Read MMA SHIYYA Barua ya Vaebrania 1 Bible Online

Barua ya Vaebrania 1 - MMA SHIYYA bible

Barua ya Vaebrania 1

¹Ilyo mbele Iṛuva anderera na vakuuku veru na kana ka vaauya fisuku kwa mikae miingi na kwa shia shiingi.

²Ifurumia lya mikonu ii karera neese na kana ka Mwana uu andenrwaa ave muyadiṅu ya foose. Lingi yye andetana nae isanga lyoose.

³Nae mmuni langa ya unini lwa Iṛuva, amu sheeli Iṛuva akai mfo kuro nae akai. Lingi yye awarie foose kwa finya ya kirero kyamwi. Ammaa isangya vandu mareko na usao lwamwi kakaa rembo uko usha lwa muya unini iṛuvewu ule.

⁴Kakilia na finya yamwi vamalaika, kasa irina ilyo andeliwaria live diṅu yamwi likilie lyawo.

⁵Amu mmalaika ungau Iṛuva andemwia: ”Ni iwe Mwana wakwa. Niń nankwira nnu“? Na lingi: ”Niń vvaa Vaava wamwi, nae avaa Mwana wakwa“.

⁶Na kya kyeeri kilya ili aataa vvele wamwi lya kavili isangeń, arera: ”Vamalaika woose va Iṛuva kyawara vamfwiṛie nri ye“.

⁷Kya vamalaika valya arera: ”Andeaṛua vamalaika vamwi vave mburaato, na vaṛundi vamwi vave fibalabala fa muro“.

⁸Kake kya Mwana arera: ”Wui Iṛuva, kifumbi kyafo kya kimangi nkya miṛeṛe na miṛeṛe kitawore mmando, na nsenge wa usaaṛi ni nsenge wa umangi lwafo.

⁹Iwe kundekunda usumani kwasua ukasha. Kwa ikyo, wui Iṛuva, kwamaambwa ni Iṛuva wafo mafura a ifura kwaṅinia vaaroe vafo“.

¹⁰Na lingi: ”Wui Nndumi, ilyo mbooko ni iwe kundevevia kivasha kya isanga, na iṛuvewu mmaasho a maako afo.

¹¹Ifo fisiaa, kake iwe kukaa. Na ifo foose fikuaa sha masaṛa.

¹²Kufilemaa sha nseto wa yeeṛia, nafo fiilashikaa. Kake iwe kukee ulya ulya na myaka yafo yoore mmando ndi“.

¹³A le eefo malaika andeio̱ yye: ”Kaa rembo uko lwakwa usha kumande nrwaa fituva fafo kwa si ya marende afo“?

¹⁴A le vamalaika iwo woose mmaketi a iṛunda ndi anderumwa aṛundie valya varwaa diṅu ya ikia?