Read MMA SHIYYA Barua ya Vaebrania 12 Bible Online

Barua ya Vaebrania 12 - MMA SHIYYA bible

Barua ya Vaebrania 12

¹Kyasia kiimba kya ili tilengetio̱ warambua mamwiingi kikava sheeli iṛumbe litilengetiaa, tiburue-wo foose fiteemie tiikulakanisaa na malomi iva atiwore. Na iimboo tiimboo fira yeru tikee iivavasio̱ tisisiriaa.

²Tille Yesu uu andetibookia ikusura, lingi yye aliawutiaa. Ye andu a ifura liikee ideeṛie live uvingo lwamwi kakurika nsalaba wa indefiya kaeeṛa usutu mungo. Numa kakaa rembo taari ya uko usha lwa kifumbi kya Iṛuva.

³Kumbueń uu andesisiria kuro ili andevinwa warekwa, amu mutatanyaṛike mirima ana ilembwa.

⁴Amu ngabanuń yanu ya ikabana na mareko nta mwamfikia iwalwa ana iiritwa usao ndi.

⁵Lingi mwanrekio̱ wikimbi lua lureraa neeni sha vana: ”Mwana wakwa, manya kutaile iseṛeeswa ni Nndumi ana manya yuta ba ili kwakandarwa yye.

⁶Amu ulya Nndumi artkundie, yye anseṛeesaa na ikaba mwana ulya woose awwaria ave wamwi.

⁷Sisirień mwiseṛeeswaa. Iṛuva akee imutania sha vana. Amu mmwana ungau ndee atankabaa?

⁸Kake kwakooya mutaseṛeeswa sheeli vengi woose vakee itanio̱, mukee vana va maketi, ana nta mukee vana vaya diṅu ndi.

⁹Na andu emwi na ifo tiikee na vaande yeru va kivvili vakee itiseṛeesa neese tikavaindia, kyasia kyatiwara se kya mmwasi ikaa kwa si ya Nde wa mirima yeru na ikooya muu?

¹⁰Amu nkya dede iwo vandetifunda kyeeri kyaangu sheeli vandelolia veni nkinuru, kake ye akee itiseṛeesa kiimba kya itisongosia, amu tifikie usongori lwamwi.

¹¹Iseṛeeswa lyoose ili liifo lilolikaa sheeli nkindo kya ifura ndi, kake llya ukiva. Kake numa lyendee iwo vandefundwa nalyo usumani na unambwe.

¹²Kwa ikyo kaariseń maako akee matanyaṛi na nri titaare finya.

¹³Na marende anu muasongosie shia shisaaṛi, amu valya va siṛi vakee vatanyaṛi ana veeṅana vatarete shia ya dede, kake vashie.

¹⁴Ruyeń utomari lwa iva na unambwe na vandu woose na usongovisi; amu nta nndu umwi aloliaa Nndumi kitaare aluwore.

¹⁵Lleń nnu nndu ataanguywa ni uwoo lwa Iṛuva. Manya ”nrarii wa kivawwo“ utamie na imutuṛua, na vandu vengi vataniingwa ukasha ni ikyo.

¹⁶Manya atakaa-fo mwaaisi ana mubiṛa Iṛuva sha Esau andekunda diṅu yamwi ya uvele kiimba kya imutu limwi.

¹⁷Amu mwishi sheeli na akwaa ni ili andetiṅwa numa irwaa mboṛa ilya, andeleeka (amu andekooya mwaanya wa yaṛuka nrima ndi), lla kasa andeṛuya na masoru.

¹⁸Amu nta mundefikia uro lwa ibaaya lwikee yaka muro ana iṛumbe yuu na llema na mburaato

¹⁹na kiiyo kya mbembe na ununga lwa firero. Amu valya vandeita vakatereva vataio̱ nta kirero kingi,

²⁰amu nta vandemakii isisiria kirero kilya kindevavaswa ndi sheeli: ”Na akwaa ni ifisi libaayaa uro lo likabwa na mawe lifwe“.

²¹Na ifo ili findelolika sheeli mfa yeṛeese na akwaa mMose kanumbua: ”Nawarwa wweṛei na irerema“.

²²Kake ini mwanserikia uro lwa Sion na muṛi wa Iṛuva muni muu, nto Yerusalemu ya iṛuvewu, na iserikia isyamu lya vamalaika fiku fiingi

²³na nkwanio nnini wa siṛi ya vavele vakee vatisiṛe iṛuvewu mukaserikia na Iṛuva mwumisia vandu woose na mirima ya vandu vasumani vakee vaawutie

²⁴mukaserikia na Yesu munnde mma ilya shiiya na usao lua lwa ifwalia lureraa kisumani kita lua lwa Abeli.

²⁵Lleń mutalee ulya akee irera neeni. Amu kwakooya valya kitaare vandemakii ikia, ili vandelea ulya andekumanyisa kwawo kunu isangeń, kya mmwasi nnu ise tikiaa tikankwava nae mutiikimba akee iṛuvewu ndi.

²⁶Amu ununga lwamwi lundereremisa isanga kyeeri kilya. Kake alli anrekia eenumbuaa: ”Llimwi lingi nreremisaa isanga da ndi, kake nna iṛuvewu deń“.

²⁷Kake kirero kilya ”limwi lingi“ kikee irambua, sheeli filya fivaa ireremiswa fiilashikaa, fulya mfindo fitane, amu findo fitavaa ireremiswa fikaa.

²⁸Kyasia ili tikee iwaria umangi lutavaa ireremiswa, taane Iṛuva tiindundiaa mashoṛa ansenye tiworwa ni ukunyiisi na windi.

²⁹Amu Iṛuva weru mmuro ulyaa na imaa.