Read MMA SHIYYA Barua ya Vatesalonike ya kavili 2 Bible Online

Barua ya Vatesalonike ya kavili 2 - MMA SHIYYA bible

Barua ya Vatesalonike ya kavili 2

¹Kya mboni ta isha lya Nndumi weru Yesu Kristo na isangia lyeru nae tikee imutereva, vanavama:

²Manya mutataṛaakiswa ree ana manya mutakyangiswa mmumuyo llive ana nta nkirero kilive ana mbarua ikee ikusaṛio̱ yyeru, sheeli nkonu wa Nndumi wammaa ifika.

³Manya mutalembwa ni nndu na kava i na mikae yoose. Amu kyawara lishe mbele yuka siṛiń lia inini, na nndu ulya muni urekwa alolike, yye mwana wa ureti.

⁴Nae ni nkituva ulya akwimboyo kindo kyoose kivaangwaa Iṛuva ana kiwore windi. Na akwaa yye muni akukaarisaa rembo ifo numba ya Iṛuva eekworusaa kyaanya kyamwi sheeli ye yye Iṛuva.

⁵A le mukumbuye se sheeli lia nkee andu emwi neeni namuia ifi?

⁶Na alli kilya kikee imwima eekworusaa mukiishi kumande kyeeri kyamwi kyansha.

⁷Amu kiṛisi kilya kya urekwa lua kikee iṛunda mashoṛa alli. Kake eefo ito akee iima alli kumande autwaa.

⁸Io llyo muni urekwa ulya alolikaa. Nae Nndumi Yesu antuulaa na mumuyo wa kana kamwi na inreta kyeeri kyamwi kya isha kikamfika.

⁹Na ili muni urekwa ulya akworusaa aṛundaa eetikwaa nSatana, na iṛunda aṛundaa na imakii lyoose na myorusie na maṛiikiso a wongo,

¹⁰na milembie yoose ya ukavili eelembaa nayo iwo vakee vareti, fulya iwo vandelea ikunda udede, amu vakiṛwa.

¹¹Kwa ikyo Iṛuva aveendie finya ya ureti vakusure wongo,

¹²amu vaumisio̱ woose, fulya vatandekusura fa udede, kake vandesenywa mfilya fikee fa ureti.

¹³Kake kyantiwara ise yaana Iṛuva mikonu yoose kiimba kyanu, vanavama vakunde va Nndumi, fulya Iṛuva andemusaua kuuka mbooko mukooye ikiṛwa mwiiliswaa mMumuyo na ikusura udede.

¹⁴Nkyo andemuvaangia ini na nrumi shisha yeru, amu mukooye unini lwa Nndumi weru Yesu Kristo.

¹⁵Kyasia vanavama, salaleń na utomari na iwara miloshie ilya mundeloshwa ni ise kwa firero ana kwa mitisiṛie yeru.

¹⁶Na Nndumi weru Yesu Kristo muni na Iṛuva Nde yeru uu andetikunda katiniinga ifura lya miṛeṛe na iverea isha kwa uwoo lwamwi

¹⁷ye amuwiiṛie mirima yanu muu na imutomarisa fireroń foose na mitanień misha.