Read MMA SHIYYA Barua ya Tito 2 Bible Online

Barua ya Tito 2 - MMA SHIYYA bible

Barua ya Tito 2

¹Kake iwe rera mboni tilya tilunganaa na miloshie ya iniinga mirima muu

²sheeli vasuṛi vave vandu vataṛemie na wari, vave na nsendo nnuru, vave na uṛango, vave vesha ikusureń na ikundeń na isisirień.

³Mfo kuro ikimba na vakyeku vave na weendo lusumani na vasongori. Vatave vaṛiingi ana manya vatave vanwa wari mwiingi, kake vave valosha finuru,

⁴amu vaniinge vaka valya vakoo uṛango vakunde womi vawo na ikunda na vana vawo

⁵na iva na sonu shisha. Vave vanuru na iṛunda mashoṛa a isumanisa numba tawo na iindia womi vawo veni, amu kirero kya Iṛuva kitarumwa.

⁶Mfo kuro na womi vakoo kuvaikimbe vakaa na usuro.

⁷Kari ka findo foose kuvairie mbele iwe ku muni kwivaorusaa mitanie minuru, na ilosha kuvaloshe miloshie yafo na usaaṛi loose ateefo malomi.

⁸Kwanisa kirero kya itiniinga ikia kitairio̱ ngani, amu ulya wa ngani asuke atamakii irera nta kirero kimwi kya itisuta.

⁹Ikimba masinga aindie womi vawo na ivasenya findoń foose vatave vaira ngani.

¹⁰Manya vatave vaiva, kake vaoruse usongovisi usha loose, amu vaambike ufundo lwa Iṛuva nkiṛa weru findoń foose.

¹¹Amu ililia lya Iṛuva lyallolika lya ikiṛa vandu woose.

¹²Nalyo likee itifunda tilakane na mikae yoose mikasha isule Iṛuva ya kunu isangeń. Na ikaa tikaa na useli na usumani na usha kyeeri tikikee kunu isangeń ili. Na iva tive vandu vavereaa Yesu Kristo na ikusura,

¹³kumande ashaa na unini, amu yye Iṛuva weru na nkiṛa weru nnini.

¹⁴Na nkiṛa uu yye akuniingia kiimba kyeru. Na kiteveto katana kuro, naamu atitaue ukasheń loose na itisangya atisangye mirima, neese tive vandu vamwi vatomari vawore mitanie minuru.

¹⁵Rera firero fo kuvaikimbe na ivareria na finya toose. Manya kutailwa nta ni nndu umwi.