Read MMA SHIYYA Barua ya Vaebrania 3 Bible Online

Barua ya Vaebrania 3 - MMA SHIYYA bible

Barua ya Vaebrania 3

¹Kwa ikyo, vanavama vasongori, mundevaangwa sha ise na ivaangwa lyukie iṛuvewu, imboyoń miso anu Yesu uu tikee inrambua sheeli ni nrumi na nrasia weru nnini.

²Uu akusurani na ulya andenrwaa, sheeli Mose nae eekaii ifo numba ya Iṛuva yoose.

³Kake uu antaalika sheeli asenye unini lwa mmwasi kita Mose, sheeli ntana numba awore tikisi kita numba ilya.

⁴Fulya numba yoose itanwaa ni nndu, kake ulya andetana findo foose ni Iṛuva.

⁵Nkya dede na Mose eekee nsongovisi ifo numba ya Iṛuva sha ndundi ave nrambua wa filya filolikaa numa.

⁶Kake Kristo mMwana eetoṛio numba ii yamwi. Amu numba ii yamwi ni ise, kwakooya tikuwaraa na finya ya nrima na iṅinisa iverea lyeru kumande ifurumia.

⁷Kwa ikyo Mumuyo Nsongori anumbuye: ”Nkonu wa nnu mukamaa ununga lwamwi

⁸manya mutaumise ngoo tanu sha kyeeri kilya kya iṅuṅura nkonu ulya wa yelelio̱ kulya bateń,

⁹lia vaande yanu vashireya veeshieleliaa, lla kasa veelloliaa mitanie yakwa andu a myaka makumi aani.

¹⁰Kiimba kya iki nndeliwa nngoo kiimba kya kishuku ki nanumbua: Mikonu yoose vakee isingasinga ngooń tawo, nawo nta imanya shia takwa ndi.

¹¹Kwa ikyo nalye ikite niituṛukaa sheeli: Vaakaa kiimuyoń kyakwa kutu ndi“.

¹²Vanavama, lleń nnu kaaṛa atalolike-fo nndu kari kanu awore ngoo shikasha itawore ikusura akulakanise na Iṛuva uu awore muu.

¹³Kake kwikimbeń muveni na muveni oo nkonu — uu ukee ivaangwa ”wa nuu“ —, kaaṛa kwanu nndu ataumiswa ngoo eelembwaa ni ireko.

¹⁴Amu tavva va kyama kimwi na Kristo, kwakooya tikuwaraa na ikusura kumande ifurumia lia lindebooka kweru.

¹⁵Kyarerwa: ”Nnu ili mwitaa ununga lwamwi, manya mutaumise ngoo tanu sha kyeeri kilya mwaṅuṅura“.

¹⁶A iwo vaita vakaṅuṅura wa ki? Ni iwo woose se vauka Misiri variwa mMose?

¹⁷Lingi wa ki iwo andevatuṛukia myaka makumi aani? Ni iwo se vanderekio̱ na mivili yawo ikasia ifo bateń?

¹⁸A lingi ni i avaliya ikite sheeli: ”Vaakaa kiimuyoń kyakwa ndi“? Ni iwo se vandelea iirikia?

¹⁹Neese tilolie sheeli vandemakii yaaka ndi, fulya kitaare vandekusura.