Read MMA SHIYYA Barua ya Vatesalonike ya kavili 3 Bible Online

Barua ya Vatesalonike ya kavili 3 - MMA SHIYYA bible

Barua ya Vatesalonike ya kavili 3

¹Lya ifurumia vanavama, titerevień amu kirero kya Nndumi kikwani na iindio̱ sha kulya kwanu.

²Lingi titerevień tikiṛwa maakoń a vandu valya vakasha. Amu nta woose vawore ikusura ndi.

³Kake Nndumi wwa usuro, nae amuaviaa finya na imuringa Nkasha ulya.

⁴Neese ili tikee va Nndumi timukusurie sheeli mukee itana kilya tindemuvavasia na ikaa mwakaa mundekitanaa.

⁵Nndumi aoruse ngoo tanu mukooye ikunda lya Iṛuva na isisiria lya Kristo.

⁶Vanavama, tamuvavasa na irina lya Nndumi Yesu Kristo: Kwaveń na mwanamae woose atawore walio na ilea ufundo lua munderambikio̱ ni ise.

⁷Amu mwishi mu veni kasa kyawara mutille, amu tindekaa kwanu kwa iiṅana ndi.

⁸Ana tindelya shoonga kwa nndu kya ruu ndi. Kake nkwa ngatara na yatarika tikaṛunda mashoṛa kio na nsanyiń, amu titalamie nta nndu umwi kwanu.

⁹Nta niikai titawore muumu ndi, kake kiteveto tikaaṛua mikae yeru ive myorusie kwanu, naamu mutilatie.

¹⁰Amu na akwaa nkyeeri ikyo tiikee kwanu teemmuvavasaa kirero iki, sheeli nndu aleaa iṛunda mashoṛa, kyasia manya ataniingwa shoonga.

¹¹Amu tamiita sheeli kunu kwanu veefo vandu vakwendiaa kya seṛeeto da vataṛundaa mashoṛa awo wo veni, kake vakwatariaa findo fa vandu vengi.

¹²Kyasia vandu sha iwo tavavavasa na ivaikimba na Nndumi weru Yesu Kristo vaṛunde mashoṛa na usuro na ilya shoonga yawo veni.

¹³Kake ini, vanavama, manya mutaaraa itana filya fikee finuru.

¹⁴Na akwaa ni nndu woose na kava i ateerikiaa kirero kya barua ii yeru kusembekeń nndu ito ana manya mutalye nae usaṛe, amu aṛiike na isiika.

¹⁵Kake manya mutantaalie ukituva, kake mwikimbeń sha mwanamae wanu.

¹⁶Alli Nndumi muni wa unambwe amuniinge unambwe kyeeri kyoose shień toose! Nndumi akaa neeni mu woose!

¹⁷A li iisana lya uko lwakwa niń Paulo. Ii yyo myorusie ya barua takwa toose. Yyo mitisiṛie yakwa.

¹⁸Uwoo lwa Nndumi weru Yesu Kristo lukaa neeni mu woose!