Read MMA SHIYYA Barua ya Timoteo ya kavili 1 Bible Online

Barua ya Timoteo ya kavili 1 - MMA SHIYYA bible

Barua ya Timoteo ya kavili 1

¹Niń Paulo nkee nrumi wa Kristo Yesu kwa mifurie ya Iṛuva isumani na kirekio kya muu ukee na Kristo Yesu.

²Nakwisana iwe Timoteo mwana wakwa nkunde. Uwoo luve nawe na ililia na unambwe fuukie kwa Iṛuva Nde na kwa Kristo Yesu Nndumi weru!

³Nkee yaana Iṛuva uu ninterevaa kuuka ilyo mbooko ya vakuuku vakwa na nrima mweelwa, sheeli nkukumbuaa iwe matika woose fiterevioń fakwa kio na nsanyiń ntalemwa.

⁴Nań llangie nnu ikulolia niikumbuaa masoru afo, amu niishue ifura,

⁵niikumbuaa ikusura kukee nalyo fitawore ukavili, amu lya mbele lukee na kyekue wafo Loisi na yeyo wafo Evonike. Nań nkusurie deń nawe kukee nalyo.

⁶Kiimba kya ikyo nakukumburusa kuṛute lingi wavi lua lwa Iṛuva kundeluavio̱ lia nndekwekeṛia maako akwa.

⁷Amu Iṛuva antiaṛua tive vandu vawore weṛei ndi, kake antiaṛua tive vandu vawore finya na witanu na nrima wa useli.

⁸Kyasia manya kutaire sonu ya irambua Nndumi weru ana manya kutashiirie sonu niń nkee mfinge kiimba kyamwi. Kake sisiria mavavio andu emwi nań kiimba kya nrumi shisha kwa kiṛengo kya finya ya Iṛuva.

⁹Yye uu andetikiṛa kativaangia fuva shisongori kitaare nkwa mitanie yeru ise, kake nkwa kiṛengo kya wafio lwamwi muni na uwoo lwamwi. Uwoo lo tindeniingwa nKristo Yesu kuuka mbooko.

¹⁰Lukamanyika alli, ifi nkiṛa weru Yesu Kristo andelolika uu andefukya finya ta ufu kannde muu na mikae itakisiaa kwa shia ya nrumi shisha.

¹¹Kyayo niń nanrawa-fo vve nkwanisa na nrumi na llosha.

¹²Nkyo kiteveto naliswa ngyukiva ti. Kake nta niilashaa ndi, fulya niishi ulya ninkusurie na imanya sheeli awore finya ya iringa kilya nndeavio̱ kumande nkonu ulya ufikaa.

¹³Wara firero filya foore muu kwamiitia kwakwa fa ikukaarisia ikusureń na ikundeń lya ikunda Kristo Yesu.

¹⁴Ringa wavi lua usha kundeniingwa kwa finya ya Mumuyo Nsongori akee neese.

¹⁵Kwammaa imanya mboni ii sheeli woose vakee Asia vandeshitia, na kari kawo veefo Figelo na Erimogene.

¹⁶Nndumi alilie va numba ya Onesiforo, amu keengi eekee ishiwiiṛia muu ana nta andeiria mise yakwa sonu ndi.

¹⁷Kake ili andefika Rome ashiṛuya na utomari kumande ashikooyaa.

¹⁸Nndumi Yesu anniinge akooye ililio̱ kisanguń kya Iṛuva Nndumi nkonu ulya. Na kasa ashiṛundia fiingi ifo Efeso, iwe kwishi nnu.