Read MMA SHIYYA Barua ya Vakolosai 2 Bible Online

Barua ya Vakolosai 2 - MMA SHIYYA bible

Barua ya Vakolosai 2

¹Amu mfurie mumanye ivingana lyakwa likee inini lya imuvingania ini na valya va Laodikia na valya vatandeshilolia kisangu kyakwa, amu vaimuruswa mirima yawo veelunganisio̱o̱ ikundeń vakooye usimba loose lwa uṛango na baa lwa imanya deń kiṛisi kya Iṛuva, nakyo nKristo.

³Amu kwamwi ye masaa woose a uṛango na imanya mfo fifisie.

⁴Nkee imuia kirero ki, amu nndu atashe amulembe na firero fa imukaba nrwe.

⁵Amu na kwakooya ntaiyo na wili, kake nkee andu emwi neeni na nrima niifuraa ilolia walio lwanu na udede lwa ikusura lyanu lya ikusura Kristo.

⁶Kyasia sheeli mundewaria Nndumi Yesu Kristo, mfo kuro endeń mukuwore nae.

⁷Muve vakuveekia si kwamwi na ikusongosia na ikukaarisia ikusureń sheeli mundeloshwa na yengeṛia iniingia yaana.

⁸Kulleń amu nndu atamuware uketi na miloshie ya ruu na ulembi lwa mboni ta ruu tiriani na sewu ta kivandu ana na ngyufundo ta kiisanga titariani na Kristo.

⁹Amu kari kamwi ye mfo ilolikie mboṛa yoose ya Iṛuva.

¹⁰Na ini mwankooya mboṛa ii yoose kwamwi ye akee nrwe wa unini na witoṛo loose.

¹¹Na irinwa mukarinwa andu emwi nae urini lutakee lwa maako, lwalakana na mikae ya kiwili iwore mareko, kuro llyo irinwa andu emwi na Kristo.

¹²Mukaṛikwa andu emwi nae ifo ubati-soń mukaṛutwa andu emwi nae mwikusuraa finya ya Iṛuva andenduta kuuka kwa vafu.

¹³Kamwaṛua neeni muve vayamuu andu emwi nae mwikee vafu mirima kiimba kya mareko na kiimba kya mikae yanu ya kivandu eemutiaa mareko woose.

¹⁴Kataṛua kilya kikee kitisiṛe kya itiṛiinga na itirwaa uumisioń lwamwi kakiuta-fo kitakive lingi eekikabiaa nsalabeń.

¹⁵Kavinga va finya na veetoṛo deń na ivaorusa na baa na ivaania vafinge na nsalaba wa Kristo.

¹⁶Kyasia manya nndu atamurerie kya findo fa ilya ana inwa ana kiimba kya kisuku ana iṛaswa lya mwiri ana mikonu ya Sabato.

¹⁷Findo fi foose mfa wooṛo foore ngo isiaa. Kilya kikee kwa ule nKristo ye muni.

¹⁸Manya nndu atamusoke isekye lyanu eeṛuaa na ukavili na itereva vamalaika na ikuṅinisa eenumbuaa alolia myorusie na ikufumbuta na makusaṛo amwi a kiwili akee a ruu,

¹⁹ataare akuwara na ito akee nrwe. Nae yye mulunganisa wili woose ukaniingwa finya kwa meeṛo na mirarii ukaṅina kwa mifurie yukie kwa Iṛuva.

²⁰Kyasia kwakooya mwafwe andu emwi na Kristo mukalakana na filya foose fikee fa isanga, nki ili mukee ikurwaa kwa si ya mavavaso sha vandu vakee ikuwara na isanga?

²¹Vakee imuia: ”Manya mutaware ifi, ana mutakombe ifi, ana mutabaane ifi”!

²²Ifo foose fanrawa-fo fiṛunde, numa fikashaa. Kwa ikyo mavavaso wo na miloshie yo yya vandu da.

²³Findo sha ifo filolikie sheeli mfa uṛango veekusauyaa shia ya iindia Iṛuva wo veni na ikunyiisa kya wooṛo na ikootoya. Nafo mfindo fitarie ngo ana foore finya ya iima milangie ya wili ndi.