoń lwa mwitanisa.

²⁰Kyasia ulya akee mwitanisa nta mmwitanisa wa umwi ndi, kake Iṛuva ni umwi ye muni.

²¹Kyasia a le mavavaso akee ikabana na kirekio kya Iṛuva? Wode nkuro ndi! Amu kifo mavavaso aniingio̱ annde muu kyeewwaraa usumani lulolike kiimba kya mavavaso.

²²Kake mitisiṛie yamfinga foose kwa si ya finya ya mareko, amu iwo woose vakusuraa vaniingwa kirekio kilya kya ikusura Yesu Kristo.

²³Kake kitaare ikusura lyansha taringwa, amu tiirikie mavavaso tikava vandu vafingie andu emwi tiveree ikusura kumande lyotoṛikaa.

²⁴Mfo kuro mavavaso atikurika sha vana akatikurika kwa Kristo, tikooye isumaniswa kiimba kya inkusura.

²⁵Kake kuuka io ikusura limmaa isha takive lingi vandu va ikurikwa ndi.

²⁶Fulya ini mu woose mukee vana va Iṛuva kwa ikusura Yesu Kristo.

²⁷Amu ini mu woose ili mundebatisio̱ Kristo mwawa vamwi.

²⁸Amu kwamwi ye akiifo nndu Muyuda ana nndu Ngiriki ndi ana iketi ana muyakyeń ndi ana nndumi ana nka ndi. Fulya ini mu woose mukee kimwi kiimba kya ili mukee va Kristo Yesu.

²⁹Neeni mukankuwara na Kristo kyasia mukee kishuku kya Abraamu, lingi mukee vayadiṅu ya kirekio kilya mwanrekio̱.