Read MMA SHIYYA Barua ya Vaefeso 3 Bible Online

Barua ya Vaefeso 3 - MMA SHIYYA bible

Barua ya Vaefeso 3

¹Kiimba kya ikyo niń Paulo nkee mfinge wa Kristo Yesu kiimba kyanu ini vayavaṛumu.

²Mwamiita mboni ya wavi lwa ililia lya Iṛuva nndeniingio̱ kwa kiimba kyanu.

³Amu nnderambuywa kiṛisi kyo na myorusie, sheeli nndebooka itisiṛa kwa firero faangu.

⁴Mukaisoma mumakii imanya sheeli niishi kiṛisi kya Kristo.

⁵Kiṛisi ikyo kyammanyika kwa vandu matika alya a mbele ndi, kake kyeeri kya alli kikarambuywa varumi vamwi na vaauya fisuku mMumuyo.

⁶Na kiṛisi kyo nkyo iki: Vayavaṛumu wa diṅu imwi neese na va vvili umwi na vataṅaṛia andu emwi neese kirekio kilya kikuwore na Kristo Yesu kwa shia ya nrumi shisha.

⁷Nrumi yo yyo nndeaṛuywa ndundi wayo kwa kiṛengo kya wavi lwa ililia lya Iṛuva nndeniingwa kwa finya ya imakii lyamwi.

⁸Niń nkee munnya wa vasangori woose nndeniingwa ililia li lya ikwanisia vayavaṛumu usimba lwa Kristo lutawore mmando

⁹na yorusa vandu woose vamanye miṛundie ya kiṛisi ikyo. Fulya kuuka mbele kiikee kifise kwa Iṛuva andetana findo foose,

¹⁰amu uṛango lwa Iṛuva lukee lwa mikae miingi lumanyisio̱ nsiṛi ngyumangi na miitoṛio ya ifo iṛuvewu kyeeri kya alli.

¹¹Mideeṛie ii yamwi andeifisa ifo kwamwi kuuka mbele, amu yawutio̱ nKristo Yesu Nndumi weru.

¹²Na ifo kwamwi ye toore utomari lwa iserikia Iṛuva na iwerea kwa shia ya inkusura.

¹³Nkyo namutereva manya mutaleleke kiimba kya ngatara takwa tishiwore. Tishiwore kiimba kyanu, amu mukooye nsendo nnuru.

¹⁴Kwa ikyo nkee ifwiṛia nri takwa si mbele ya Nde

¹⁵uu akee ifukiya mikae yoose ya vandu irina ikee iṛuvewu ana ikee isangeń.

¹⁶Amu amuniinge finya kwa kiṛengo kya usimba lwa unini lwamwi mukuumise ifo mirimiń yanu mwielekio̱o̱ mMumuyo wamwi.

¹⁷Na Kristo amu akukaarise ngooń tanu kwa inkusura, neeni muve vandu vakuwore tabu na inkunda na ikundana mu veni na mu veni.

¹⁸Llyo mukooyaa imanya andu emwi na vasongori woose mbari ta ma-kusaṛo a Iṛuva a imukusaṛia na waasha lwayo na ule lwayo na si yayo

¹⁹na imanya ikunda lya Kristo likilie uṛango loose, amu musongovike kumande mwamaa iishuṛwa mboṛa yoose ya Iṛuva,

²⁰Ito akee imakii itana fa mmwasi fikilie ifo foose tikee ifitereva ana tikee ifikusaṛa kwa kiṛengo kya finya ilya ikee iṛunda mashoṛa kari keru

²¹eetikiswa ifo siṛiń na kari ka Kristo Yesu kumande marika woose na feeri foose miṛeṛe na miṛeṛe! Kive kyo kyeni!