Read MMA SHIYYA Barua ya Filemon 1 Bible Online

Barua ya Filemon 1 - MMA SHIYYA bible

Barua ya Filemon 1

¹Niń Paulo nkee mfinge kiimba kya Kristo Yesu. Ise na Timoteo mwanamae weru takwisana iwe Filemon nkunde weru kukee ndundi wa mashora andu emwi neese.

²Takwisana nawe Apia kukee mfwamae weru na Arikipo nseṛo uroe weru tikaisana na siṛi yo ikee numba yafo.

³Uwoo lukaa neeni na unambwe fuukie kwa Iṛuva Nde yeru na kwa Nndumi Yesu Kristo.

⁴Nkee yaana Iṛuva wakwa mikonu yoose niikukumbuaa fiterewoń fakwa.

⁵Amu neeta mboni ta ikunda lyafo na ikusura kukee nalyo lya ikuwara na Nndumi Yesu na vasongori woose.

⁶Na ikuterevia nkee ikuterevia, amu ikusura lyafo kukee iṛundia nalyo vengi lireeke uṛango lwa imanya kindo kyoose kisha kikee kweru na itifingia Kristo.

⁷Nkya dede noore ukyesi wiingi na ilembwalembwa nnu kiimba kya ikunda lyafo, fulya mirima ya vasongori yawwiiṛio̱ muu ni iwe mwanama.

⁸Kwa ikyo na akwaa noore mwaanya — nkee na Kristo — wa ikuvavasa kilya kyakuwara,

⁹kake llolie llyo ṅwana nkutereve kiimba kya ikundana nawe, amu niń Paulo nkee nndu nkuu alii na mfinge kiimba kya Kristo Yesu.

¹⁰Ili nkee kuri, nakutereva kya mwanakwa nndemwiria kifingioń kyakwa, yye Onesimo.

¹¹Amu lya mbele andekusenya ndi, kake alii akwelekaa nnu iwe andu emwi nań.

¹²Yye muni nankuwiiṛia, amu ye nkimwi na ngoo yakwa.

¹³Amu niń niifuriee akaa kwakwa, amu ashiṛundie kifingioń kyakwa andu afo kya nrumi shisha.

¹⁴Kake nndekunda nta itana kindo kitaare kwamiirikia ndi, amu usha lwafo lutave nkya ikabiṛia, kake nkya mifurie yafo.

¹⁵Fulya eeba nkyo kiteveto kalakaniswa nawe kwa kiṛengo, amu kukaa nae lingi miṛeṛe,

¹⁶atakive sha iketi, kake ave kilanya ya iketi mmwanamaa nkunde. Kashivia nnu kuro niń na kya mmwasi akuviaa iwe akee wafo kwa wili na alii kava wafo na kari ka Nndumi.

¹⁷Kyasia kwakooya kulolie sheeli niń nkee kimwi nawe, wwarie sheeli nniń shi muni.

¹⁸Kake kwakooya andekuretia kindo ana kwakooya ni nsile wafo, ikyo kushitaalie niń.

¹⁹Nniń Paulo natisiṛa kwa uko lwakwa shi muni: Nniń ntaa. Nnumbuaa ntawore sile yafo ndi.

²⁰Ee mwanama, nkooye mbusha kwafo nkee na Nndumi. Wiiṛia nrima wakwa muu kukee na Kristo.

²¹Nakutisiṛia niikusuraa windi lwafo. Niishi namanya sheeli kutanaa fa mmwasi kita ifi nkee irera.

²²Na andu emwi na ifo kushisongosie andu nshekaa, amu kiimba kya fiterewo fanu mukooyaa bule ya ishilolia.

²³Veefo vakwisana, ni Epafira akee mfinge andu emwi nań kiimba kya Kristo Yesu

²⁴na Mariko na Aristariko na Dema na Luka vakee vaaroe vakwa.

²⁵Uwoo lwa Nndumi Yesu Kristo lukaa na mirima yanu! Amen.