Read MMA SHIYYA Barua ya Timoteo ya kavili 2 Bible Online

Barua ya Timoteo ya kavili 2 - MMA SHIYYA bible

Barua ya Timoteo ya kavili 2

¹Kyasia iwe, mwanakwa, kukukaarisie uwooń lwa Kristo Yesu.

²Na findo filya kundefiitia kwakwa mbele ya varambua veengi ifo kurambikie vandu vawore usuro iwo veeshi ilosha vengi.

³Sisiria ngatara andu emwi nań sha nseṛo nsha wa Yesu Kristo.

⁴Eefo nkabana fira akwatariaa findo fa iluya muu ndi, amu asenye ito anrwaa mashoṛeń a nseṛo wa fira.

⁵Na kwakooya nndu avingana kitavanuń, aniingwaa uvingo kitaare avvingana kisha ndi.

⁶Kyawara nremi ulya akee iṛunda na nrike ave wa mbele ilya shoonga ya nrema.

⁷Manya nnu filya nkee irera. Na Nndumi akwaviaa uṛango lwa imanya findo foose.

⁸Kumbua Yesu Kristo ulya andeṛutwa autwa kwa vafu, amilie ufwariń lwa Davidi, sheeli nrumi shisha ikee irera ilya nkee ikwanisa.

⁹Kiimba kyayo naliswa ukiva andu a ifingwa sha mutana fikasha. Kake kirero kya Iṛuva kivaa ifinga ndi.

¹⁰Nkyo kiimba nasisiria findo foose kiimba kya vasaue valya, amu nawo vakooye ikiṛwa lia likee kari ka Kristo Yesu andu emwi na unini lwa miṛeṛe.

¹¹Kirero kya ikusurwa nkyo iki: Kwakooya tafwa andu emwi nae, tikaa na muu andu emwi nae da.

¹²Kwakooya tisisiriaa, tishiliaa andu emwi nae. Kwakooya ise tankana, nae atikanaa.

¹³Kwakooya titankusuraa, ye eengeṛiaa iva na uwoo, amu amakii ikukana ye muni ndi.

¹⁴Vakumburuse ifi kwivaikimbaa mbele ya kisangu kya Iṛuva vatave na ivingana lya firero fitawore mbusha kita ifuluta valya vakee yaranya.

¹⁵Kutomarise ikworusa kwa Iṛuva sheeli kukee ndundi wa dede atatanaa findo fa usutu kwiṛundaa na kirero kya dede na useli.

¹⁶Kwaave na firero fa iiṅana fitawore misendie, fitakee fa miloshie. Fulya vandu sha iwo veengeṛiaa yenda fikasheń

¹⁷na kirero kyawo kyambukiaa sha saka ya ivave. Kari ka iwo veefo Imenayo na Fileto

¹⁸vandetuṛa dede ilya veenumbuaa sheeli iṛuka lyammaa iva. Nkuro vandeteveta na vengi vatakusure lingi Nndumi.

¹⁹Kake mfulo wa Iṛuva uselele, nato uwore kiringisio ki: ”Nndumi eeshi valya vakee vamwi“. Na lingi: ”Ulya woose asendaa irina lya Nndumi atie-wo ukasha“.

²⁰Kyasia kari ka numba nini fiifo fiya fa saabu na fesa da ndi, kake na fa kiri na fa uteri. Fiifo fingi fiwore mashoṛa a tikisi na fingi fiwore ndi.

²¹Kyasia kwakooya nndu eewukana na vandu iwo, avva sha kiya kiniinge tikisi. Kyammaa iiliswa kisenye Nndumi, kyansongosio̱ kya ishoṛa loose inuru.

²²Kake risha milangie ya ukoo, kulatie usumani na ikusura na ikunda na unambwe andu emwi na valya vakee ivaanga Nndumi na nrima mweelwa.

²³Kake lea ivingana lya iiṅana lya vandu kitaare valloshika kwimanyaa sheeli linnde myaandu tubu.

²⁴Lingi ndundi wa Nndumi atave wa myaandu, kake avie vandu woose na uwoo, ave llosha wa dede na nsisiria vakasha,

²⁵eeveekimbaa na ulalamboo valya vakee ilea, amu kwakooya kivaa Iṛuva availashie makusaṛo na ivaniinga imanya filya fikee fa dede,

²⁶vasangike lingi mirwe yawo na yuka nreyoń wa Satana, fulya wo veenreywaa yye na itana mifurie yamwi.