Read MMA SHIYYA Barua ya Timoteo ya mbele 6 Bible Online

Barua ya Timoteo ya mbele 6 - MMA SHIYYA bible

Barua ya Timoteo ya mbele 6

¹Valya woose vakee masinga kyawara vairie womi vawo sonu, amu irina lya Iṛuva litarumwa na miloshie yeru.

²Na valya vawore womi vakusurie manya vatavaile, ili vakee vanavamae vawo. Kake vaengeṛie ivaṛundia, fulya vakusurie Iṛuva na ikundio̱ yye. Amu nawo vakee iniingia findo fa yelekia vengi.

³Firero ifo filoshe na iikimba. Kwakooya eefo nndu aloshaa kingi ana atairikie firero fa Nndumi weru Yesu Kristo fiwore muu ana miloshie ikulunganisie na iindia Iṛuva,

⁴ito ankushomba ateeshi nta kindo kimwi. Teve yamwi ni ivingana na ikureya lya ikureria da. Ifo mfo fuukaa iiria iriso na myaandu na nrumu na ifingia ikasha

⁵na isuyana litawore mmando lya vandu vavakani sha vaworwa ni uketo vakwavie na udede. Wo vakee ikusaṛa sheeli iindia Iṛuva ni ikooya mbusha. Iwo va mikae yo lakana nawo.

⁶Nkya dede mbusha nini ni ikusura Iṛuva kikawa andu emwi na ifilwa ni ifo tifiwore.

⁷Amu nta kindo tiiriee ili tindesha isangeń, ana nta kindo tiimboo kyeeri tuukaa-fo lingi.

⁸Kake tikawa na shoonga na kya iṛaa tinumbue: Fitifile.

⁹Kake valya vafurie ifumbisa masaa awo vawaa nreyoń ana mfwaanriń na ilangeń iingi litawore misendie lya ikasheesa vandu na ivakunia uretiń.

¹⁰Amu kilya kyantaa ukasha loose ni ilafuka na fesa. Veefo vandelilatia vakareta ikusura Iṛuva vakakuniinga mavaviso meengi wo veni.

¹¹Kake iwe kukee nndu wa Iṛuva iwukana na fikasha ifi! Latia usumani na unuru na ikusura na ikunda na isisiria na ulalamboo!

¹²Kabana ngabanu shisha ya ikusura lyafo! Wara muu utasiaa uve uvingo lwafo nto kwawaangio̱, amu kwarambua irambua inuru mbele ya varambua veengi.

¹³Nakuvavasa kisanguń kya Iṛuva aniingaa findo foose muu na kisanguń kya Kristo Yesu anderambua irambua inuru mbele ya Pontio Pilato,

¹⁴irikia ivavaso likutaare ilomi, kumande Nndumi weru Yesu Kristo alolikaa.

¹⁵Milolikie yamwi tooruswaa ni ṅṅinise uu kyeeri kyamwi awore finya toose ye muni, akee mangi ya mamangi na nndumi wa womi.

¹⁶Ni ulya atawore ufu kutu akaa langeń itavaa iserikia, ni ulya kitaare nndu ammulolia ana atamakii illolia. Ito ave na iṅiniswa na unini miṛeṛe na miṛeṛe! Amen.

¹⁷Valya vawore masaa meengi kunu isangeń vaikimbe, kaaṛa vatakwishike ana manya vatakusurani na usimba, amu lutaṛakanaa ree. Kake kyawara vaveree Iṛuva uu atiaviaa foose na ififumbuta tikawuura kisha.

¹⁸Vaikimbe vave vatana finuru, vave vasaṅiṛia masaa a mitanie misha, vave na maako na iva veelekana na vengi kwa kia kya nrima.

¹⁹Kuro llyo ikufisia diṅu ivavie kirembo kinuru kyeeri kilya kishaa, amu vakooye muu ukee muu wa dede.

²⁰Iwe Timoteo, ringa ikyo kunderambikio̱! Iwukana na firero kitaare mfa ufundo fitawore misendie na ivingana lya uṛango lukee lwa wongo tubu.

²¹Veefo vakee ilatia ifi vakakumba ikusura lya dede. Uwoo lukaa nawe!