Read MMA SHIYYA Barua ya Vaebrania 11 Bible Online

Barua ya Vaebrania 11 - MMA SHIYYA bible

Barua ya Vaebrania 11

¹Kyasia ikusura Iṛuva ni iverea filya fishaa kitaare kuwore inunua, fulya kitaare fallolika.

²Amu kwa ikyo vakuuku veru vanderambuywa.

³Ni ikusura lyatimanyisa sheeli isanga li lindetanwa nkirero kya Iṛuva, na kilya kilolio̱ na miso kimilie findoń filolio̱ ndi.

⁴Ni ikusura Abeli andeutia nalyo Iṛuva nsimbika ukee nnuru kita ulya wa Kain. Karambulwa sheeli ni nsumani. Na Iṛuva muni karambua nsimbika wamwi. Na kwa ikyo lla kasa amfwe akiseere akee irera.

⁵Ni ikusura Enoki asamiswa atalolie ufu ana nta andekilolika lingi isangeń ndi, fulya ni Iṛuva andensamisa. Amu kitaare andesamiswa karambulwa sheeli asenye Iṛuva.

⁶Kake kitaare ni ikusura kivaa isenya Iṛuva ndi. Amu nndu aserikiaa Iṛuva kyawara akusure sheeli ye eefo na sheeli ataa valya vakee induya.

⁷Ni ikusura lindeitika Noe ili andemaa iikimbwa ni Iṛuva kya findo filya fiseere kitaare fallolika, kasongosia isanduku lia inini, amu akiṛe valya va numba yamwi. Na kwa ikyo kaumisia isanga eekuwaraa na ikusura lyo kava muya diṅu ya usumani ikooikaa na ikusura.

⁸Ni ikusura lindekangia Abraamu airikie ili andevaangwa asamie urukeń luwie diṅu. Kasama ateeshi andu eendaa.

⁹Ni ikusura lindenteveta kakusamisia urukeń lua lwa kirekio sheeli akee mwini eekaa maemiń andu emwi na Isaki na Yakobo vakee vaya diṅu ilya andu emwi nae.

¹⁰Amu eekee iverea muṛi utavaa iburua, amu ntana wayo ni Iṛuva.

¹¹Ni ikusura na akwaa nSara muni andeniingwa nalyo finya ya ikufinga lla kasa eemmaa mikonu yamwi, fulya ande-kusaṛia sheeli ulya andenrekia wwa ikusurwa.

¹²Na kiimba kya ikyo kishuku kikairiwa ni nndu ulya umwi, nae eekee sha alemwa iira, kikaingifwa sha nyinyiri ta iṛuvewu na sha nsanga ukee mbaai ya nruva utavaa itaala.

¹³Iva woose vandefwa veekaa na ikusura kitaare vamaawutio̱ firekio filya. Kake vakafilolia fikee kwaasha na ifaaniṛia veerambuaa, sheeli vakee veeni na va ikwiria kunu isa-ngeń.

¹⁴Amu iwo vakee irera firero sha ifo vakee imanyisa baa sheeli vakee iṛuya uruka lwawo lwa kyeń veni.

¹⁵Kifo veekumbuaa uruka lua vandesama, veekooyaa mwaanya yuya.

¹⁶Kake alli valangie uruka lukee unuru kita lua, llo lwa iṛuvewu. Kwa ikyo Iṛuva awore sonu ivaangwa Iṛuva wawo ndi, amu awatania muṛi.

¹⁷Ni ikusura lindeeleka Abraamu lia andeelelio̱ ni Iṛuva aniingie Isaki ave kirasio, nae eekee mwana wamwi wa ngitani.

¹⁸Nae eemmaa iwaria firekio filya anderekio̱ sheeli: ”Va Isaki wwo vavaangwaa va ufwari lwafo“.

¹⁹Nae kakusura sheeli Iṛuva amakii iṛuta nndu kwa vafu. Nkyo andewwiiṛio̱ ave myorusie (ya iṛuka lya Yesu akee ngitani).

