Read MMA SHIYYA Barua ya Vagalatia 4 Bible Online

Barua ya Vagalatia 4 - MMA SHIYYA bible

Barua ya Vagalatia 4

¹Nkee inumbua: Ili muni diṅu akee mwana kitaare aṅṅina aavanisie na isinga ndi, lla kasa akee muni findo foose fa kyeń.

²Kake eetoṛio waleri vamwi na vasalalia vamwi kumande kyeeri kilya kisaulwaa nndee.

³Neese nkuro da: Lia tikee sha vana vati kitaare taṅṅina llyo tiikee vandu veetoṛioo mmilimu ya isanga tikava masinga ayo.

⁴Kake ili kyeeri kindefika kutu, llyo Iṛuva aruma Mwana wamwi kairiwa ni nndu nka karawa kwa si ya milimu ya vandu,

⁵amu ataue valya veetoṛio mmilimu ilya, amu taaṛulwa vana.

⁶Kyasia mwawa vana nkyo Iṛuva aruma Mumuyo wa Mwana wamwi aake mirimiń yanu, ito avaangaa: Aba, nkimwi na Vaava.

⁷Kyasia alli kukikee isinga ndi, kukee mwana. Kwavva mwana kukee na muni diṅu kwa finya ya Iṛuva.

⁸Kake ilyo mbooko mwikee muteeshi Iṛuva mukaṛundia maṛuva atakee kindo.

⁹Kake alli ili mwishi Iṛuva na kya mmwasi mwamiishiwa ni Iṛuva, naamu ki muuyaa lingi miloshień ilya ya mbele ikee mitanyari muve lingi maketi ayo, ikee yyo mulangie iiṛundia lingi?

¹⁰Mukee iindia suku na miiri na feeri na myaka.

¹¹Neeṛee kitave eeba nankwareesa kya ruu kiimba kyanu.

¹²Vanavama, namutereva muve sheeli niń nkai, amu niń nkee sha ini. Mundeshikasheesa nta kwa kindo kimwi ndi.

¹³Kake mwishi sheeli nndebooka imukwanisia nrumi shisha, nań niikee ntanyari vvili.

¹⁴Na kyelelio mundekooya vviliń wakwa nta mundekiila ana mundekilea ndi, kake mundeshiwaria sheeli nkee mmalaika wa Iṛuva na Kristo Yesu ye muni.

¹⁵Kyasia nkwi kikaiń kilya kya ikuvaanga va ngoma? Amu nkee imurambuya sheeli kikooye kiivaa mwiiṛuaa na akwaa mmiso anu mushiniingie niń.

¹⁶A le nawa kituva kyanu, fulya nkee imuia kilya kikee kya dede?

¹⁷Veefo vakee imukabania, kake nkya usha ndi, kake vafurie imuwiiṛa na wooṛo, amu ini muvakabanie.

¹⁸Kisha ni ili mukabanio̱o̱ kya usha kyeeri kyoose, nta nkyeeri kyo nkee kwanu da ndi.

¹⁹Vana vakwa, noore mavavio lingi kiimba kya iiriwa lyanu lya kavili kumande Kristo akumanyisaa kari kanu.

²⁰Kiikooyaa nkee andu emwi neeni alli na iilasha ulumi lwakwa, amu noore inunua kiimba kyanu.

²¹Shiień ini mufurie ikaa kwa si ya mavavaso: A le mwammanya mavavaso se?

²²Amu nkitisiṛe sheeli Abraamu eeworee vana vavili, umwi akee wa iketi lya kika na ungi wa nka mwore.

²³Kake ulya wa iketi lia lya kika eeriwa kwa kiwili, na ulya wa nka mwore eeriwa kwa kirekio kya Iṛuva.

²⁴Findo fi fikee irerwa na sumu. Amu ifo fivakani sha firekio fivili, kimwi kyukie uro lwa Sinai kikaira maketi, yye Hagari.

²⁵Amu kirero ki Hagari kivakani na uro lwa Sinai lukee kulya Warabu, nalo luvakani na Yerusalemu ya alli, fulya yo ikee uketiń andu emwi na vana vayo.

²⁶Kake Yerusalemu ya ifo ule ivakani na nka mwore, nae yye yeyo weru ise.

²⁷Amu nkitisiṛe: ”Fura iwe kukee kyuumba kutandeira! Kaba nndoṛo iwe kuteeshi mavavio a iira! Amu vana va ulya anderewa muni vveengi kita va ulya awore mmi“.

²⁸Neeni vanavama mukee vana sha Isaki, fulya mundeiriwa kwa kirekio kya Iṛuva.

²⁹Kake sheeli mikonu ilya ya mbele ulya andeiriwa kwa vvili andeumbuta ulya andeiriwa kwa kirekio kya Iṛuva, mfo kuro kikai na alli.

³⁰Kake mitisiṛie yarera are? ”Umbuta iketi Iyo lya kika andu emwi na mwana wamwi, amu mwana wa iketi arwaa diṅu andu emwi na wa nka mwore deń ndi.“

³¹Kwa ikyo, vanavama, ise tikee vana va iketi ndi, kake tikee vana va ito akee mwore.