Read MMA SHIYYA Barua ya Vafilipi 2 Bible Online

Barua ya Vafilipi 2 - MMA SHIYYA bible

Barua ya Vafilipi 2

¹Kyasia kwakooya liifo kwanu ilembwalembwa lyukie kwa Kristo ana kwakooya mukee ikuwiiṛia muu na ikunda ana kwakooya liifo ilungana na Mumuyo ana kwakooya muwore nrima wa ikuva-vio̱ mmuu na ililia,

²kikawa kuro kwanu awutień ifura lyakwa mwikaa na nrima umwi na ikunda lya ikundana nndu woose na uroe na iva na nrwe umwi.

³Manya mutatani nta kindo mwivinganaa ana ikwomuya ukuṅinisi lwa ruu. Kake nndu woose akuware na ukunyiisi ataale uroe sheeli ni nnini kita ye.

⁴Manya nndu atalle filya fikee famwi ye muni da ndi, kake nndu woose alle na fa vengi.

⁵Muve na mikae ilya sheeli na Yesu Kristo eekee nayo.

⁶Ye lla kasa eekee mbele wa mikae ya Iṛuva, nta akuvakanisa na Iṛuva sheeli nkindo kyawara kiwie ndi.

⁷Kake akuuta unini lwamwi kawara mikae ya iketi kakuvakanisa na vandu kalolio̱ akee wa mifwanie ya nndu.

⁸Kakunyiisa kairikia Iṛuva kumande ufuń, ni ufu lwa kulya nsalabeń.

⁹Kiimba kya iki Iṛuva aṅṅinisa nnu kanniinga unini lukilie ngyunini toose.

¹⁰Amu nri tifwiṛio̱ si mbele ya unini lwa Yesu ta woose veefo iṛuvewu na isangeń na kwa si ya isanga,

¹¹na ngyulumi toose tirambue sheeli Yesu Kristo yye Nndumi na iitikisa Iṛuva Nde.

¹²Vakunde vakwa, sheeli mundeshiirikia mikonu yoose nta nkyeeri niń niikee kwanu da ndi, kake alli nkya mmwasi ili nteefo kwanu, awutień ikiṛwa lyanu mu veni mwieṛeaa na irerema.

¹³Amu Iṛuva yye amuṛundiaa mirimiń yanu eemuniingaa finya ya ibooka mashoṛa anu na yamarisia, amu munsenye.

¹⁴Taniń foose liteefo iṅu-ṅura ana inunua,

¹⁵amu muve va usuro na vasaari mukee vana va Iṛuva vatawore ilomi kari ka kishuku ki kya nkuushu. Kari kawo mulolikie sha langa ikee imulika isanga ili.

¹⁶Wareń kirero kilya kinnde muu, nań nkooye tikisi yakwa ishivie nkonu ulya wa Kristo, fulya ntanderisha kya ruu ana ikwatara kya ruu.

¹⁷Kake na kwakooya kyashiwara iniingia muu wakwa kiimba kya iṛundia ikusura lyanu uve sha kindo kya irasa, noore ifura, ni ifura lishilungie neeni mu woose.

¹⁸Mfo kuro da neeni fureń na ifura lyanu limulunge nań.

¹⁹Vverie Nndumi Yesu airikie nrume Timoteo kwanu ree, amu nrima wakwa wimuye, ili mmanyaa mboni tanu kasa tikai.

²⁰Amu noore nndu ungi tiirikiani nrimiń sha uu ndi, nae akwatariaa mboni tanu dede.

²¹Amu woose vasoṛaa kilya kikee kyawo, vasoṛaa kilya kikee kya Kristo Yesu ndi.

²²Kake ye mumwishi sheeli awore usuro, amu sheeli mwana aṛundiaa vaava wamwi, mfo kuro da andeṛunda mashoṛa a ikwanisa nrumi shisha andu emwi nań.

²³Kyasia noore ba kundo ninrumaa ree, ili llohaa kasa mboni takwa timarisikiaa.

²⁴Iki nakyo nkiwore nrimiń sheeli Nndumi ashiniingaa nań nshe kwanu ree.

²⁵Kake nankabiṛio̱ nrimiń wwiiṛe Epafurodito kwanu. Ye mmwanama na uṛoe wakwa wa mashoṛa na wa fira, lingi mundenruma kwakwa asheendie findo fanu fa ishilela muu.

²⁶Amu andelanga nnu imulolia mu woose kanaria, fulya mweemiitaa sheeli alole.

²⁷Nae eelolee dede kufui ya ufu. Kake Iṛuva kalliha, lingi nta yye muni da ndi, kake na akwaa nniń da, amu ntawoywa ni unario na unario.

²⁸Kwa ikyo nammwotoṛa ree nnu, amu mukwanie nae na ifura lingi, nań unari lushaanguye.

²⁹Kyasia wwarień mukee va Nndumi na ifura lyoose, na womi vakee kuro vaindień.

³⁰Amu kwa kiimba kya ishoṛa lya Kristo aserikia ufu, nta iringa muu wamwi eelangaa yengeṛia kilya kitaare ini mwikee imakii ishiṛundia.