Read MMA SHIYYA Barua ya Vaebrania 6 Bible Online

Barua ya Vaebrania 6 - MMA SHIYYA bible

Barua ya Vaebrania 6

¹Kiimba kya ikyo nkyo kiteveto tikatia ilosha miloshie ya Kristo ya mbele, teengeṛie imulosha filya fa yawutia. Manya titakirwaa-fo lingi mfulo wa kavili tiimuloshaa sheeli: Ilashikeń mutie-wo mitanie ilya innde ufu na ya iva na ikusura Iṛuva

²na ya miloshie ya ubatiso na ya yekeṛia maako na ya iṛutwa kwa vafu na ya uumisio lwa miṛeṛe.

³Na ifi titanaa, ili Iṛuva atielekiaa.

⁴Amu iwo vammaa iniingwa langa na ikomba miniingie yukie iṛuvewu na yavio̱ Mumuyo Nsongori

⁵vakakomba kirero kinuru kya Iṛuva na finya tilya ta mikonu ishaa,

⁶kwakooya iwo vauka siṛiń, kyalema ivaaṛua vave vaiya lya kavili. Amu vakee vandu vawwiiṛa Mwana wa Iṛuva nsalabeń lya kavili andu emwi na imweetia baa.

⁷Amu nrema likannwa fua ikee iikaba keengi, imirisaa filimu fa yelekia valya vakee irema iimiriswaa ni Iṛuva.

⁸Kake kwakooya imirisaa miinga na masinde, yankashaa nkufui na idengwa na ifurumia mmuro wa ikoṛa.

⁹Kake ini vakunde, na akwaa tarera kuro, kiimba kyanu tankusura sheeli fisha filya fitiniingaa ikiṛwa mufiwore.

¹⁰Amu Iṛuva mmurekio̱ arekio̱ mitanie yanu na ikunda lyanu mundeṛundia nalyo irina lyamwi mwiṛundiaa vasongori kuuka mbooko na alli ndi.

¹¹Kake tifurie nnu, oo umwi wanu akutomarise kuro da, amu amakii iwara iverea lyeru lyoose kumande ifurumia.

¹²Manya mutave varoko, kake latień valya vakee vayadiṅu ya firekio fo vafikusurie na isisiria.

¹³Amu ili Iṛuva anderwaya Abraamu kirekio, akuliya ikite ye muni, fulya andetuṛa wa illiya akee nini kita ye.

¹⁴Kanumbua: ”Nkuniingaa mboṛa dede, nkwaṛuaa kuve ufwari unini“.

¹⁵Neeli Abraamu andesisiria, kalolia kirekio kilya kyaawukia.

¹⁶Amu ili vandu valyee ikite, valiyaa ulya akee nnini kita wo, na ikite likava mmando kwa valya woose vakee ivingana na iniinga kirero kilya finya.

¹⁷Na Iṛuva nae ili andekunda nnu yorusa valya vakee vayadiṅu ya kirekio kilya sheeli filya afikundie ye fiilashikaa kutu ndi, kalya ikite.

¹⁸Kakunda ifo fili fivili fiteelashike kutu, amu kivaa Iṛuva arere wongo ndi, naamu fitiniinge iwoliswa lyoore finya ise tinderishia iwara iverea lyeru teemfisio̱o̱.

¹⁹Iverea lyo tikee ifiwara live kindo kitiwore nrimiń kitatuṛie finya. Ikyo nkyo kikee yaaka ifo kari kakee numa ya isulia lia inini.

²⁰Ifo mfo Yesu andeakia atiṛuye shia, nae ni ndongori weru kava nkohani nnini wa miṛeṛe wa mikae ya Melikisedeki.