Read MMA SHIYYA Barua ya Vagalatia 6 Bible Online

Barua ya Vagalatia 6 - MMA SHIYYA bible

Barua ya Vagalatia 6

¹Muṛe vanavama, kwakooya nndu awoywa ni ireko lya nrenga, muntomarise na uwoo, fulya ini mukee vandu veeshi mikae ya Mumuyo. Nawe kukulle ku muni, kaaṛa kutawoywa nnrenga nawe!

²Mwelekane mu veni na mu veni filya fikee imweemia, llyo mwawutiaa ivavaso lya Kristo.

³Amu kwakooya nndu akee ikudedeṛa eenumbuaa: noore finya atawore, ankulemba ye muni.

⁴Kake nndu woose akuelelie na mitanie yamwi muni, llyo akukabaa ye muni atandekaba vengi.

⁵Fulya nndu woose aṛiikisio̱o̱ llwamwi.

⁶Na ulya alloshwa kirero kya Iṛuva aavie ulya mullosha wavi lwa findo finuru foose.

⁷Manya mutakulembe: Iṛuva avaa iila ndi. Amu kilya nndu aveekia nkyo eelulaa.

⁸Fulya ulya akusuranaa na makusaṛo amwi wo meni akooyaa ureti, kake ulya akusuraa usumani luukie kwa Mumuyo akooyaa muu utakisiaa.

⁹Kyasiań manya ntalemwa itana finuru, fulya numa tiilulaa finuru, kwakooya titalemwa.

¹⁰Kyasia ili tikiwore mwaanya, titanie nndu woose finuru na kilanya vvalya tikee va ikusura limwi nawo.

¹¹Lleń mitisiṛie ii nndeengeṛia imutisiṛia na uko lwakwa niń shi muni!

¹²Woose vafurie isenya vandu veekuwaraa na findo fa kivvili wwo vakee imukabiṛia murinwa, na kiteveto vakatana kuro, naamu vatakooye yumbutwa kiimba kya nsalaba wa Kristo.

¹³Amu na akwaa ni iwo veni valya varine vairikie mavavaso ndi, kake vafurie ini murinwa, amu vakooye ukushombi lwa imwomuya taari yawo.

¹⁴Kake niń mfurie ikushomba ndi, amu niń niishi kindo kingi kitaare ni nsalaba wa Nndumi weru Yesu Kristo ndi. Nkyo kyakangia isanga likashivia ufu, nań nalivia mfu.

¹⁵Kake kwavva na Kristo irinwa nkindo ndi ana ilea irinwa nkindo ndi kita yaṛuka mikae miya.

¹⁶Na woose veendaa na wafio lo, unambwe luvashee na ililia, lushee na Isiraeli ya Iṛuva ya dede!

¹⁷Kuuka alli manya nndu akishivinaa, amu ifo vviliń wakwa nrie fiwoṛo fa Nndumi Yesu.

¹⁸Vanavama, Uwoo lwa Nndumi weru Yesu Kristo lukaa na mirima yanu! Amen.