Read MMA SHIYYA Barua ya Timoteo ya mbele 4 Bible Online

Barua ya Timoteo ya mbele 4 - MMA SHIYYA bible

Barua ya Timoteo ya mbele 4

¹Kyasia Mumuyo akee irera na baa sheeli mikonu ya ifurumia vavaa vandu vakwavaa na ikusura veearanyaa mimuyo ya ulembi na miloshie ya Masatana

²na itevetwa ni ukavili lwa vandu vareraa wongo veekoṛwaa mmuro wa ukasha lwawo imanyeń lyawo veni.

³Wo walya veemaa vandu veealikaa na ivavavasa veewukani na shoonga shilive tilya Iṛuva andetitana, amu tiwario̱ na waanu walya va ikusura veeshi filya fikee fa dede.

⁴Fulya kindo kyoose kyasongosio̱ ni Iṛuva nkinuru ana nta kiifo kiwore teve, kwakooya kikee iwario̱ na yaanio̱ ndi.

⁵Amu kikee iiliswa nkirero kya Iṛuva na kiterewo.

⁶Kwallosha vanavamae mboni iti kuvaa ndundi nnuru wa Yesu Kristo na ilisa nrima wafo firero fa ikusura na fa miloshie ilya minuru kwisoṛie.

⁷Kake sumu ta vasuṛi titasumani na miloshie tilee. Kake kukuloshe ku muni kuve muni windi.

⁸Amu wishiviṛi lwa wili lwelekaa kinnya da. Kake ikusura Iṛuva lyelekaa findoń foose, lingi liwore na kirekio kya muu wa alli na kya ulya uvaa numa.

⁹Kirero ki nkya dede, nakyo kyawara kiirikio̱ wandu woose.

¹⁰Kiimba kya iki tikee yatarikia kirero iki na tikarumwa, fulya tikusurie Iṛuva muni muu akee nkiṛa wa vandu woose na kilanya wa iwo vamwirikie.

¹¹Vavasia mboni iti na itilosha!

¹²Manya nta nndu ailaa ukoo lwafo, kake va nndu wa iiria valya vakusurie mbele na firero na weendo na ikundana na ikusura na usha.

¹³Kumande nasha tania utomari kusomie siṛi na iikimba na ilosha.

¹⁴Kutave kutaṛunda na wavi lua lwa Iṛuva kukee nalo. Kundeluniingwa kwa wauya usongori lia kwekeṛio̱ maako wasuṛi va siṛi.

¹⁵Kwataria iki na ikaa nakyo, amu woose vamanye kasa kukee yengeṛia yenda na mbele.

¹⁶Kuringe ku muni na iringa miloshie. Kuware tabu na findo fo. Kwantana kuro kukukiṛaa ku muni na akwaa vvalya vakwitaa.