Read MMA SHIYYA Barua ya Timoteo ya mbele 1 Bible Online

Barua ya Timoteo ya mbele 1 - MMA SHIYYA bible

Barua ya Timoteo ya mbele 1

¹Niń Paulo nkee nrumi wa Yesu Kristo kwa ivavaso lya Iṛuva akee Nkiṛa weru na lya Yesu Kristo yye tiweree.

²Nakwisana iwe Timoteo kukee mwana wakwa wa dede kukusurie Iṛuva. Uwoo lukaa nawe na ililia na unambwe fuukie kwa Iṛuva Nde na kwa Kristo Yesu Nndumi weru.

³Lia niimboo kyaaṛo kya yenda Makedonia nakuvavasia kukaa ifo Efeso, amu kwime vandu valive veeloshaa miloshie ya mikae ingi,

⁴ana nta vatakuware na sumu titakee ta dede ana mboni ta fimia fa ngyufwari ta mbele titamandaa. Findo sha ifi finnde ivingana, fitannde mashoṛa a iṛundia Iṛuva aukie ikusureń.

⁵Amu ifurumia lya ikwanisa nrumi shisha ni ikunda limilie ngooń sheelwa na makusaṛoń mesha na ikusureń litawore ukavili.

⁶Veefo vandu valive vatuṛa ifo vakaaṛukia firero fa ruu.

⁷Vafurie iva valosha va mavavaso lla kasa vateeshi filya vakee irera ana filya vakee inumbua.

⁸Tiishi sheeli mavavaso mmanuru, kwakooya nndu aṛundaa nawo kwa shia isumani,

⁹eemanyaa sheeli ivavaso lyanrawa-fo kiimba kya nsumani ndi, kake nkiimba kya valea na vatakee va walio na vabiṛa Iṛuva na vawore mareko na varavi na vakaba vaande yawo na vakaba vamae vawo na vawaa vandu

¹⁰na vaaisi na vaaika womi kwa womi na veeva vandu na varera wongo na valya makite a wongo, na kwakooya kiifo kirero kingi kitavakani na firero fo fiwore muu.

¹¹Kuro mfo tindeloshwa na nrumi shisha ya unini lwa Iṛuva uu eetikiswa, nań naniingio̱ nkwanise.

¹²Nań nkee yaana Kristo Yesu Nndumi weru uu andeshiniinga finya, fulya ye andeshilolia sheeli nkee nsumani kashirwaa uṛundiń lwamwi.

¹³Nań lya mbele niikee muruma na mwumbuta na mutuṛua valya vakee vamwi. Kake nalilio̱, fulya natana ifo kwa utondo, amu neenkusuraa Nndumi ndi.

¹⁴Kake fisha Nndumi weru andeshiavia fikee fiingi nnu na kwa Kristo Yesu nakooya-fo inkusura na inkunda.

¹⁵Na kirero ki nkya dede, nakyo kisumani iwarwa wandu woose: Kristo Yesu ashe isangeń, amu akiṛe varekwa. Nań kari kawo nkee wa mbele.

¹⁶Kake nalilio̱, amu Kristo ye aoruse lya mbele kwakwa isisiria lyoose vve myorusie kwa valya vankusuraa vakooye muu wa miṛeṛe.

¹⁷Mangi ii ya miṛeṛe atawore mmando ana atalolio̱ na miso a kivandu akee Iṛuva ye muni airio̱ sonu na iitikiswa kyeeri kilungani uteefo mmando! Amen.

¹⁸Mwanakwa Timoteo, nankurambikia ivavaso lyo kufifise fisumani na firero fa vaauya findesendwa mbele yafo, amu kukabane ngabanu shinuru kwa finya yayo,

¹⁹kwiwaraa ikusura na nrima mweelwa. Veefo kiindi vandefikumba kwaasha vakareta ikusura lyawo.

²⁰Kari ka iwo veefo Imenayo na Alekisandero. Wo navvaniingia Satana, amu valoshike vatakirume Iṛuva.