Read MMA SHIYYA Barua ya Vaebrania 2 Bible Online

Barua ya Vaebrania 2 - MMA SHIYYA bible

Barua ya Vaebrania 2

¹Kwa ikyo kyatiwara tille mmwasi filya tindefiita, kaaṛa titafituṛe.

²Amu kwakooya kirero kilya kindererwa vvamalaika kiteevaa iilashika na ukasha loose na nkuushu woose findekooya maṛe a udede,

³a ise naare tirishaa uumisio, ili tibiṛie nrumi shisha ya ikiṛwa iṅini kuri? Ni Nndumi muni ndi andebooka itiongoya nrumi ii? Nayo ikarambulwa numa vvalya vandeiita na marwi awo.

⁴Iṛuva nae kaikaarisa na myorusie na maṛiikiso na finya ta mikae miingi na ngyuavi ta Mumuyo Nsongori, sheeli andekunda muni.

⁵Amu isanga lia lishaa tikee ilirera andelirwaa kwa si ya vamalaika ndi.

⁶Kake nndu umwi anderambua kuri andu alive eenumbuaa: ”Nndu yye ki ili kukee inkumbua, ana mwana wa nndu ili kukee imulla?

⁷Kwannyiisia vamalaika andu a kyeeri kifui. Kwanninga witoṛo na tikisi. Kwarwaa findo foose kwa si ya marende amwi. Kwanrambikia ushili lwa ishilia mashoṛa a maako afo“.

⁸Amu irwaa findo foose kwa si yamwi likee irambua sheeli nta kindo kimwi kindesaa kitanderawa kwa si yamwi. Kake alli tiseere tankilolia findo foose firawa kwa si yamwi ndi.

⁹Kake ulya andenyiisio̱ vamalaika andu a kyeeri kifui tillolie yye Yesu andeavio̱ witoṛo na tikisi kiimba kya mavaviso amwi a ufu. Fulya Iṛuva kwa uwoo lwamwi andekunda afiye woose vakiṛwa.

¹⁰Amu Iṛuva uu andetana foose five famwi katana foose kwa finya yamwi kakunda yorusa vandu veengi shia ya ifikia unini, ye kinsumani aawutie mashoṛa a ulya akee munnde ikia lyawo eenrwaa matuṛuloń, amu ave ndongori wawo.

¹¹Amu uu mwilisa na iwo veeliswa vawore Nde ii woose. Kiimba kya iki awore sonu ya ivavaanga vanavamae ndi

¹²eereraa: ”Nkwanisiaa vanavamae vakwa irina lyafo. Nkwimbiaa kari ka siṛi“.

¹³Na lingi: ”Vvaa munkusura ye“. Na lingi: ”Lla te, a wu niń ia na vana va, Iṛuva andeshiniinga“.

¹⁴Kyasia ili vana vawore wili na usao, na akwaa yye mfo kuro da andekuwara nafo, amu avinge na ufu lwamwi ulya eetoṛio ufu yye Satana

¹⁵na iboṛomua valya woose veeworwaa uketiń veeṛeaa ufu kyeeri kyoose kya muu wawo.

¹⁶Amu nta wamalaika avakusaṛie ndi, kake kishuku kya Abraamu nkyo akikusaṛie.

¹⁷Kwa ikyo kindewara avakaniswa na vanavamae vamwi findoń foose, amu akooye ivavio̱ mmuu kiimba kyawo na ivia Iṛuva nkohani nnini awore usuro wa yuta vandu marekoń.

¹⁸Amu fulya andetuṛulwa ye muni eereywaa, amakii yelekia valya vakee irevwa.