Read MMA SHIYYA Barua ya Vaebrania 13 Bible Online

Barua ya Vaebrania 13 - MMA SHIYYA bible

Barua ya Vaebrania 13

¹Kaań na ikundana sha vana va nka.

²Manya mutarekio̱ iwaria veeni, amu kwa shia ii vengi vawwaria vamalaika, nawo veni vateeshi.

³Kumbueń iwo vakee vafinge sheeli neeni mwafingwa andu emwi nawo. Mukumbue iwo vakee ituṛulwa, amu mukee na vvili shawo.

⁴Ihingana lya vandu vaalikie liirio̱ sonu vvandu woose, na kiraa kyawo manya kitasutwa, amu Iṛuva aumisiaa vaya ukwe na vaaisi.

⁵Manya mutave vandu vakuwore na unyuku, filwań mfilya fikee fanu. Amu ye muni anumbua: ”Nkureaa ndi, ana niiwukanaa nawe ndi“.

⁶Kwa ikyo tikee ikaṛia irera: ”Nndumi yye asheelekiaa, neṛeaa kindo ndi. Nkiki vandu vamakii ishitania“?

⁷Kumbueń veesi vanu valya vandemuia kirero kya Iṛuva. Mulle nnu ifurumia lya weendo lwawo musoṛe ikusura lyawo.

⁸Yesu Kristo wwa mikae imwi nsi kuuka mbele na alli na kumande miṛere.

⁹Manya mutafulutwa mmiloshie ingi itasumani imusheaa. Amu kilya kikee kisha kya yumisa ngoo ni uwoo lwa Iṛuva, nta mmiliye ya shoonga ndi. Yo yendee valya vakee ikwataria nayo mbusha ndi.

¹⁰Ise toore kirasioń kitaare valya vakee iṛundia yema lia vawore muumu wa ilya kilya kiiyo (nshoonga ya Nndumi ya waaṛo).

¹¹Amu nyama ta findo filya usao lwayo lukee inndwa ni nkohani nnini andu alya asongori lwa iwolisa mareko to tikoṛio̱o̱ wooṛo ya muṛi.

¹²Nkyo kiimba na Yesu kalisio̱ ukiva wooṛo ya mbenge ya muṛi (Goligota), amu ailise vandu vamwi na usao lwamwi weni.

¹³Kiimba kya iki ise tisomuke muṛiń ulya tilungane nae wooṛo tiikurikaa na usutu lua andeluekeṛio̱.

¹⁴Amu kunu toore muṛi ukaa ndi, kake tikee iṛuya ulya ukaa.

¹⁵Tikankaa nae tuutie Iṛuva nsimbika wa imwitikisa matika woose, nto wavi lwa fiṛomu filya fikee irambua irina lyamwi.

¹⁶Manya mutarekio̱ itania vengi finuru na yaviana nawo, amu miniingie ya mikae ii yyo isenyaa Iṛuva.

¹⁷Irikień iwo vamwirie mbele na ivakunyiisia, fulya iwo valalaa rembo veekusaṛiaa mirima yanu, amu wwo vakaa vauṛwa kiimba kyayo. Kutomariseń itana kuro, amu vatane mashoṛa awo na ifura kitaare vakee idia, amu iki kimwelekaa ndi.

¹⁸Titerevień! Amu mirima yeru ikee itirambuya filya tiishi sheeli: Tifurie iva na weendo unuru findoń foose.

¹⁹Kake nkee yengeṛia imwikimba mutiterevie kuro, amu wwiiṛwa kwanu ree.

²⁰Iṛuva muni unambwe andeṛuta Nndumi weru Yesu akee mwisi nnini wa maanri ifo kwa vafu kwa usao lwa mma ya miṛeṛe,

²¹Iṛuva uu amuniinge finya ya itana mifurie yoose ilya afurie! Ye akaarise mirimiń yanu kilya kinsenyie eemurwaa shień ya Yesu Kristo. Uu eetikiswa miṛeṛe na miṛeṛe! Amen.

²²Kake namutereva, vanavama, warień firero fi namwikimba nafo na uwoo, amu namutisiṛia kwa firero faangu.

²³Manyiń sheeli mwanamae weru Timoteo ammaa iboṛomulwa. Kansha ree tikwaniaa neeni andu emwi nae.

²⁴Isaniń woose vamwirie mbele na vasongori woose. Vanavamae veru vakee ifo Italia vamwisana.

²⁵Uwoo lukaa neeni mu woose!