Read MMA SHIYYA Barua ya Vatesalonike ya kavili 1 Bible Online

Barua ya Vatesalonike ya kavili 1 - MMA SHIYYA bible

Barua ya Vatesalonike ya kavili 1

¹Ise Paulo na Silwano na Timoteo teesaana siṛi ii ya ifo Tesalonike ikuwore na Iṛuva Vaava weru na Nndumi weru Yesu Kristo.

²Uwoo luve neeni na unambwe fuukie kwa Iṛuva Nde na kwa Nndumi Yesu Kristo.

³Vanavama, kyatiwara yaana Iṛuva kyeeri kyoose kiimba kyanu. Kisumani kuro, fulya ikusura lyanu likee iṅina nnu na ikunda lia mukundani nalyo lyankwengeṛia kwa nndu woose wanu.

⁴Na akwaa ni ise ti veni takuṅinisa kiimba kyanu siṛiń ta Iṛuva kya isisiria lyanu na ikusura mukee nalyo kari ka matuṛulo anu woose na mavaviso mukee iliswa.

⁵Yyo myorusie ya uumisio lukee lwa udede lwa Iṛuva ya yorusa sheeli musumani yaka umangiń lwa Iṛuva ilu ini mukee ituṛulwa kiimba kyayo.

⁶Fulya kisumani Iṛuva ataa na matuṛulo valya vandemutuṛua ini,

⁷na imuwiiṛia ini mukee ituṛulwa muu andu emwi neese, ili Nndumi Yesu alolikaa na baa auka iṛuvewu ariani na vamalaika veni finya.

⁸Na iva avaa sha kibalabala kya muro eetaa kimini kwa valya vateeshi Iṛuva na valya vataindiaa nrumi shisha ya Nndumi weru Yesu.

⁹Nawo vakabwaa na imamisio̱ lya miṛeṛe na ilakaniswa na kisangu kya Nndumi na unini lwa finya yamwi,

¹⁰ili ye akaa ashe nkonu ulya, amu eetikiswa kari ka vasongori vamwi na iirikio̱ vvalya woose vamwirikie, — fulya irambua lyeru lyamiirikio̱ ni ini.

¹¹Kwa ikyo tikee imuterevia ini mikonu yoose, amu Iṛuva weru amusumanisie ivaangwa lyanu na yawutia mifurie yoose ya usha na ishoṛa lya iṛundia ikusura na finya,

¹²amu irina lya Nndumi Yesu liṅiniswa ni ini, neeni mwirikio̱ sheeli mukee vamwi kisumani na uwoo lwa Iṛuva weru na lwa Nndumi weru Yesu Kristo.