²⁰Ni ikusura lindeteveta Isaki kaniinga Yakobo na Esau mboṛa, na akwaa yya findo fishaa numa.

²¹Ni ikusura lindetomarisa Yakobo ili andefika kufui na ifwa kaniinga vana valya vavili va Yosefu mboṛa kavaterevia akwinyamiṛi na nsengye wamwi.

²²Ni ikusura lindekangia Yosefu ili andefikia kufui na ufu lwamwi kasenda mboni ta isama lya vana va Isiraeli kavavasa kya mafua amwi.

²³Ni ikusura lindeteveta vasuṛi va Mose ili vandeirio̱ mmwana ulya vamfise miiri iraru, fulya valolia unuru lwa mwana ana nta vaeṛea ivavaso lia lya mangi ndi.

²⁴Ni ikusura lindeitika Mose ili aṅina kalea ivaangwa mwana wa mfu wa Farao.

²⁵Kasaua ituṛulwa andu emwi na vandu va Iṛuva kita ifura lyukie marekoń.

²⁶Amu akusaṛa kuro: Iteendwa kiimba kya Kristo ni usimba lukilie masaa woose a Misiri, fulya andelanga maṛe a kwa Iṛuva.

²⁷Ni ikusura lindensomuta kulya Misiri nta yeṛea uvaave lwa mangi, amu andekuwara na ulya atalolio̱ sheeli allolie.

²⁸Kiimba kya ikusura Iṛuva kasongosia Pasaka na yaamba mboshi ta myaango usao, amu ulya aretaa uvele atarete uvele lwa Vaisiraeli.

²⁹Kiimba kya ikusura Iṛuva vakaira nruveń ilya itondoṛie sha andu aumu. Na Vamisiri ili vandeelelia vakamiṛwa mmura.

³⁰Ni ikusura lindefukya-fukya muṛi ulya wa Yeriko, ili undemaa ilengetio̱ mikonu mfungare.

³¹Ni ikusura lindeima Raabu ulya eeretwaa andu emwi na valya valea iirikia Iṛuva lla kasa eekee nka mwaaisi, fulya awaria vandu valya va saa na unambwe.

³²Nanumbua are lingi? Amu feeri fifilaa ndi, kikooye niiongoyaa mboni ta Gideon na ta Baraka na ta Samuson na ta Yefita na ta Davidi na ta Samweli na ta vaauya fisuku valya.

³³Iwo kiimba kya ikusura Iṛuva vandekabana na mamangi vakaavinga vakatana kisumani vakakooya filya finderekio̱ vakaraya kana ka miiso.

³⁴Vakawaa miro ikee yaka na finya vakakia ikabwa na shombo. Na ili vave vatanyaṛi vakaniingwa finya lingi vakava vavaave fireń vakaumbuta syamu toose ta misa.

³⁵Vaka vakawiiṛio̱ lingi valya vandevafiya veeṛukaa. Kake vengi vakaliswa ukiva na ituṛulwa vakalea iboṛomulwa vakooye iṛuka likee isha kita ilyo.

³⁶Vengi vakaelelio̱ na iteendwa na ikabwa. Vengi vakaavikwa na mise na irawa kifingioń.

³⁷Vengi vakakabwa na iwalwa na mawe na ivaṛwa na misemenu na vengi vakawalwa na faandu. Vakaṛaaṛaa kundo koose vaṛee masaṛa a maanri na a savana da vaworwa nsoto na ivaviswa mfikasha filya vandetanio̱.

³⁸Dede isanga livasumani ndi. Vakanyanyaka veeovaa bateń na ngyuroń na ngyuaangeń na mariniń ifo uteriń.

³⁹Na iva woose lla kasa vandeirikio̱ nnu kiimba kya ikusura lyawo, kake nta valolia sheeli kirekio kilya kyamfika ndi.

⁴⁰Fulya Iṛuva andetideeṛia kindo kikee kisha kilanya sheeli: Wo vatakooye yawutio̱ kita andu emwi neese.