Read MMA SHIYYA Barua ya Vakolosai 3 Bible Online

Barua ya Vakolosai 3 - MMA SHIYYA bible

Barua ya Vakolosai 3

¹Kyasia kwakooya mwandutwa andu emwi na Kristo, ṛuyeń kilya kikee ule kundo Kristo akai akee rembo uko usha lwa Iṛuva.

²Kusaṛień kilya kikee ule, nta ifi fikee isangeń ndi.

³Fulya mwamfwa na muu wanu ufisio̱ andu emwi na Kristo ifo kwa Iṛuva.

⁴Neeli Kristo alolikaa akee muu weru, llyo neeni mulolikaa andu emwi nae uniniń.

⁵Kyasia waań milangie ilya ya mivili yanu ikee ya kiisanga sha waaisi na ukwe na ilanga ikasha na makusaṛo a ruu andu emwi na unyuku lukee windi lwa maṛuva a wongo.

⁶Findo sha ifo fikoṛaa uvave lwa Iṛuva lusheaa valya vambiṛie.

⁷Neeni mwikee na mareko alya lia mukuwara nawo.

⁸Kake alli ifi foose firwaań kwaasha: ituṛuka na ukasha na nrumu na uvave na findo fa usutu fa kaniń kanu.

⁹Manya mutareriani wongo, fulya mwammaa isomuta-fo mikae ilya ya mbele andu emwi na mitanie yayo

¹⁰mukakuvikia mikae ya nndu mwiya aaṛulwa kisumani na fwana ya ito andentana, amu ammanye kisha.

¹¹Kyawa kuro llyo mukiuṛaa lingi ndi, kwakooya uu ni Ngiriki ana Muyuda ana nrine ana nndu atakee nrine ana mwini ana mmisa ana isinga ana atakee isinga, kake foose mfa Kristo, nae akuwore na ifi foose.

¹²Neeli mukee vasaue va Iṛuva na vasangori na vakunde, kiimba kya iki muve vandu va ngoo toore wooṛoo na warutu na utele na uwoo na ulalamboo!

¹³Muve va ndewu sheelwa mukutie mu veni na mu veni, kwakooya nndu awore shuu na nndu ungi. Sheeli Kristo amutia ini, mfo kuro neeni mutane!

¹⁴Na kilanya kya ifi veń na witanu lukee innde ifi foose na ifisumanisa!

¹⁵Na unambwe lwa Kristo lushilie ngoo tanu, fulya unambwe ilu llo mwavaangio, amu mukee wili umwi. Muve na vandu vaana Iṛuva!

¹⁶Kirero kya Kristo kiwore uṛango loose kiishue kari kanu bele! Mukuloshe na ikufunda mu veni na mu veni na fiimbo mukee iniingwa mMumuyo Nsongori, mwimbie Iṛuva ngooń tanu mwimwaanaa.

¹⁷Na foose mukee itana na firero ana na mitanie mutane mukuvavie na Nndumi Yesu mwiaanaa Iṛuva Nde!

¹⁸Muṛe vaka, irikień womi vanu sheeli kyawara valya vakee va Nndumi.

¹⁹Muṛe womi, kundeń vaka vanu, manya mutave vandu muvatuṛuaa na ivairia kinisi.

²⁰Muṛe vana, indień vasuṛi vanu kya findo foose, amu kuro kisenyaa Nndumi.

²¹Muṛe vaande ya vana, manya mutatuṛue vana vanu na kinisi, amu nawo vatamurishe sha mafisi.

²²Neeni vaṛundi, irikień iwo vakee womi vanu va kiwili findoń foose, nta nkwa windi lwa kisangu sha valya vakushiisa mbele ya vandu ndi, kake nkwa usha lwa nrimiń mwiindiaa Nndumi.

²³Kilya kyoose mukee itana taniń na nrima sheeli kikee kya Nndumi, nta nkya vandu ndi,

²⁴mwimanyaa sheeli muwariaa maṛe a diṅu kwa Nndumi, amu mukee iṛundia Kristo Nndumi.

²⁵Amu ulya akasheesa atawaa kilya akasheesa kiteefo kikundia. Muṛe womi, niingeń vaṛundi vanu filya fisumani nawo mwimanyaa sheeli ini neeni muwore Nndumi akee ifo iṛuvewu.