Read MMA SHIYYA Barua ya Vaebrania 5 Bible Online

Barua ya Vaebrania 5 - MMA SHIYYA bible

Barua ya Vaebrania 5

¹Amu nkohani nnini woose asaulwa kari ka vandu arawa-fo kiimba kya vandu avasalalie kwa Iṛuva. Nkyo aniingiaa miniingie ya firasio fa iwolisa mareko.

²Uu amakii isisiria kwa uwoo valya vateeshi kindo na valya vakee uretiń, fulya nae muni arie utanyari.

³Na kiimba kya ikyo kyawwara iniingia-wo kirasio kya iwolisa mareko, kive nta kiimba kya vandu da ndi, na akwaa nkiimba kyamwi ye muni.

⁴Nta eefo nndu amakii iwara unini lu ye muni kwa finya yamwi ndi kita aluvaangio̱ ni Iṛuva sha Aron.

⁵Mfo kuro Kristo nae andekurwaya muni unini lu ave nkohani nnini ndi, kake ni ulya andemwia: ”Ni iwe Mwana wakwa, nniń nakwira nnu“.

⁶Na andu engi arerie: ”Ni iwe nkohani wa miṛeṛe wa mikae ya Melikisedeki“.

⁷Na mikonu ilya eekee na vvili wa kivandu anderasia ulya andemakii inkiṛa ufuń fiterewo na iiyaiya nae eekabaa kiṛoṛongyo na indonisia masoru kairikio̱ yye kautwa utiṛiń lwiwworee.

⁸Nae lla kasa eekee Mwana wa Iṛuva andekulosha iirikia na ngyukiva tilya andelya.

⁹Ili andemaa yawutio̱, kaendee valya woose vankusurie ikia lya miṛeṛe.

¹⁰Kasendwa ni Iṛuva sheeli ni nkohani nnini avakani na Melikisedeki.

¹¹Kyamwi ye fiifo firero fiingi fa irera, kake nkyumu yongoya, fulya mwawa varoko va iita.

¹²Amu kikammuwara iva valosha — amu kyamiira kyeeri kyaasha —, kyawara muloshwa ni nndu miloshie ya mboni ta Iṛuva ya mbooko, neeni mukava vandu vauṛi maruva, nta nshoonga shuumu ndi.

¹³Fulya nndu woose anwee maruva amiishivia kirero kya usumani ndi, fulya akee mwana munnya.

¹⁴Kake shoonga shuumu yya vandu vanini valya ngyuṛango tawo tamiishiviswa yaava finuru na fikasha.