Read MMA SHIYYA Barua ya Vagalatia 5 Bible Online

Barua ya Vagalatia 5 - MMA SHIYYA bible

Barua ya Vagalatia 5

¹Kristo antitaua usingeń tive vana va diṅu. Kiimba kya iki kuumiseń, amu mutakiwarwa lingi nkifingio kya usinga!

²Lleń niń Paulo nkee imuia: Kwakooya murinwaa, nta kindo mukooyaa kwa Kristo.

³Lingi nkee irambuya nndu woose akee irinwa, sheeli kyawara afite kyaasa kyoose kya mavavaso.

⁴Ini mufurie yaṛulwa vasumani mmavavaso mwallakaniswa na Kristo, mwawa na ireta uwoo lwa Iṛuva.

⁵Amu ise kwa finya ya Mumuyo tikusurie sheeli tikooyaa usumani luuka na ifo ikusureń lyeru lya ikusura Kristo.

⁶Amu tikankaa na Kristo Yesu irinwa ana ilea irinwa liwore ngo ndi, kake ni ikusura lya ikusura Kristo lyawutio̱o̱ ni ikundana.

⁷Mweembookaa iwara shia shinuru. Ni i andemuteveta mukalea iirikia filya fikee fa dede?

⁸Yomulwaomulwa li lya imwomua lyukie kwa ito andemuvaanga ndi.

⁹Kidooko kinnya kifile idookisa imbumbu lyoose.

¹⁰Neeli mukee va Nndumi, niń nkusurie sheeli mukiilashaa mirima yanu ndi. Kake uu andemufuluta akooyaa uumisio lwamwi na kava i.

¹¹Kake niń, vanavama, kifo kumande alli nndekwanisa nnumbue vandu varinwa, niiumbutwaa? Na kikangio kya ifiya nsalalabeń kiikifoo ndi.

¹²Kiivaa ṅwana valya vakee imwata inunueń ilyo valakaniswa neeni.

¹³Vanavama, ini mundevaangwa muve vana va diṅu. Kake manya mutaaṛue diṅu yanu ive ilanga lya mivili yanu, kake elekaniń na ikundana!

¹⁴Amu mavavaso woose aawukiaa kireroń kimwi, nakyo nkyo iki: ”Kunda vandu vengi sheeli kukukundie iwe ku muni“!

¹⁵Kake kwakooya mwakabana na ikwimara, lleń mutakumiṛe mu veni na mu veni.

¹⁶Kake nanumbua: Endeń kimumuyo, kuro mwawutiaa milangie ya vvili ndi.

¹⁷Amu ilanga lya kiwili likaa Mumuyo, na Mumuyo aleaa kilya kikee kya kivvili. Makanika va ali avili akee ivingana akamwima mwimakii itana kilya mukundie.

¹⁸Kake mukankurikwa mMumuyo mukikee maketi a mavavaso ndi.

¹⁹Na mitanie ya kiwili imanyikie baa sheeli ikai. Nayo yyo ii: Wwaaisi na ukwe na uravi

²⁰na irasia na findo fa usavi na sua na myaandu na iiria iriso na shuu ya nrima na nkuru na ikuraua na kyama kikasha

²¹na yaṛia ndaṛi na unangwa na ulafu na findo fingi fifivakie. Sha lia namaa imuia mbele, mfo kuro nkee imuia lingi: Valya vatanaa findo sha ifo vakooyaa diṅu ya umangi lwa Iṛuva ndi.

²²Kake findo Mumuyo avikie mfo ifi: ni ikunda na ifura na unambwe na isisiria na usha lwa nrima na usongovisi na ikusurana

²³na uwoo na kiṛengo. Findo sha ifo liifo ivavaso limakii ivingana nafo ndi.

²⁴Na iwo vakee va Kristo Yesu vammaa yumisia filya fa kiwili andu emwi na makusaṛo ayo makasha na ilanga lyayo.

²⁵Kwakooya mMumuyo atiniinga muu, kyasia neese tiware weendo lusumani na Mumuyo.

²⁶Titakushombe na unini lukee lwa ruu tiiluyanaa na ikwiria iriso.