Read MMA SHIYYA Barua ya Vaebrania 10 Bible Online

Barua ya Vaebrania 10 - MMA SHIYYA bible

Barua ya Vaebrania 10

¹Kyasia uvavaso lukee kiṛishwe kya fisha filya fishaa ana nta mfwana sheni ya findo fo ndi. Na firasio filya fikee iniingio̱ myaka yoose ilungani nta kyeeri kimwi fimakii isongovisa valya vafirambikia ndi.

²Kwakooya nkuro, firasio filya fiitio̱o̱ iniingio̱ ndi? Amu valya vakee ifirambikia vakammaa iiliswa kwa limwi veekikuloliaa se sheeli vakiwore mareko ndi?

³Kake firasio fo fikee ikumburusa vandu mareko myaka yoose.

⁴Amu usao lwa shawu ana lwa oṛo luwore finya ya yuta mareko ndi.

⁵Kwa ikyo ye (ni Yesu akee Mesia) ili andesha isangeń kanumbua: ”Misimbika na firasio kukundie ndi, kake kwanshisongosia wili.

⁶Misimbika ya iwolisa mareko findekusenya ndi.

⁷Llyo nndenumbua: Lla nasha — kyakwa ntisiṛio̱ kitabuń kilya kinini — niirikie mifurie yafo wui Iṛuva“.

⁸Mbooko arera: ”Numbe na shoonga ta irasia na numbe ta yokywa ta irasa na miniingie ya iwolisa mareko kundekunda ana nta kundesenywa mfo ndi“, lla kasa fikee iniingio̱ kwa uvavaso.

⁹Kae-ngeṛia inumbua: ”Lla nasha niirikie mifurie yafo“. Kauta-wo kilya kya mbele, amu aseṛeese kilya kya kavili.

¹⁰Kiimba kya mifurie yo ya Iṛuva tindekooya iiliswa kwa limwi nakyo kikava na iniingio̱ lya wili wa Yesu Kristo.

¹¹Na nkohani woose akee isalala oo nkonu eerasaa na iniingia misimbika ilya mikonu tiṛi, nayo kitaare imakii deń yuta mareko.

¹²Kake uu ili andemaa yuta nsimbika umwi nsi kiimba kya mareko ukaa miṛeṛe kakaa rembo uko usha lwa Iṛuva.

¹³Kuuka io akee ivera kumande fituva famwi firawaa kwa si ya marende amwi.

¹⁴Amu valya valanga iiliswa andevasongovisa na nsimbika umwi nsi ukaa miṛeṛe.

¹⁵Na Mumuyo Nsongori nae akee itirambuya, amu ili andemaa inumbua:

¹⁶”Ii yyo mma llyaa nawo mikonu ilya ya-nsia“, Nndumi kaengeṛia irera: ”Nrwaa mavavaso akwa mirimiń yawo, na makusaṛoń awo naatisiṛaa.

¹⁷Na mareko awo na ukasha lwawo nkikumbuaa lingi ndi“.

¹⁸Kake alya ifi fammaa itio̱, wwo ukiifo nsimbika kiimba kya mareko lingi ndi.

¹⁹Kyasia vanavama, ukyesi lweru toore llo ilu: Toore shia ya yaaka andu asongori, ni usao lwa Yesu.

²⁰Yyo shia andetiremia ikee shiiya yoore muu. Amu kilya kindetiima tiiraa na andu alya asongori — (llyo isulia lia inini) — kyamiimbolo yye. Muu wamwi andeuniingia nto wanrua shia ii.

²¹Neeli toore nkohani nnini akee ishilia numba ya Iṛuva,

²²kyasia tinserikie na ngoo ta warutu toore finya ya inkusura. Amu tamuutwa mikaeń ilya ya mbele tiifwalio̱o̱ mirima yeru na isangywa mivili yeru na mura nsha (ubatisoń).

²³Manya titaaraa irambua iverea lyeru, amu ulya andetiniinga kirekio ki wwa mma.

²⁴Lingi tiringane ti veni na ti veni, amu fikuware na ikundana na mitanie minuru.

²⁵Manya titakufukye na makusandio eru, sheeli mmiishivie ya vengi. Kake tikwikimbe na ikutomarisa. Titane kuri, fulya mulolie sheeli nkonu ulya wa isha lya Yesu wansha kufui.

²⁶Amu kwakooya tammaa imanya kilya kikee kya dede tikauyana lingi na fikasha kya usanduru, ukikaa-fo lingi nsimbika wa yuta mareko ndi,

²⁷kita ivera uumisio lushaa lwa yeṛeese na uvave lwa muro luwoyaa vabiṛa valya.

²⁸Nndu woose akasheesa uvavaso lwa Mose awalwa liteefo ililia, kwakooya veefo vandu vavili ana vararu varambua ukasha lwamwi.

²⁹Mukusaṛie are? Kyawara se nndu to anruma Mwana wa Iṛuva akooye uumisio lwa mmwasi na itaalio̱ usao lua lwa mma andeiliswa nalo sheeli kitakee kindo na itavania Mumuyo munnde uwoo?

³⁰Amu tiishi ulya anumbua: ”Yuṛa kimini mmashoṛa akwa, nniń ntaa sile“. Kikarerwa lingi: ”Nndumi yye aumisiaa vandu vamwi“.

³¹Nkindo kya yeṛeese iwa maakoń a Iṛuva eefo na muu.

³²Kumbueń mikonu ilya ya mbele lia mundemulikwa mukasisiria ivingana inini lya mavaviso.

³³Mikonu ingi mundeniingio̱ mu veni illwa vvandu mwirumwaa andu emwi na ivaviswa. Mikonu ingi mundella vaaroe vanu veetanio̱o̱ kuro.

³⁴Amu valya vandefingwa mundelya ukiva andu emwi. Neeli mundesokwa filya mukee nafo, mukairikia na ifura mwimanyaa sheeli moore fuvavikilie kilya kikee kinuru, fulya itataṛaakuu.

³⁵Kyasia manya mutakumbe iverea lyanu muveree nalyo, amu liwore maṛe meengi.

³⁶Kake kyamuwara muve vandu va ulalamboo, amu mutane mifurie ilya Iṛuva akundie na iwaria wavi lua mwee-Ilurekio̱o̱.

³⁷Amu ”Kiseere kinnya nnu Ilyo ulya akee isha ashaa ana nta asindaa ndi.

³⁸Na nsumani wakwa awaraa muu kiimba kya ishikusura. Kake ulya auyauyaa na numa asenyaa nrima wakwa ndi”.

³⁹Kake ise tikee kari ka valya vauyauyaa na numa na ireka ndi, kake tikee kari ka valya vakusuraa tikiṛe mirima yeru.