Read MMA SHIYYA Barua ya Vafilipi 4 Bible Online

Barua ya Vafilipi 4 - MMA SHIYYA bible

Barua ya Vafilipi 4

¹Kyasia vanavama vakwa vakunde mmuworie nyura ini mukee ifura lyakwa na tikisi yakwa, salaleń kyumu mukuwore na Nndumi.

²Naikimba Evodia na iikimba Sintike vave kimwi kari ka Nndumi.

³Nawe Sisigo wakwa nakutereva kwelekie vaka wo, amu vandekabania nrumi yo shisha andu emwi nań na Kilemensi na vaaroe vengi va mashoṛa va. Marina awo akee matisiṛe ifo kitabuń kya muu.

⁴Fureń kyeeri kyoose, fulya mukee va Nndumi! Lingi namuia: Fureń!

⁵Uwoo lwanu lulolike kwa vandu woose. Nndumi akee kufui ashe.

⁶Manya mutakwatare na kindo na kikava ki, kake filya muuṛi ongoyeń Iṛuva mwinterevaa na illembalemba andu emwi na imwaana.

⁷Na unambwe lwa Iṛuva lwilanyi ngyuṛango toose lumuware ngoo tanu na makusaṛo anu mulungani na Kristo Yesu.

⁸Lya ifurumia vanavama, kusaṛeń filya fikee fa dede na filya fikee fa sonu shisha na filya fikee fa langa na filya fisenyie na filya fikee fisha fa irera na filya foore tikisi shisha fikusaṛień.

⁹Ifo nafo mundefundio̱ na ifikulosha mukafiwaria mukafiita mukafilolia kwakwa niń, alli fitaniń! Na Iṛuva muni unambwe avaa neeni.

¹⁰Nafura nnu kari ka Nndumi, fulya mundekooya lingi shia ya ikusaṛa kyakwa sheeli mwikee ishikusaṛia, kake nta mundelolia mwaanya ndi.

¹¹Nta niikai narera kuro sha ntaare kindo ndi. Amu nankufunda ifilwa mfilya nkee nafo.

¹²Niishi yanguywa, lingi niishi ifumbukio̱. Kari ka mikae yoose na ka findo foose nammaa ifundwa iwuura na iliwa nsoto na iva na fiingi na yanguywa.

¹³Nkee imakii findo foose nkee na ito ashiniingie finya, yye Kristo.

¹⁴Kake mundetana kisha, ili mundeelekiana nań ngatareń takwa.

¹⁵Neeni Vafilipi mwishi mu veni, sheeli lia mbooka yongoya nrumi shisha ilyo nndeuka Makedonia, nta siṛi ingi indeelekiana nań kari ka mboni ii ya iniingia na iwaria kita ini mu veni da.

¹⁶Na lia nkee kulya Tesalonike mundeshiendie fa ishielekia na filya fishitinye, ana nta llimwi ndi.

¹⁷Nta niikai llangie ifo five findo fa ishieleka ndi, kake nkee iṛuya nunda timilie ikundeń, nato mutaalio̱o̱ ni Iṛuva.

¹⁸Kake wwore findo foose na ifumbuka, lingi niishule bele. Nndewaria kwa uko lwa Epafurodito findo filya findeuka kwanu fikashivia kyuuna kya kisaamu fikashivia nsimbika wirikio̱ usenye Iṛuva.

¹⁹Na Iṛuva wakwa amufumbutiaa filya foose fimutinye kwa kiṛengo kya usimba lwamwi lumwiriaa mboṛa yukie kwa Kristo Yesu.

²⁰Iniva akee Nde yeru eetikiswa miṛeṛe na miṛeṛe! Amen.

²¹Shiisanień nsongori woose awarani na Kristo Yesu. Vanavamae valya vakee kimwi nań yamwisana.

²²Vasongori woose vamwisana, kilanya valya vakee va numba ya Kaisari.

²³Unambwe lwa Nndumi Yesu Kristo lukaa na mirima yanu! Amen.