Read MMA SHIYYA Barua ya Vaebrania 4 Bible Online

Barua ya Vaebrania 4 - MMA SHIYYA bible

Barua ya Vaebrania 4

¹Kyasia ifi kirekio kilya kya yaaka andu a kiimuyo kyamwi kikiifo da, tikusaṛe iki na weṛei, amu atalolike umwi wanu akituṛaa.

²Amu nkya dede na akwaa ni ise tankwanisio̱ nrumi ya mboni shisha shawo. Kake kirero kilya kindeitiwa kindevaeleka ndi, fulya kitaare kindekusanda na ikusura lyawo.

³Amu ise ili tikee vandu vakusurie taakaa kiimuyoń kyo, sheeli Iṛuva anderera: ”Nndelya ikite niituṛukaa sheeli: Vaakaa deń kiimuyoń kyakwa ndi“, lla kasa Iṛuva eemmaa mashoṛa amwi a itana foose kuuka isanga liwevio̱.

⁴Fulya Iṛuva awore andu arerie kya nkonu wa mfungare kuri: ”Nkonu wa mfungare Iṛuva eemuya mashoṛa amwi woose“.

⁵Na ia na-wo arerie: ”Nta vaakaa kiimuyoń kyakwa ndi“.

⁶Kyasia kirero ki kikee imanyisa sheeli mwaanya usaiye wa vandu kiindi vaakaa-fo, kake valya vandebooka ikwanisio̱ nrumi shisha wo vandelemwa yaaka kiimba kya ilea lyawo.

⁷Neeli indemaa iira myaka miingi nnu, Iṛuva karwaa-fo nkonu ungi — nto uu akee yuvaanga ”wa nnu“ —eereraa kwa kana ka Davidi sha lia arera mbele: ”Nnu mukamiita ununga lwamwi, manya mutaumise ngoo tanu“.

⁸Amu kikooye Yosua eevvafitaa kiimuyoń kilya, Iṛuva eekisendaa nkonu ungi ukee numa ndi.

⁹Kyasia kiifo kiimuyo kya vandu va Iṛuva kifisio̱.

¹⁰Amu ulya amaaka kiimuyoń kyamwi eemuya mashoṛa amwi, sheeli Iṛuva nae andeimuya mashoṛa amwi.

¹¹Kyasia titanie utomari taake kiimuyoń kyo, amu atalolike nta nndu umwi awaa eelatiaa miloshie ilya ya valya vandelea.

¹²Amu kirero kya Iṛuva kiwore muu, lingi kiwore finya, lingi kiwore uvave kita shombo shooi kuvili. Lingi kitotaa na yaava nrima na ngoo na meeṛo na miingo ikee kari kayo. Lingi nkyaangu na yelelia makusaṛo na mifurie ya nrima.

¹³Ana nta kiifo kindo kitane kitakee na baa mbele ya Iṛuva ndi, kake findo foose fikworusie na baa mbele ya miso amwi ito tiuṛwaa yye.

¹⁴Kyasia toore nrasia weru nnini akilie vengi anderwa iṛuvewu yye Yesu Mwana wa Iṛuva, kwa ikyo tikuware nnu na inrambua lyeru.

¹⁵Fulya titawore nrasia nnini atamakii ivavio̱ mmuu kya ngyutanyaṛi teru, kake andeelelio̱ findoń foose sheese, nta ivingwa mmareko.

¹⁶Kyasia ndefoń teende kifumbiń kya uwoo lwamwi na ifura, amu taavio̱-wo ililia na uwoo kyeeri tuuṛi yelekio̱.