Read MMA SHIYYA Barua ya Tito 1 Bible Online

Barua ya Tito 1 - MMA SHIYYA bible

Barua ya Tito 1

¹Niń Paulo nkee iketi lya Iṛuva na nrumi wa Yesu Kristo. Nnderawa vve muṛundia ikusura lya vasaue va Iṛuva na mimanyie ya udede lusumani na imweṛea.

²Narawa nkuwore na iverea lya iverea muu wa miṛeṛe nto Iṛuva uu atamakii irera wongo arekia kuuka mbooko.

³Kamanyisa kirero kyamwi kyeeri kya alli na mikwanisie linderambikio̱ niń kwa ivavaso lya Iṛuva nkiṛa weru.

⁴Nakwisana iwe Tito mwanakwa kari ka ikusura li tikee itaṅaṛia. Uwoo luve nawe na unambwe fuukie kwa Iṛuva Nde na kwa Yesu Kristo nkiṛa weru.

⁵Kiteveto nakurea kulya Kireta, naamu kumarise isongosia filya fiseere fa isongosia, kurwaa-fo vasuṛi va siṛi miṛiń yoose sha lia nndekuvavasia.

⁶Na nndu woose wawo ave atawore ilomi, ave nndumi wa nka umwi, ave na vana vakusurie vatakee vaaisi ana vatakee va nkuushu.

⁷Amu kyawara mulla siṛi ave nndu ataṛiingwa nkindo, amu ni nringi wa Iṛuva. Manya atave nndu wa ikushiisa ye muni, manya atave mwaangu wa ituṛuka, manya atave nnangwa ana muyamyaandu, manya atave mukunda mbusha ya usutu.

⁸Kake ave muwaria veeni na mukunda fisha na wa kiṛengo na wa usumani, ave na nndu nsongori akushilie ye muni.

⁹Kuro llyo avaa nndu akuwore tabu na kirero kya Iṛuva kikee kisongovisi sha lia andemaa iloshwa, amu amakii iikimba vandu na miloshie iwore muu na ivinga valya vakee ivingana.

¹⁰Amu veefo veengi vawore nkuushu, vawore firero fitawore misendie, vakee valembi, na mmwasi valya va urini. Wwo kyawara vatumulwa kana kawo.

¹¹Wwo vandu vakee ifuluta vandu va numba yoose veeloshaa filya kitaare favawara kiimba kya mbusha ya usutu.

¹²Nndu wa kwawo akee mwauya wawo veni anrera: ”Vakireta wa wongo mikonu yoose, mmafisi makasha, walafu varoko”.

¹³Irambua lyo llya dede. Kiimba kya ikyo kuvanaiye na uvaave, amu vashie ifo ikusureń,

¹⁴vataaranye sumu ta kiyuda ana mavavaso a vandu vakulakanisie na filya likee fa dede.

¹⁵Findo foose mfisha kwa valya vakee vesha, kake kiifo kikee kinuru kwa iwo vakee vakasha ndi vatawore ikusura. Kake ngyuṛango tawo tavva shikasha, mfo kuro na makusaṛo awo.

¹⁶Vakee inumbua sheeli veeshi Iṛuva, kake kwa mitanie vakee inkana. Vawore matuṛua, walea ana nta vaṛundaa kindo kimwi kikee kisha ndi.